ಕುಸಿದು ಬಿದ್ದ 6 ಮಹಡಿಯ ಕಟ್ಟಡದ ಕೆಳಗೆ 80 ಗಂಟೆಗಳ ಕಾಲ ಸಿಲುಕಿ ಬದುಕುಳಿದ 6 ತಿಂಗಳ ಕೂಸು

ಕಿನ್ಯಾ, ಮೇ 18: ಭಾರೀ ಗಾಳಿಮಳೆಯಿಂದ ಕುಸಿದುಬಿದ್ದ 6 ಅಂತಸ್ತುಗಳ ಕಟ್ಟಡದ ಕೆಳಗೆ ಸುಮಾರು 80 ಗಂಟೆಗಳ ಕಾಲ ಸಿಲುಕಿದ್ದ ಮಗುವೊಂದು ಪವಾಡಸದೃಶವಾಗಿ ಬದುಕುಳಿದ ಘಟನೆ ಕಿನ್ಯಾದ ನೈರೋಬಿಯಲ್ಲಿ ನಡೆದಿದೆ,

ನಾಲ್ಕು ದಿನಗಳ ಸತತ ಕಾರ್ಯಾಚರಣೆಯ ಬಳಿಕ ಕೀನ್ಯಾದ ರೆಡ್ ಕ್ರಾಸ್ ಸಿಬ್ಬಂದಿ ಕೊನೆಗೂ ಮಗುವನ್ನು ಹೊರತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ.  

“80 ಗಂಟೆಗಳ ಕಾಲ ಕಟ್ಟಡದ ಅವಶೇಷಗಳಡಿ ಸಿಲುಕಿದ್ದ ಮಗು ಬ್ಲಾಂಕೆಟೊಂದರಲ್ಲಿ ಸುತ್ತಲಾಗಿದ್ದ ಬಕೆಟ್ ಒಂದರಲ್ಲಿ ಪತ್ತೆಯಾಗಿತ್ತು. ಮಗು ನಿರ್ಜಲೀಕರಣಕ್ಕೆ ತುತ್ತಾಗಿತ್ತಾದರೂ ಯಾವುದೇ ದೈಹಿಕ ಗಾಯಗಳಾಗಿರಲಿಲ್ಲ” ಎಂದು ರೆಡ್ ಕ್ರಾಸ್ ನ ಆ್ಯಂಟನಿ ವಾಂಗಿ ಹೇಳಿದ್ದಾರೆ.

ಪವಾಡಸದೃಶವಾಗಿ ಬದುಕುಳಿದ 6 ತಿಂಗಳ ಮಗು ಡೀಲೆರಿನ್ ಸೈಸಿ ವಸಿಕೆಯನ್ನು ಕೆನ್ಯಟ್ಟಾ ನ್ಯಾಶನಲ್ ಹಾಸ್ಪಿಟಲ್ ಗೆ ದಾಖಲಿಸಲಾಗಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮಗುವಿನ ತಂದೆ ರಲ್ಸಾನ್ ಸೈಸಿ, “ನನ್ನ ಮಗುವನ್ನು ರಕ್ಷಿಸಿದ ದೇವರಿಗೆ ನಾನು ಕೃತಜ್ಞತೆಯನ್ನು ಸಲ್ಲಿಸುತ್ತೇನೆ. ನಾನು ಆಕೆಯ ಹೆಸರನ್ನು ಕರೆದೆ. ಅದೇ ಸಂದರ್ಭ ಆಕೆ ಕೈ ಎತ್ತಿದಳು. ನನ್ನ ಮಗು ಕೊನೆಗೂ ಸಿಕ್ಕಿತು” ಎಂದವರು ಹೇಳಿದ್ದಾರೆ. ಇಷ್ಟೇ ಅಲ್ಲದೆ ರಕ್ಷಣಾ ತಂಡಕ್ಕೂ ಕೃತಜ್ಞತೆ ಸಲ್ಲಿಸಿರುವ ಅವರು, “ರಕ್ಷಣಾ ಕಾರ್ಯಕರ್ತರ ಪ್ರಯತ್ನ, ಅವರ ತಾಳ್ಮೆಯಿಂದಲೇ ನನ್ನಂತವರ ಮುಖದಲ್ಲಿಂದು ಸಂತೋಷವಿದೆ” ಎಂದು ಹೇಳಿದ್ದಾರೆ.

ಚಿಕಿತ್ಸೆ ಪಡೆಯುತ್ತಿರುವ ಮಗು ಆರೋಗ್ಯದಿಂದಿದ್ದು, ನಿರ್ಜಲೀಕರಣವೂ ಸರಿಯಾಗಿದೆ. ಆದರೆ ದುರದೃಷ್ಟವಶಾತ್ ಮಗು ತಾಯಿಯನ್ನು ಕಳೆದುಕೊಂಡಿದೆ.