ಮಕ್ಕಳ ಮನಸ್ಸಿನ ಜೊತೆಗೆ ಆಟ, ಪಾಠ

ಸಂವಹನ ವೈಪರೀತ್ಯ ನ್ಯೂನತೆಗಳಿಂದ ಬಳಲುತ್ತಿರುವ ಮಕ್ಕಳಿಗೆ ತಮ್ಮ ತಮ್ಮ ಸಮುದಾಯಗಳಲ್ಲಿ ಮತ್ತು ಸ್ಥಳೀಯವಾಗಿ ಪ್ರಾರಂಭಿಕ ಹಂತದಲ್ಲೇ ಮಧ್ಯ ಪ್ರವೇಶಿಸಿ ಸಮಸ್ಯೆಗಳನ್ನು ನಿವಾರಿಸುವ ಸಲುವಾಗಿ ಕಮ್ಯುನಿಕೇಷನ್ ಡೀಲ್ ಯೋಜನೆಯನ್ನು ರೂಪಿಸಲಾಗಿದೆ. ಕಮ್ಯುನಿಕೇಶನ್ ಡೀಲ್ ಯೋಜನೆಗೆ ಒಂದು ನಿರ್ದಿಷ್ಟ ಸಂಘಟನಾತ್ಮಕ ತಳಹದಿಯನ್ನು ನಿರ್ಮಿಸುವ ಉದ್ದೇಶದಿಂದ 2003ರಲ್ಲಿ ಬೆಂಗಳೂರಿನಲ್ಲಿ ‘ದಿ ಕಾಮ್ ಡೀಲ್ ಟ್ರಸ್ಟ್’ನ್ನು ಸ್ಥಾಪಿಸಲಾಯಿತು. ಇದರ ರೂವಾರಿ ಡಾ. ಪ್ರತಿಭಾ ಕಾರಂತ್ ಅವರು. ‘ದಿ ಕಾಮ್ ಡೀಲ್ ಟ್ರಸ್ಟ್’ನ ತರಬೇತಿ ಮಾಪನಗಳನ್ನು ಡಾ. ಕಾರಂತ್ ಅವರ ಮಾರ್ಗದರ್ಶನದಡಿ ಸಿದ್ಧಪಡಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಸಿದ್ಧಗೊಂಡ ಕೃತಿಗಳಲ್ಲಿ ‘ಕಲಿಕೆಯ ಪೂರ್ವಾಪೇಕ್ಷಿತ ಕೌಶಲಗಳು’ ಒಂದು. ಇದೊಂದು ಪ್ರಾಯೋಗಿಕ ಕೈಪಿಡಿ. ಪ್ರತಿಭಾ ಕಾರಂತ್ ಈ ಪುಸ್ತಕ ಮಾಲೆಯ ಸಂಪಾದಕರು. ಡಾ. ಎಂ. ಸಿ. ಪ್ರಕಾಶ್ ಈ ಕೃತಿಯನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ. ಮಗುವಿಗೆ ಅದರ ಗುಣ ಲಕ್ಷಣದಂತೆ ಶ್ರೇಣಿಯ ರೂಪದಲ್ಲಿ ಎಂಟು ಕ್ಷೇತ್ರ ಗಳನ್ನು ಗಮನದಲ್ಲಿಟ್ಟು ಕುಶಲತೆಯನ್ನು ಹೆಚ್ಚಿಸುವ ದಿಶೆಯಲ್ಲಿ ನೀಡಬೇಕಾದ ತರಬೇತಿಯ ಕುರಿತು ಚಿಕಿತ್ಸಕರಿಗೆ ಮತ್ತು ಮಗುವಿನ ಪೋಷಕರಿಗೆ ಮಾರ್ಗದರ್ಶನ ನೀಡುವುದು ಈ ಪ್ರಾಯೋಗಿಕ ಕೈ ಪಿಡಿಗಳ ಉದ್ದೇಶವಾಗಿದೆ. ಮಕ್ಕಳಲ್ಲಿ ದೃಷ್ಟಿ ಸಂಪರ್ಕ ಹೆಚ್ಚಿಸಲು, ತಾಳ್ಮೆಯನ್ನು ವೃದ್ಧಿಸಲು ಬೇರೆ ಬೇರೆ ಆಟಗಳನ್ನು ಆಡಿಸುವ ತಂತ್ರವನ್ನು ಈ ಕೃತಿ ಹೇಳಿಕೊಡುತ್ತದೆ. ಅದೇ ರೀತಿ ಯಲ್ಲಿ ಶಾಲಾಪೂರ್ವ ಕಲಿಕೆಯ ಕೌಶಲಗಳನ್ನು ಬೇರೆ ಬೇರೆ ಆಟಗಳ ಮೂಲಕ ಈ ಕೃತಿ ಹಂತ ಹಂತ ವಾಗಿ ಹೇಳಿಕೊಡುತ್ತದೆ. ಮಕ್ಕಳ ಸೂಕ್ಷ್ಮ ಮನಸ್ಸನ್ನು ಅರ್ಥ ಮಾಡಿಕೊಂಡು ಅದರೊಂದಿಗೆ ಸಂವಹನ ಸಾಧಿಸಲು ಕಲಿಸುವ ಈ ಆಟಗಳು ನಿಜಕ್ಕೂ ಕುತೂಹಲಕಾರಿ. ಮಕ್ಕಳ ಜೊತೆಗೆ ಒಡನಾಡುವ ಶಿಕ್ಷಕರು, ಪೋಷಕರು ಈ ಕೃತಿಯನ್ನು ಕೈಪಿಡಿಯಾಗಿ ಇಟ್ಟುಕೊಳ್ಳುವುದು ಅತ್ಯಗತ್ಯ. ನವಕರ್ನಾಟಕ ಪ್ರಕಾಶನ ಹೊರತಂದಿರುವ ಈ ಕೃತಿಯ ಮುಖಬೆಲೆ 150 ರೂ.