ಅಂತಾರಾಷ್ಟ್ರೀಯ ಮಟ್ಟದ ಜ್ಞಾನ ಕನ್ನಡದಲ್ಲಿ ಲಭ್ಯ: ಕೆ.ಎ.ದಯಾನಂದ

ಬೆಂಗಳೂರು, ಮೇ 4: ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಡಿ ಕಾರ್ಯನಿರ್ವಹಿಸುತ್ತಿರುವ ಕಣಜ ಅಂತರ್ಜಾಲ ತಾಣವು ರಾಜ್ಯ, ರಾಷ್ಟ್ರ ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿರುವ ಮಾಹಿತಿ ಹಾಗೂ ಜ್ಞಾನವನ್ನು ಕನ್ನಡ ಜನತೆಗೆ ಮುಟ್ಟಿಸುವ ನಿಟ್ಟಿನಲ್ಲಿ ‘ಇ-ಲೋಕ’ ಎಂಬ ಹೊಸ ವಿಭಾಗವನ್ನು ತೆರೆದಿದೆ ಎಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ನಿರ್ದೇಶಕ ಕೆ.ಎ.ದಯಾನಂದ ತಿಳಿಸಿದ್ದಾರೆ.

ಗುರುವಾರ ಕನ್ನಡ ಭವನದಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಟಿಯಲ್ಲಿ ಕಣಜ ಅಂತರ್ಜಾಲದ ‘ಇ-ಲೋಕ’ ಹೊಸ ವಿಭಾಗವನ್ನು ಲೋಕಾರ್ಪಣೆ ಮಾಡಿ ಮಾತನಾಡಿದ ಅವರು, ರಾಜ್ಯ ಹಾಗೂ ಅಂತಾರಾಷ್ಟ್ರೀಯ ಮಟ್ಟದ ಜ್ಞಾನವು ವಿದ್ಯಾರ್ಥಿ, ಶಿಕ್ಷಕ ಹಾಗೂ ಜನಸಾಮಾನ್ಯರಿಗೆ ಸುಲಭವಾಗಿ ಸಿಗುವ ನಿಟ್ಟಿನಲ್ಲಿ ಕಣಜ ಅಂತರ್ಜಾಲವನ್ನು ಸಿದ್ಧಪಡಿಸಲಾಗಿದೆ ಎಂದು ಅವರು ಹೇಳಿದರು.

ಐದು ಉಪವಿಭಾಗ: ಕಣಜ ಅಂತರ್ಜಾಲದಲ್ಲಿ ಇ-ಲೋಕ ಎಂಬ ಹೊಸ ವಿಭಾಗವನ್ನು ತೆರೆಯಲಾಗಿದೆ. ಅದರಲ್ಲಿ ‘ಇ-ದಿನ’, ‘ಇ-ಜಾಗ’, ಇ-ದನಿ’, ‘ಇ-ದೃಶ್ಯ’ ಹಾಗೂ ‘ಇ-ಪುಸ್ತಕ’ ಎಂಬ ಉಪವಿಭಾಗಗಳನ್ನು ತೆರೆಯಲಾಗಿದ್ದು, ಇವುಗಳಲ್ಲಿ ನಾಡು, ನುಡಿ ಹಾಗೂ ರಾಷ್ಟ್ರ-ಅಂತಾರಾಷ್ಟ್ರೀಯ ಮಟ್ಟದ ಮಾಹಿತಿ ಹಾಗೂ ಜ್ಞಾನವನ್ನು ನಾಡಿನ ಜನತೆಗೆ ಸುಲಭವಾಗಿ ಸಿಗುವಂತೆ ಸಿದ್ಧಪಡಿಸಲಾಗಿದೆ ಎಂದು ಅವರು ಹೇಳಿದರು.

ಇ-ದಿನ: ಕಣಜ ಅಂತರ್ಜಾಲದಲ್ಲಿ ‘ಇ-ದಿನ’ ಅತ್ಯಂತ ಪ್ರಮುಖವಾದ ವಿಭಾಗವಾಗಿದೆ. ಇತಿಹಾಸದಲ್ಲಿ ಆಗಿ ಹೋಗಿರುವ ಪ್ರತಿದಿನದ ವಿಶೇಷತೆಯ ಕುರಿತು ಮಾಹಿತಿಯನ್ನು ಜನತೆಗೆ ತಿಳಿಸುವುದಾಗಿದೆ. ಇದರಿಂದ ವಿದ್ಯಾರ್ಥಿ ಹಾಗೂ ಶಿಕ್ಷಕರಿಗೆ ಉತ್ತಮ ಮಾಹಿತಿ ಸಿಗುವಂತಾಗುತ್ತದೆ ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಇ-ದನಿ: ಈ ವಿಭಾಗದಲ್ಲಿ ಐತಿಹಾಸಿಕ ವ್ಯಕ್ತಿಗಳ ಅನುಭವಗಳನ್ನು ಅವರ ಧ್ವನಿಗಳಲ್ಲಿಯೇ ದಾಖಲಿಸಲಾಗುವುದು. ಇದರ ಜೊತೆಗೆ ಜಾನಪದ, ತತ್ವಪದ ಸೇರಿದಂತೆ ಅಪರೂಪದ ಹಾಡುಗಳನ್ನು ದಾಖಲಿಸಲಾಗುವುದು. ಇದರಿಂದ ಮುಂದಿನ ತಲೆಮಾರಿಗೆ ಇತಿಹಾಸವನ್ನು ಸರಿಯಾದ ರೀತಿಯಲ್ಲಿ ಅರ್ಥ ಮಾಡಿಕೊಳ್ಳಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು.

ಕಣಜ ಅಂತರ್ಜಾಲ ತಾಣದಲ್ಲಿ ಇ-ಪುಸ್ತಕ ಹೊಸ ಎಂಬ ವಿಭಾಗವನ್ನು ತೆರೆಯಲಾಗಿದೆ. ಇದರಿಂದ ನಾಡಿನ ಹಿರಿಯ ಸಾಹಿತಿಗಳ ಪುಸ್ತಕಗಳು, ಪರಿಸರ, ಭೌಗೋಳಿಕ, ಸಾಂಸ್ಕೃತಿಕ ಸೇರಿದಂತೆ ಉತ್ತಮ ಮಾಹಿತಿಯುಳ್ಳ ಪುಸ್ತಕಗಳನ್ನು ಪಿಡಿಎಫ್, ಇ-ಪಬ್ ಹಾಗೂ ಟೆಕ್ಷ್ಟ್ ರೂಪದಲ್ಲಿ ಓದುಗರಿಗೆ ಸುಲಭವಾಗಿ ದೊರೆಯುತ್ತದೆ.
-ಕೆ.ಎ.ದಯಾನಂದ , ನಿರ್ದೇಶಕ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ

ಕಣಜದ ವಿಶೇಷತೆ
-ಕಣಜ ಅಂತರ್ಜಾಲವನ್ನು ಮೊಬೈಲ್, ಕಂಪ್ಯೂಟರ್‌ನಲ್ಲಿ ಸುಲಭವಾಗಿ ನೋಡುವ ರೀತಿಯಲ್ಲಿ ವಿನ್ಯಾಸ ಮಾಡಲಾಗಿದೆ.
 -ವಿಶ್ವದ ಎಲ್ಲ ಕ್ಷೇತ್ರದ ಜ್ಞಾನ ಹಾಗೂ ಮಾಹಿತಿ ಕನ್ನಡದಲ್ಲಿ ಓದಬಹುದಾಗಿದೆ.