ದೇಶದ ಮೊದಲ ಯಶಸ್ವಿ ಗರ್ಭಕೋಶ ಕಸಿ : ಪುಣೆಯ ಗ್ಯಾಲಕ್ಸಿ ಕೇರ್ ಆಸ್ಪತ್ರೆಯ ಸಾಧನೆ

ಪುಣೆ,ಮೇ 19: ಗರ್ಭಕೋಶವೇ ಇಲ್ಲದಿದ್ದ 21ರ ಹರೆಯದ ಯುವತಿಯ ಶರೀರದಲ್ಲಿ ಗರ್ಭಕೋಶವನ್ನು ಯಶಸ್ವಿಯಾಗಿ ಕಸಿ ಮಾಡುವ ಮೂಲಕ ನಗರದ ಗ್ಯಾಲಕ್ಸಿ ಕೇರ್ ಆಸ್ಪತ್ರೆಯು ದೇಶದಲ್ಲಿ ಮೊದಲ ಬಾರಿಗೆ ಈ ಸಾಧನೆಯನ್ನು ದಾಖಲಿಸಿದೆ.

 ಮಹಾರಾಷ್ಟ್ರದ ಸೊಲ್ಲಾಪುರ ಜಿಲ್ಲೆಯ ಅಕ್ಕಲಕೋಟ್ ತಾಲೂಕಿನ ಈ ಯುವತಿಗೆ ಹುಟ್ಟುವಾಗಲೇ ಗರ್ಭಕೋಶವಿರಲಿಲ್ಲ. ಹೀಗಾಗಿ ಮದುವೆಯಾದರೂ ಮಕ್ಕಳ ಭಾಗ್ಯ ದಿಂದ ವಂಚಿತಳಾಗುತ್ತಿದ್ದಳು. ಮಗಳ ಸುಂದರ ಬದುಕಿಗಾಗಿ 41ರ ತಾಯಿ ತನ್ನ ಗರ್ಭಕೋಶವನ್ನೇ ದಾನ ಮಾಡಲು ನಿರ್ಧರಿಸಿದ್ದಳು. ‘‘ನಾನು ನನ್ನ ಮಗಳಿಗೆ ನೆರವಾಗಲು ಸಾಧ್ಯವಿಲ್ಲದಿದ್ದರೆ ನಾನು ಗರ್ಭಕೋಶ ಹೊಂದಿ ಏನು ಉಪಯೋಗ ’’ಎಂದು ಈ ತಾಯಿ ಶಸ್ತ್ರಚಿಕಿತ್ಸಾ ವೈದ್ಯರ ತಂಡವನ್ನೇ ಪ್ರಶ್ನಿಸಿದ್ದಳು. ಗುರುವಾರ ಒಂಭತ್ತು ಗಂಟೆಗಳ ಕಾಲ ನಡೆದ ಮ್ಯಾರಥಾನ್ ಶಸ್ತ್ರಚಿಕಿತ್ಸೆಯಲ್ಲಿ ತಾಯಿಯ ದೇಹದಲ್ಲಿದ್ದ ಗರ್ಭಾಶಯ ಮಗಳ ದೇಹವನ್ನು ಸೇರಿಕೊಂಡಿದೆ.

ಮೊದಲ ಶಸ್ತ್ರಚಿಕಿತ್ಸೆ ಯಾವಾಗಲೂ ಸಮಯವನ್ನು ತೆಗೆದುಕೊಳ್ಳುತ್ತದೆ. ಈ ಪ್ರಕರಣದಲ್ಲಿ ಯುವತಿಗೆ ಆಕೆಯ ತಾಯಿಯ ಗರ್ಭಕೋಶವನ್ನು ಕಸಿ ಮಾಡುವ ಮುನ್ನ ನಾವು ರಕ್ತಪೂರೈಕೆ ವ್ಯವಸ್ಥೆಯನ್ನು ಮರು ಸೃಷ್ಟಿಸಿಕೊಳ್ಳಬೇಕಾಗಿತ್ತು ಎಂದು ಆಸ್ಪತ್ರೆಯ ನಿರ್ದೇಶಕ ಡಾ.ಶೈಲೇಶ್ ಪುಟಂಬೇಕರ್ ಹೇಳಿದರು.

ಗುರುವಾರ ಮಧ್ಯಾಹ್ನ 12 ಗಂಟೆಗೆ ಆರಂಭಗೊಂಡಿದ್ದ ಶಸ್ತ್ರಚಿಕಿತ್ಸೆ ಮುಗಿಯುವಾಗ ರಾತ್ರಿ 9 ಗಂಟೆ ಕಳೆದಿತ್ತು. ತಾಯಿಯ ದೇಹದಿಂದ ಗರ್ಭಕೋಶವನ್ನು ಪ್ರತ್ಯೇಕಿಸುವ ಪ್ರಕ್ರಿಯೆಯೇ ಬರೋಬ್ಬರಿ ನಾಲ್ಕೂವರೆ ಗಂಟೆಗಳ ಸಮಯವನ್ನು ತಿಂದಿತ್ತು.

ಹೃದಯ,ಶ್ವಾಸಕೋಶ ಮತ್ತು ಮೂತ್ರಪಿಂಡ ಕಸಿಗಳನ್ನು ನಡೆಸಿರುವ ಡಾ.ಸಂಜೀವ ಜಾಧವ್ ಅವರು ಈ ಶಸ್ತ್ರಚಿಕಿತ್ಸೆ ನಡೆಸುವಲ್ಲಿ ಡಾ.ಪುಟಂಬೇಕರ್‌ಗೆ ನೆರವಾಗಿದ್ದರು.

ತಾಯಿಯ ದೇಹದಿಂದ ತೆಗೆದಿದ್ದ ಗರ್ಭಾಶಯವನ್ನು ಮಗಳ ದೇಹದಲ್ಲಿಯ ಇತರ ಅಂಗಾಂಗಗಳೊಂದಿಗೆ ಸೂಕ್ತವಾಗಿ ಹೊಂದಿಸಿ ಕಸಿ ಕಾರ್ಯ ನಡೆಸಬೇಕಾಗಿತ್ತು, ಜೊತೆರಕ್ತಪೂರೈಕೆಯನ್ನು ಮರುಸೃಷ್ಟಿಸಬೇಕಾಗಿತ್ತು. ಹೀಗಾಗಿ ರಕ್ತನಾಳಗಳಿಗೆ ಸಂಪರ್ಕ ಕಲ್ಪಿಸಲು ನಾವು ಅತ್ಯಂತ ಎಚ್ಚರಿಕೆ ವಹಿಸಬೇಕಾಗಿತ್ತು ಎಂದು ಡಾ.ಜಾಧವ್ ವಿವರಿಸಿದರು.

ಶಸ್ತ್ರಚಿತ್ಸೆಯ ಬಳಿಕ ತಾಯಿ-ಮಗಳಿಬ್ಬರೂ ಸೂಕ್ತವಾಗಿ ಸ್ಪಂದಿಸುತ್ತಿದ್ದಾರೆ ಎಂದರು.

ಗುರುವಾರ ಇಡೀ ಆಸ್ಪತ್ರೆ ಭದ್ರಕೋಟೆಯಂತಾಗಿತ್ತು. ಆಸ್ಪತ್ರೆಗೆ ಭೇಟಿ ನೀಡುವವರಿಗೆ ಮತ್ತು ರೋಗಿಗಳ ಬಂಧುಗಳಿಗೆ ನಿರ್ಬಂಧಿತ ಪ್ರವೇಶವನ್ನು ಕಲ್ಪಿಸಲಾಗಿತ್ತು. ಮಾಧ್ಯಮ ಪ್ರತಿನಿಧಿಗಳಿಗೆ ಆಸ್ಪತ್ರೆಯ ಆವರಣದೊಳಗೆ ಕಾಲಿಡಲೂ ಬಿಡಲಾಗಿರಲಿಲ್ಲ. ಭದ್ರತಾ ಸಿಬ್ಬಂದಿಗಳಿಗೆ ಪುರಸೊತ್ತು ಎನ್ನುವುದೇ ಇರಲಿಲ್ಲ.

ನಾವು ಯಾವುದೇ ಅಪಾಯವನ್ನು ಎದುರು ಹಾಕಿಕೊಳ್ಳಲು ಸಿದ್ಧರಿರಲಿಲ್ಲ. ಅದೊಂದು ಅತ್ಯಂತ ಸಂಕೀರ್ಣ ಶಸ್ತ್ರಚಿಕಿತ್ಸೆಯಾಗಿತ್ತು ಮತ್ತು ನಮ್ಮ ತಂಡವು ಅದಕ್ಕಾಗಿ ಕಳೆದೊಂದು ವರ್ಷದಿಂದಲೂ ಸಿದ್ಧತೆಗಳನ್ನು ನಡೆಸುತ್ತಿತ್ತು ಎಂದು ಪುಟಂಬೇಕರ್ ತಿಳಿಸಿದರು.