ಹೆಣ್ಣು ಮಕ್ಕಳ ಶಿಕ್ಷಣಕ್ಕೆ ಹಿಂದೇಟು ಹಾಕುವ ಪೋಷಕರಿಗೆ ಮೌನೇಶ್ವರಿ ಸ್ಫೂರ್ತಿ

ಸಿಂಧನೂರು, ಮೇ 19: ಮನೆಯಲ್ಲಿ ಕಾಲು ಮುರಿದು ಬಿದ್ದಿರುವ ಬಡತನದ ನಡುವೆಯೂ ಮೌನೇಶ್ವರಿ ಎಂಬ ವಿದ್ಯಾರ್ಥಿನಿ ಶ್ರದ್ಧೆಯಿಂದ ಓದಿ ಶೇ. 92.6 ಫಲಿತಾಂಶದೊಂದಿಗೆ ಪಿಯು ಕಾಲೇಜಿಗೆ ಪ್ರಥಮ ಸ್ಥಾನ ಪಡೆಯುವ ಮೂಲಕ ಸೈ ಎನಿಸಿಕೊಂಡಿದ್ದಾಳೆ.

ಈಗಲೂ ಹಳ್ಳಿಗಳಲ್ಲಿ ಹೆಣ್ಣು ಮಕ್ಕಳಿಗೆ ಶಿಕ್ಷಣ ಕೊಡಿಸಲು ಹಿಂದೇಟು ಹಾಕುವ ಪೋಷಕರಿಗೆ ಈಕೆಯ ಸಾಧನೆ ಸ್ಫೂರ್ತಿದಾಯಕವಾಗಿದೆ. ಮನಸ್ಸಿನಾಳದಲ್ಲಿ ಉನ್ನತ ಶಿಕ್ಷಣ ಪಡೆಯುವ ಆಸೆೆ, ಕನಸಿದ್ದರೂ ಪೋಷಕರ ಒತ್ತಾಯಕ್ಕೆ ಮಣಿದು ಓದು ಅರ್ಧಕ್ಕೆ ಮೊಟಕುಗೊಳಿಸುವ ವಿದ್ಯಾರ್ಥಿನಿಯರಿಗೆ ಅನುಕರಣೀಯಳಾಗಿದ್ದಾಳೆ.

ಸಿಂಧನೂರಿನ ಎಕ್ಸ್‌ಲೆಂಟ್ ಪಿಯು ಕಾಲೇಜಿನ ವಿದಾರ್ಥಿನಿ ಮೌನೇಶ್ವರಿ, ಹಂಚಿನಾಳ ಕ್ಯಾಂಪಿನ ಅಂಜಪ್ಪ ಮತ್ತು ನಾಗಮ್ಮ ದಂಪತಿಯ ಪುತ್ರಿ. ಇಲ್ಲಿನ ಬೆರಳೆಣಿಕೆಯಷ್ಟು ಸಾಕ್ಷರರಲ್ಲಿ ಮೌನೇಶ್ವರಿ  ಕೂಡಾ ಒಬ್ಬಳು. ಅನಕ್ಷರಸ್ಥರಾದ ಅಂಜಪ್ಪ, ತಮ್ಮ ನಾಲ್ಕು ಜನ ಮಕ್ಕಳಿಗೆ ಶಿಕ್ಷಣ ಕೊಡಿಸಲು ಮತ್ತು ಹೊಟ್ಟೆ ತುಂಬಿಸಿಕೊಳ್ಳಲು ನೆಚ್ಚಿದ್ದು ಕೇವಲ ದಿನಗೂಲಿಯನ್ನು ಮಾತ್ರ. ಅಂಗೈಯಗಲದಷ್ಟು ಗುಡಿಸಲು ಮನೆ ಇದೆ. ಸ್ವಂತ ಹೊಲ ಇಲ್ಲ. ಪ್ರತಿವರ್ಷ ಕೆಲಸ ಅರಸಿ ಮಂಗಳೂರು, ಬೆಂಗಳೂರು ಮತ್ತಿತರ ಕಡೆಗಳಲ್ಲಿ ಗೂಳೆ ಹೋಗುವುದು ಇವರಿಗೆ ಅನಿವಾರ್ಯವಾಗಿದೆ.

ಅಂಜಪ್ಪ, ಈತನ ಹೆಂಡತಿ ನಾಗಮ್ಮ ಮತ್ತು ಪ್ರಸಕ್ತ ಸಾಲಿನಲ್ಲಿ ಎಸೆಸೆಲ್ಸಿ ಮುಗಿಸಿರುವ ಇವರ ಕಿರಿಯ ಮಗನ ಜೊತೆ ಮಂಗಳೂರಿನ ಸುರತ್ಕಲ್ ಬಳಿಯ ಕಾಟಿಪಳ್ಳದಲ್ಲಿ ಈಗಲೂ ಕೂಲಿ ಕೆಲಸ ಮಾಡುತ್ತಿದ್ದಾರೆ. ಪ್ರತಿದಿನ ಕೆಲಸ ನೀಡುವ ಧಣಿಗಾಗಿ ಕಾದು ನಿಲ್ಲುತ್ತಾರೆ. ವಾರದಲ್ಲಿ ಎರಡು, ಮೂರು ದಿನಗಳ ಕಾಲ ಇವರಿಗೆ ಕೆಲಸ ದೊರೆಯುತ್ತದೆ. ದಿನದ ಕೂಲಿ ಕುಟುಂಬದ ಹಸಿವು ನೀಗಿಸಲೂ ಸಾಲದಾಗಿದೆ. ಮಗಳ ಸಾಧನೆಗೆ ಹಿರಿಹಿರಿ ಹಿಗ್ಗುವ ಅಂಜಪ್ಪ, ಅವಳ ಮುಂದಿನ ಓದು ನೆನೆದು ಅಸಹಾಯಕತೆಯ ನಿಟ್ಟುಸಿರು ಬಿಡುತ್ತಾರೆ.

ಸಿಂಧನೂರು ತಾಲೂಕಿನ ಹಂಚಿನಾಳ ಯು. ಕ್ಯಾಂಪ್, ಒಂದಿಷ್ಟೂ ಆಧುನಿಕತೆ ಸೋಕದ, ಮೂಲಭೂತ ಸೌಕರ್ಯಗಳಿಂದ ಮಾರು ದೂರವೇ ಉಳಿದಿದೆ. ಇದನ್ನು ಊರು ಎಂದು ಪರಿಗಣಿಸಲಾಗದಷ್ಟು ಕಡಿಮೆ ಸಂಖ್ಯೆಯ ಗುಡಿಸಲು ಮತ್ತು ಮನೆಗಳಿಂದ ಕೂಡಿದೆ. ಈ ಕ್ಯಾಂಪಲ್ಲಿ ಕೇವಲ 5ನೆ ತರಗತಿಯವರೆಗೆ ಶಾಲೆ ಇದ್ದು, ಇಲ್ಲಿನ ವಿದ್ಯಾರ್ಥಿಗಳು ಪಟ್ಟಣದ ಶಾಲೆ, ಕಾಲೇಜುಗಳಿಗೆ ಪ್ರತಿದಿನ 1 ಕಿ.ಮೀ. ನಡೆದುಕೊಂಡು ಹೋಗಬೇಕಾದ ಪರಿಸ್ಥಿತಿ ಇದೆ. ಇಷ್ಟೆಲ್ಲಾ ಸಮಸ್ಯೆಗಳ ಕೇಂದ್ರವಾಗಿರುವ ಊರಿನಲ್ಲಿ, ಮೌನೇಶ್ವರಿ  ಕಲಾ ವಿಭಾಗದಲ್ಲಿ 600ಕ್ಕೆ 555 ಅಂಕ ಪಡೆಯುವ ಮೂಲಕ ಉತ್ತಮ ಸಾಧನೆ ಮಾಡಿದ್ದಾಳೆ.

ಸಹಾಯ ಹಸ್ತ
ಮೌನೇಶ್ವರಿಗೆ ಉನ್ನತ ಶಿಕ್ಷಣ ಪಡೆದು, ಐಎಎಸ್ ಅಧಿಕಾರಿಯಾಗುವ ಕನಸು. ಇವರ ಹತ್ತಿರ ಬಿಡಿಗಾಸೂ ಇಲ್ಲ. ಉಪಜೀವನ ನಡೆಸುವುದೇ ಕಷ್ಟವಾಗಿದೆ. ಅವಳ ಮುಂದಿನ ಓದಿಗೆ ಸಹೃದಯರಲ್ಲಿ ಹಣ ಸಹಾಯ ಯಾಚಿಸಿದ್ದಾಳೆ. ಖಾತೆ ನಂ.:62289809395, ಐಎಫ್‌ಎಸ್ಸಿ ಕೋಡ್- ಚಿ0021214, ಹಂಚಿನಾಳ, ಹಂಪನಾಳ ಪೊಸ್ಟ್, ಸಿಂಧನೂರು ತಾಲೂಕು, ರಾಯಚೂರು ಜಿಲ್ಲೆ. ಹೆಚ್ಚಿನ ಮಾಹಿತಿಗೆ ದೂ. ಸಂ.:8884990630, 9740356420ನ್ನು ಸಂಪರ್ಕಿಸಬಹುದು.

ಆರ್ಥಿಕ ಪರಾವಲಂಬನೆಯೇ ಇಷ್ಟು ಶತಮಾನ ಮಹಿಳೆಯನ್ನು ಸಂಕೋಲೆ ಯಲ್ಲಿಡಲು ಮುಖ್ಯ ಕಾರಣಗಳಲ್ಲಿ ಒಂದಾಗಿದೆ. ಆ ಸಂಕೋಲೆಯಿಂದ ಹೊರ ಬರಲು ಮಹಿಳೆಗೆ ಉನ್ನತ ಶಿಕ್ಷಣ, ಆರ್ಥಿಕ ಸ್ವಾವಲಂಬನೆ ಮತ್ತು ಸಮಾಜದಲ್ಲಿ ಪುರುಷನಿಗೆ ಸರಿ-ಸಮನಾಗಿ ನಿಲ್ಲಲು ಅಧಿಕಾರದ ಆವಶ್ಯಕತೆಯಿದೆ. ನನ್ನ ಮುಂದಿನ ಓದಿಗೆ ಸಹೃದಯರು ಸಹಾಯ ಹಸ್ತ ನೀಡಿದರೆ, ಐಎಎಸ್ ಅಧಿಕಾರಿಯಾಗುವ ನನ್ನ ಕನಸನ್ನು ನನಸಾಗಿಲು ಶ್ರದ್ಧೆಯಿಂದ ಓದುವೆ.

ಮೌನೇಶ್ವರಿ, ವಿದ್ಯಾರ್ಥಿನಿ