500 ರೂ.ನೋಟಿನಿಂದ ವಿದ್ಯುತ್ ಉತ್ಪಾದಿಸುವ ಒಡಿಶಾದ ವಿದ್ಯಾರ್ಥಿ
ಭುವನೇಶ್ವರ,ಮೇ 22: ಒಡಿಶಾದ ನೌಪಾಡಾದ 17ರ ಹರೆಯದ ವಿಜ್ಞಾನ ವಿಭಾಗದ ವಿದ್ಯಾರ್ಥಿಯೋರ್ವ ರದ್ದುಗೊಂಡಿರುವ 500 ರೂ.ನೋಟಿನಿಂದ ವಿದ್ಯುತ್ ಉತ್ಪಾದಿ ಸುವ ತಂತ್ರಜ್ಞಾನವನ್ನು ಆವಿಷ್ಕರಿಸಿದ್ದಾನೆ. ಈತನ ನೂತನ ಆವಿಷ್ಕಾರವು ಈಗ ರಾಷ್ಟ್ರಮಟ್ಟದಲ್ಲಿ ಗಮನವನ್ನು ಸೆಳೆದಿದ್ದು, ಈ ಯೋಜನೆಗೆ ಸಂಬಂಧಿಸಿದಂತೆ ವರದಿ ಯೊಂದನ್ನು ಸಲ್ಲಿಸುವಂತೆ ಖುದ್ದು ಪ್ರಧಾನಿ ಕಚೇರಿಯೇ ರಾಜ್ಯ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಗೆ ನಿರ್ದೇಶ ನೀಡಿದೆ.
500 ರೂ.ಗಳ ಒಂದು ನೋಟಿನಿಂದ ಐದು ವೋಲ್ಟ್ಗಳವರೆಗೆ ವಿದ್ಯುತ್ನ್ನು ತಾನು ಉತ್ಪಾದಿಸಬಲ್ಲೆ ಎಂದು ಖಾರಿಯಾರ್ ಕಾಲೇಜಿನ ವಿದ್ಯಾರ್ಥಿಯಾಗಿರುವ ಲಚ್ಮನ್ ದುಂಡಿ ಹೇಳಿದ್ದಾನೆ. ಶಕ್ತಿಯ ಉತ್ಪಾದನೆಗೆ ನೋಟಿನ ಮೇಲಿನ ಸಿಲಿಕಾನ್ ಕೋಟಿಂಗ್ ಬಳಸಿದ್ದೇನೆ. ಕೋಟಿಂಗ್ ಸ್ಪಷ್ಟವಾಗಿ ಕಾಣಿಸಲು ನೋಟನ್ನು ಹರಿದು ಬಳಿಕ ನೇರ ಬಿಸಿಲಿಗೆ ಒಡ್ಡಿದ್ದೆ. ಸಿಲಿಕಾನ್ ಪ್ಲೇಟ್ನ್ನು ವಿದ್ಯುತ್ ತಂತಿಯ ಮೂಲಕ ಪರಿವರ್ತಕಕ್ಕೆ ಜೋಡಿಸುವುದರಿಂದ ವಿದ್ಯುತ್ ಉತ್ಪಾದನೆಗೆ ನೆರವಾಗುತ್ತದೆ ಎಂದು ದುಂಡಿ ವಿವರಿಸಿದ.
ದುಂಡಿಯ ಹೇಳಿಕೆಯನ್ನು ಪರಿಶೀಲಿಸುವಂತೆ ಪ್ರಧಾನಿ ಕಚೇರಿಯು ಎ.12ರಂದು ರಾಜ್ಯ ಸರಕಾರಕ್ಕೆ ಪತ್ರ ಬರೆದಿತ್ತು. ಈ ಯೋಜನೆಯ ಬಗ್ಗೆ ಅಧ್ಯಯನ ನಡೆಸುವಂತೆ ಮತ್ತು ಪ್ರಧಾನಿ ಕಚೇರಿಗೆ ವರದಿಯನ್ನು ಸಲ್ಲಿಸುವಂತೆ ಒಡಿಶಾ ಸರಕಾರವು ಮೇ.17 ರಂದು ಸಂಬಂಧಿಸಿದ ಇಲಾಖೆಯನ್ನು ಆದೇಶಿಸಿದೆ.
ಸಿಲಿಕಾನ್ ಪ್ಲೇಟ್ನಿಂದ ವಿದ್ಯುತ್ನ್ನು ಸಂಗ್ರಹಿಬಲ್ಲ ಪರಿವರ್ತಕವೊಂದನ್ನು ನಾನು ಅಭಿವೃದ್ಧಿಗೊಳಿಸಿದ್ದೇನೆ. ನನ್ನ ಆವಿಷ್ಕಾರವನ್ನು ಪ್ರಧಾನಿ ಕಚೇರಿಯು ಮೆಚ್ಚಿಕೊಂಡರೆ ಅದು ನನ್ನ ಪಾಲಿಗೆ ಹೆಮ್ಮೆಯ ಘಳಿಗೆಯಾಗಲಿದೆ ಎಂದೂ ದುಂಡಿ ಹೇಳಿದ.
ನೋಟು ರದ್ದತಿಯ ಬಳಿಕ ಹಳೆಯ ನೋಟುಗಳನ್ನು ಬಳಸಿಕೊಳ್ಳಬಹುದಾದ ಅತ್ಯುತ್ತಮ ವಿಧಾನವನ್ನು ಕಂಡು ಹಿಡಿಯಲು ತಾನು ಪ್ರಯತ್ನಿಸಿದ್ದೆ ಮತ್ತು ಅದರಲ್ಲಿ ಯಶಸ್ವಿಯಾಗಿದ್ದೇನೆ. ಕೇವಲ 15 ದಿನಗಳಲ್ಲಿ ಈ ಯೋಜನೆಯ ರೂಪುರೇಷೆಯನ್ನು ತಾನು ನಿರ್ಧರಿಸಿದ್ದೆ ಎನ್ನುವ ದುಂಡಿ, ತನ್ನ ಈ ಯೋಜನೆಯನ್ನು ಈವರೆಗೆ ತನ್ನ ಕಾಲೇಜಿನಲ್ಲಿ ಮಾತ್ರ ಪ್ರದರ್ಶಿಸಿದ್ದಾನೆ. ಆದರೆ ಯಾರೂ ಅದನ್ನು ಗಂಭೀರವಾಗಿ ಪರಿಗಣಿಸದಿದ್ದಾಗ ಪ್ರಧಾನಿ ಮತ್ತು ಮುಖ್ಯಮಂತ್ರಿಗಳಿಗೆ ಪತ್ರಗಳನ್ನು ಬರೆದಿದ್ದ. ದುಂಡಿ ವಿದ್ಯಾರ್ಜನೆಯ ಜೊತೆಗೆ ಹೊಟ್ಟೆಪಾಡಿಗಾಗಿ ಬಲ್ಬ್ಗಳನ್ನು ತಯಾರಿಸಿ ಮಾರಾಟ ಮಾಡುತ್ತಿದ್ದಾನೆ.
