ದಂಗೆಪೀಡಿತ ಸಹರಾನ್ಪುರದಲ್ಲಿ ಬೌದ್ಧಧರ್ಮಕ್ಕೆ ಮತಾಂತರಗೊಂಡ 180 ದಲಿತ ಕುಟುಂಬಗಳು
.jpg "ದಂಗೆಪೀಡಿತ ಸಹರಾನ್ಪುರದಲ್ಲಿ ಬೌದ್ಧಧರ್ಮಕ್ಕೆ ಮತಾಂತರಗೊಂಡ 180 ದಲಿತ ಕುಟುಂಬಗಳು")
ಮೀರತ್,ಮೇ 20: ಕಳೆದ ತಿಂಗಳು ಸಹರಾನ್ಪುರದಲ್ಲಿ ಹಿಂಸಾಚಾರದ ಘಟನೆಗಳು ನಡೆದ ಬಳಿಕ ತಮ್ಮ ಸಮುದಾಯವನ್ನು ಮತ್ತು ಭೀಮ್ ಸೇನೆಯನ್ನು ಅನ್ಯಾಯವಾಗಿ ಗುರಿಯಾಗಿಸಿಕೊಂಡು ದೌರ್ಜನ್ಯವೆಸಗುತ್ತಿರುವುದನ್ನು ಪ್ರತಿಭಟಿಸಿ ಸಹರಾನ್ಪುರ ಜಿಲ್ಲೆಯ ಮೂರು ಗ್ರಾಮಗಳ ಸುಮಾರು 180 ದಲಿತ ಕುಟುಂಬಗಳು ಬೌದ್ಧಧರ್ಮಕ್ಕೆ ಮತಾಂತರಗೊಂಡಿವೆ.
ಶಬ್ಬೀರ್ಪುರದಲ್ಲಿ ಠಾಕೂರ್ಗಳು ದಲಿತ ಸಮುದಾಯಕ್ಕೆ ಸೇರಿದ 60 ಕುಟುಂಬ ಗಳನ್ನು ಸುಟ್ಟುಹಾಕಿದ್ದರು. ಅಂದಿನಿಂದಲೂ ತಾವು ಭಯದಲ್ಲಿ ಬದುಕುತ್ತಿದ್ದಾಗಿ ಗ್ರಾಮದ ದಲಿತ ನಿವಾಸಿಗಳು ಹೇಳಿದ್ದಾರೆ.
ಪೊಲೀಸರು ಮತ್ತು ಠಾಕೂರ್ಗಳು ಪರಸ್ಪರ ಶಾಮೀಲಾಗಿದ್ದಾರೆ. ನಾವು ಊರನ್ನೇ ಬಿಟ್ಟು ಪರಾರಿಯಾಗಲು ಬಯಸಿದ್ದೆವು. ಮತಾಂತರವು ನಮಗೆ ಕೊಂಚ ಬಲ ನೀಡಲಿದೆ ಎಂದು ನಾವು ಆಶಿಸಿದ್ದೇವೆ ಎಂದು ಶಬ್ಬೀರ್ಪುರದ ದಲಿತ ನಿವಾಸಿಯೋರ್ವ ಹೇಳಿದ.
ಇತ್ತೀಚಿನ ದಿನಗಳಲ್ಲಿ ದಲಿತರನ್ನು ಗುರಿಯಾಗಿಸಿಕೊಂಡಿದ್ದ ಹಲವಾರು ಹಿಂಸಾಚಾರದ ಘಟನೆಗಳಿಗೆ ಸಹರಾನ್ಪುರ ಸಾಕ್ಷಿಯಾಗಿದೆ. ಸಡಕ್ ದೂಧ್ಲಿ ಗ್ರಾಮದಲ್ಲಿ ಅಂಬೇಡ್ಕರ್ ಜಯಂತಿ ಮೆರವಣಿಗೆ ಸಂದರ್ಭ ದಲಿತರು ಮತ್ತು ಮೇಲ್ಜಾತಿಗಳ ನಡುವೆ ಘರ್ಷಣೆಗಳು ನಡೆದಿದ್ದರೆ, ಶಬ್ಬೀರ್ಪುರ ಗ್ರಾಮದಲ್ಲಿ ಠಾಕೂರ್ಗಳು ಮಹಾರಾಣಾ ಪ್ರತಾಪರ ಉತ್ಸವದ ಅಂಗವಾಗಿ ನಡೆಸಿದ್ದ ಮೆರವಣಿಗೆ ಸಂದರ್ಭ ಹಿಂಸಾಚಾರ ನಡೆದು ಠಾಕೂರ್ ಸಮುದಾಯಕ್ಕೆ ಸೇರಿದ ಓರ್ವ ವ್ಯಕ್ತಿ ಮೃತಪಟ್ಟು, ಉಭಯ ಸಮುದಾಯಗಳ ಹಲವಾರು ಜನರು ಗಾಯಗೊಂಡಿದ್ದರು. ಇನ್ನೊಂದು ಪ್ರಕರಣದಲ್ಲಿ ಭೀಮ್ ಸೇನೆಯ ನೇತೃತ್ವದಲ್ಲಿ ‘ಮಹಾ ಪಂಚಾಯತ್’ ನಡೆಸಲು ತೆರಳುತ್ತಿದ್ದ ದಲಿತರನ್ನು ಪೊಲೀಸರು ತಡೆದಾಗ ಕಲ್ಲು ತೂರಾಟ ಮತ್ತು ಬೆಂಕಿ ಹಚ್ಚುವಿಕೆ ಕೃತ್ಯಗಳು ನಡೆದು,ಮೂವರು ಪೊಲೀಸರು ಗಾಯಗೊಂಡಿದ್ದರು. ಆಗಿನಿಂದಲೂ ಭೀಮ ಸೇನೆಯ ಕಾರ್ಯಕರ್ತರು ತಲೆಮರೆಸಿ ಕೊಂಡಿದ್ದು, ಅವರ ವಿರುದ್ಧ ಹಲವಾರು ಎಫ್ಐಆರ್ಗಳು ದಾಖಲಾಗಿವೆ.
ಪ್ರತಿಯೊಬ್ಬರೂ ದಲಿತರು ಮತ್ತು ಭೀಮ್ ಸೇನೆಯನ್ನು ಗುರಿಯಾಗಿಸಿಕೊಳ್ಳುತ್ತಿದ್ದಾರೆ. ನಿಜ ಹೇಳಬೇಕೆಂದರೆ ದಲಿತರ ಮೇಲಿನ ದಾಳಿಗಳು ಪೂರ್ವ ಯೋಜಿತವಾಗಿದ್ದವು. ಪುರುಷರು ಹೊಲಗದ್ದೆಗಳಿಗೆ ತೆರಳಿದ್ದಾಗ ಗ್ರಾಮಗಳ ಮೇಲೆ ದಾಳಿಗಳು ನಡೆದಿವೆ. ಮಹಿಳೆಯರನ್ನು ಥಳಿಸಲಾಗಿದೆ. ಓರ್ವ ಮಹಿಳೆಯ ಕೈಯನ್ನು ತಲವಾರಿನಿಂದ ಕಡಿಯಲಾಗಿದೆ. ಆದರೆ ಆ ಬಗ್ಗೆ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ಬದಲಿಗೆ ಅವರು ದುರ್ಬಲ ದಲಿತರ ಪರ ಶ್ರಮಿಸುತ್ತಿರುವ ಭೀಮ್ ಸೇನೆಯನ್ನು ಗುರಿಯಾಗಿಸಿ ಕೊಂಡಿದ್ದಾರೆ. ಅವರು ನಮ್ಮನ್ನು ನಕ್ಸಲರೆಂದು ಕರೆಯುತ್ತಿದ್ದಾರೆ,14 ವರ್ಷಗಳ ದಲಿತ ಬಾಲಕರನ್ನೂ ಕಂಬಿಗಳ ಹಿಂದೆ ತಳ್ಳುತ್ತಿದ್ದಾರೆ ಎಂದು ಭೀಮ್ ಸೇನೆಯ ರಾಷ್ಟ್ರೀಯ ಅಧ್ಯಕ್ಷ ವಿನಯ ರತನ್ ಸಿಂಗ್ ಅವರು ಅಜ್ಞಾತ ಸ್ಥಳವೊಂದರಿಂದ ದೂರವಾಣಿಯಲ್ಲಿ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
ಈ ಮತಾಂತರವು ಆರಂಭವಷ್ಟೇ. ಈಗ ಇನ್ನಷ್ಟು ದಲಿತರು ಬೌದ್ಧಧರ್ಮಕ್ಕೆ ಮತಾಂತರಗೊಳ್ಳಲಿದ್ದಾರೆ. ಹಿಂದು ಧರ್ಮದಲ್ಲಿ ನಮ್ಮನ್ನೂ ಮನುಷ್ಯರೆಂದು ಪರಿಗಣಿಸ ದಿದ್ದರೆ ನಾವು ಮೂಕಪ್ರೇಕ್ಷಕರಾಗುಳಿಯುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಆದರೆ ಮತಾಂತರವನ್ನು ಸಹರಾನ್ಪುರ ಪೊಲೀಸರು ಗಂಭೀರವಾಗಿ ಪರಿಗಣಿಸಿಲ್ಲ. ಬೌದ್ಧಧರ್ಮವೂ ಹಿಂದುತ್ವದ ಒಂದು ಕವಲು ಎನ್ನುತ್ತಾರೆ ಅವರು.
ದಲಿತರ ಮತಾಂತರದಿಂದ ತನಗೆ ಅಚ್ಚರಿಯಾಗಿಲ್ಲ. ಜನರು ದಮನಿಸಲ್ಪಟ್ಟಾಗ ಪ್ರತಿಕ್ರಿಯೆ ಸಹಜವೇ ಆಗಿದೆ. 2014ರಿಂದೀಚಿಗೆ ಸಮಾಜದಲ್ಲಿ ದಲಿತ ವಿರೋಧಿ ಭಾವನೆ ಹೆಚ್ಚುತ್ತಿದೆ ಎಂದು ದಲಿತ ಚಿಂತಕ-ಲೇಖಕ ಚಂದ್ರಭಾನ್ ಪ್ರಸಾದ್ ಹೇಳಿದರು.
