ಟೈಮ್ಸ್ ನೌ ಅನ್ನು ಹಿಂದಿಕ್ಕಿದ ಅರ್ನಬ್ ರಿಪಬ್ಲಿಕ್ ನಂ 1

ಮುಂಬೈ,ಮೇ 18 : ತಮ್ಮ ರಿಪಬ್ಲಿಕ್ ಟಿವಿ ಚಾನಲ್ ನ ಆರಂಭಿಕ ಕೆಲ ದಿನಗಳಲ್ಲಿಯೇ ಅರ್ನಬ್ ಗೋಸ್ವಾಮಿ ಹಲವಾರು ವಿವಾದಗಳಿಗೆ ತುತ್ತಾಗಿದ್ದು ನಿಜ. ಆದರೆ ಈ ವಿವಾದಗಳು ಅವರಿಗೆ ವರದಾನವಾಗಿ ಪರಿಣಮಿಸಿದಂತೆ ಕಾಣುತ್ತಿದ್ದು ಇದೀಗ ಅವರ ಚಾನಲ್ ‘ಟೈಮ್ಸ್ ನೌ’ ಅನ್ನು ಹಿಂದಿಕ್ಕಿ ನಂ 1 ಸ್ಥಾನ ಪಡೆದುಕೊಂಡಿದೆ.

ಕಳೆದ ಹಲವಾರು ವರ್ಷಗಳಿಂದ ಟೈಮ್ಸ್ ನೌ ಚಾನಲ್ ಇಂಗ್ಲಿಷ್ ಚಾನಲ್ ಗಳ ಪೈಕಿ ಅಗ್ರ ಸ್ಥಾನ ಪಡೆದುಕೊಂಡಿತ್ತಲ್ಲದೆ ಅದನ್ನು ಹಿಂದಿಕ್ಕುವುದು ಇತರ ಚಾನಲ್ ಗಳಿಗೆ ವಸ್ತುಶಃ ಅಸಾಧ್ಯವಾಗಿತ್ತು.

ಕಳೆದ ಡಿಸೆಂಬರ್ ತಿಂಗಳಲ್ಲಿ ಅದರ ಮುಖ್ಯ ಸಂಪಾದಕರಾಗಿದ್ದ ಗೋಸ್ವಾಮಿ ಟೈಮ್ಸ್ ನೌ ಅನ್ನು ತೊರೆದಾಗ ಅದರ ಟಿಆರ್‌ಪಿ ಕಡಿಮೆಯಾಗಬಹುದೆಂಬ ಶಂಕೆಯಿದ್ದರೂ ಹಾಗಾಗಿರಲಿಲ್ಲ.

ಆಧರೆ ಬ್ರಾಡ್ ಕಾಸ್ಟ್ ಆಡಿಯನ್ಸ್ ರಿಸರ್ಚ್ ಕೌನ್ಸಿಲ್ ಗುರುವಾರ ಬಿಡುಗಡೆಗೊಳಿಸಿದ ಅಂಕಿ ಅಂಶಗಳನ್ನು ಗಮನಿಸಿದಾಗ ರಿಪಬ್ಲಿಕ್ ಟಿವಿ ತನ್ನ ಸಮೀಪದ ಪ್ರತಿಸ್ಪರ್ಧಿ ಟೈಮ್ಸ್ ನೌ ಗಿಂತ ಎರಡು ಪಟ್ಟು ಅಧಿಕ ವೀಕ್ಷಕರನ್ನು ಪಡೆದಿದೆ ಎಂದು ತಿಳಿಯುತ್ತದೆ.

ರಿಪಬ್ಲಿಕ್ ಟಿವಿಯ ವೀಕ್ಷಕ ಸಂಖ್ಯೆ 21,17,000 ಆಗಿದ್ದರೆ, ಟೈಮ್ಸ್ ನೌ ವೀಕ್ಷಕರ ಸಂಖ್ಯೆ 11,48,000 ಆಗಿತ್ತು.

ರಿಪಬ್ಲಿಕ್ ಟಿವಿ ವಿರುದ್ಧ ಈಗಾಗಲೇ ಟೈಮ್ಸ್ ನೌ ಕ್ರಿಮಿನಲ್ ಪ್ರಕರಣ ದಾಖಲಿಸಿ ಅರ್ನಬ್ ಹಾಗೂ ಇನ್ನೊಬ್ಬ ಪತ್ರಕರ್ತೆ ತನ್ನ ಕಾಪಿರೈಟ್ ಉಲ್ಲಂಘನೆ ಮಾಡಿದ್ದಾರೆ ಹಾಗೂ ಟೈಮ್ಸ್ ನೌ ಬಳಿ ಕೆಲಸ ಮಾಡುತ್ತಿದ್ದಾಗ ಅವರ ಬಳಿಯಿದ್ದ ಕೆಲ ಆಡಿಯೋ ಟೇಪ್ ಗಳನ್ನು ಈಗ ರಿಪಬ್ಲಿಕ್ ಟಿವಿ ಮುಖಾಂತರ ಬಹಿರಂಗಪಡಿಸಿದ್ದಾರೆ ಎದು ಆರೋಪಿಸಿತ್ತು.

ಕಾಂಗ್ರೆಸ್ ವಕ್ತಾರರೊಬ್ಬರನ್ನು ‘ಹುಳು’ ಹಾಗೂ ಗಾಂಧಿ ಕುಟುಂಬದ ನಾಯಿ ಎಂದು ಹೇಳುವ ಮೂಲಕ ನಂತರ ಅರ್ನಬ್ ವಿವಾದಕ್ಕೀಡಾಗಿದ್ದರು.

ರಿಪಬ್ಲಿಕ್ ಚಾನಲ್ ತನ್ನ ವೀಕ್ಷಕರ ಸಂಖ್ಯೆ ಹೆಚ್ಚಿಸಿಕೊಳ್ಳಲು ಹಲವಾರು ಅವ್ಯವಹಾರಗಳನ್ನು ನಡೆಸುತ್ತಿದೆಯೆಂಬ ದೂರುಗಳ ಹಿನ್ನೆಲೆಯಲ್ಲಿ ನ್ಯೂಸ್ ಬ್ರಾಡ್ ಕಾಸ್ಟರ್ಸ್‌ ಅಸೋಸಿಯೇಶನ್ ಟ್ರಾಯ್ ಗೆ ಪತ್ರ ಬರೆದು ಕಠಿಣ ಕ್ರಮಕ್ಕಾಗಿ ಆಗ್ರಹಿಸಿತ್ತು.

Week 19: Here are the English News Channels that made it to the Top 5. #SeasonalSwinghttps://t.co/fH9CySJs22 pic.twitter.com/Szz1n9dMRp

— BARCIndia (@BARCIndia) May 18, 2017