ಕುಲಭೂಷಣ್ ಜಾಧವ್ ಪ್ರಕರಣ : ತ್ವರಿತ ವಿಚಾರಣೆ ಕೋರಿ ಐಸಿಜೆಗೆ ಪಾಕ್ ಮನವಿ
ಇಸ್ಲಾಮಾಬಾದ್, ಮೇ 23: ಭಾರತೀಯ ಪ್ರಜೆ ಕುಲಭೂಷಣ್ ಜಾಧವ್ ಪ್ರಕರಣದ ವಿಚಾರಣೆಯನ್ನು ತ್ವರಿತವಾಗಿ ನಡೆಸುವಂತೆ ಪಾಕಿಸ್ತಾನ ಅಂತಾರಾಷ್ಟ್ರೀಯ ನ್ಯಾಯಾಲಯ (ಐಸಿಜೆ)ವನ್ನು ಕೋರಿದೆ ಎಂದು ಮಾಧ್ಯಮ ವರದಿಯೊಂದು ಮಂಗಳವಾರ ಹೇಳಿದೆ.
ಜಾಧವ್ ವಿರುದ್ಧ ಪಾಕಿಸ್ತಾನ ಬೇಹುಗಾರಿಕೆ ನಡೆಸಿದ ಆರೋಪವನ್ನು ಹೊರಿಸಿದ್ದು, ಆ ದೇಶದ ಸೇನಾ ನ್ಯಾಯಾಲಯವು ಇತ್ತೀಚೆಗೆ ಮರಣ ದಂಡನೆ ವಿಧಿಸಿರುವುದನ್ನು ಸ್ಮರಿಸಬಹುದಾಗಿದೆ.
ಪ್ರಕರಣದ ವಿಚಾರಣೆಯನ್ನು ತ್ವರಿತವಾಗಿ, ಅದರಲ್ಲೂ ಮುಖ್ಯವಾಗಿ ಮುಂದಿನ ಕೆಲವು ವಾರಗಳಲ್ಲಿ ಮುಗಿಸುವಂತೆ ಕೋರುವ ಪತ್ರವೊಂದನ್ನು ಪಾಕಿಸ್ತಾನದ ವಿದೇಶ ಕಚೇರಿಯು ನೆದರ್ಲ್ಯಾಂಡ್ಸ್ ದೇಶದ ಹೇಗ್ನಲ್ಲಿರುವ ಅಂತಾರಾಷ್ಟ್ರೀಯ ನ್ಯಾಯಾಲಯದ ರಿಜಿಸ್ಟ್ರಾರ್ಗೆ ಕಳುಹಿಸಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ‘ದಿ ಎಕ್ಸ್ಪ್ರೆಸ್ ಟ್ರಿಬ್ಯೂನ್’ ವರದಿ ಮಾಡಿದೆ.
ಅಂತಾರಾಷ್ಟ್ರೀಯ ನ್ಯಾಯಾಲಯದ ನ್ಯಾಯಾಧೀಶರ ಚುನಾವಣೆ ನವೆಂಬರ್ನಲ್ಲಿ ನಡೆಯಲಿರುವ ಹಿನ್ನೆಲೆಯಲ್ಲಿ, ಪಾಕಿಸ್ತಾನ ಈ ಮನವಿಯನ್ನು ಮಾಡಿದೆ ಎನ್ನಲಾಗಿದೆ.
ಜಾಧವ್ ಪ್ರಕರಣದ ವಿಚಾರಣೆಯನ್ನು ಐಸಿಜೆ ಅಕ್ಟೋಬರ್ನಲ್ಲಿ ಮುಂದುವರಿಸಬಹುದಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.
‘‘ಆದರೆ, ವಿಚಾರಣೆಯು ಮುಂದಿನ ಆರು ತಿಂಗಳಲ್ಲಿ ನಡೆಯಬೇಕೆಂದು ಸರಕಾರ ಬಯಸುತ್ತದೆ’’ ಎಂದರು.
ಜಾಧವ್ಗೆ ನೀಡಲಾಗಿರುವ ಗಲ್ಲು ಶಿಕ್ಷೆಯನ್ನು ಜಾರಿಗೊಳಿಸದಂತೆ ಹಾಗೂ ಅವರಿಗೆ ರಾಜತಾಂತ್ರಿಕ ನೆರವು ಪಡೆಯಲು ಅವಕಾಶ ನೀಡುವಂತೆ ಇತ್ತೀಚೆಗೆ ಅಂತಾರಾಷ್ಟ್ರೀಯ ನ್ಯಾಯಾಲಯ ತೀರ್ಪು ನೀಡಿರುವುದನ್ನು ಸ್ಮರಿಸಬಹುದಾಗಿದೆ.
ನಿವೃತ್ತ ಸಿಆರ್ಪಿಎಫ್ ಅಧಿಕಾರಿಗೆ ಕೆನಡ ಪ್ರವೇಶ ನಿರಾಕರಣೆ
‘ಭಯೋತ್ಪಾದನೆ, ವ್ಯವಸ್ಥಿತ ಅಥವಾ ಸಾರಾಸಗಟು ಮಾನವಹಕ್ಕು ಉಲ್ಲಂಘನೆ ಅಥವಾ ಜನಾಂಗ ಹತ್ಯೆ’ಯಲ್ಲಿ ತೊಡಗಿದ ಸರಕಾರವೊಂದರಲ್ಲಿ ಈ ವ್ಯಕ್ತಿ ಸೇವೆ ಸಲ್ಲಿಸಿದ್ದರು ಎಂದು ವಿವರಣೆ ನೀಡಿದ ಅಧಿಕಾರಿಗಳು!
ಒಟ್ಟಾವ (ಕೆನಡ), ಮೇ 23: ಭಾರತದ ಹಿರಿಯ ನಿವೃತ್ತ ಸಿಆರ್ಪಿಎಫ್ ಅಧಿಕಾರಿಯೊಬ್ಬರಿಗೆ ಕೆನಡದ ವ್ಯಾಂಕೂವರ್ ವಿಮಾನ ನಿಲ್ದಾಣದಲ್ಲಿ ಪ್ರವೇಶ ನಿರಾಕರಿಸಿದ ಘಟನೆ ಕಳೆದ ವಾರ ನಡೆದಿದೆ.
‘‘ಭಯೋತ್ಪಾದನೆ, ವ್ಯವಸ್ಥಿತ ಅಥವಾ ಸಾರಾಸಗಟು ಮಾನವಹಕ್ಕು ಉಲ್ಲಂಘನೆ ಅಥವಾ ಜನಾಂಗ ಹತ್ಯೆ’ಯಲ್ಲಿ ತೊಡಗಿದ ಸರಕಾರವೊಂದರಲ್ಲಿ ಈ ವ್ಯಕ್ತಿ ಸೇವೆ ಸಲ್ಲಿಸಿದ್ದರು ಎಂಬ ಕಾರಣಕ್ಕಾಗಿ ವಲಸೆ ಅಧಿಕಾರಿಗಳು ಈ ನಿರ್ಧಾರ ತೆಗೆದುಕೊಂಡರು ಎನ್ನಲಾಗಿದೆ.
ಸೆಂಟ್ರಲ್ ರಿಸರ್ವ್ ಪೊಲೀಸ್ ಪಡೆಯಿಂದ 2010ರಲ್ಲಿ ಇನ್ಸ್ಪೆಕ್ಟರ್ ಜನರಲ್ ಆಫ್ ಪೊಲೀಸ್ ದರ್ಜೆಯೊಂದಿಗೆ ನಿವೃತ್ತಿಗೊಂಡ ತೇಜಿಂದರ್ ಸಿಂಗ್ ಧಿಲ್ಲೋನ್ ಪ್ರವೇಶ ನಿಷೇಧವನ್ನು ಎದುರಿಸಿದವರು. ಕೆನಡದ ವಲಸೆ ಮತ್ತು ನಿರಾಶ್ರಿತರ ರಕ್ಷಣಾ ಕಾಯ್ದೆಯ ಉಪ ಪರಿಚ್ಛೇದವೊಂದರ ಅಡಿಯಲ್ಲಿ ಧಿಲ್ಲೋನ್ಗೆ ಕೆನಡ ಪ್ರವೇಶ ನಿಷೇಧಿಸಲಾಗಿದೆ.
ವಿಮಾನ ನಿಲ್ದಾಣದಲ್ಲಿ ಧಿಲ್ಲೋನ್ಗೆ ದಾಖಲೆಯೊಂದನ್ನು ನೀಡಲಾಯಿತು. ‘‘ಭಯೋತ್ಪಾದನೆ, ವ್ಯವಸ್ಥಿತ ಅಥವಾ ಸಾರಾಸಗಟು ಮಾನವಹಕ್ಕುಗಳ ಉಲ್ಲಂಘನೆ, ಅಥವಾ ಜನಾಂಗ ಹತ್ಯೆ, ಯುದ್ಧಾಪರಾಧ ಅಥವಾ ಮಾನವತೆಯ ವಿರುದ್ಧದ ಅಪರಾಧ’’ದಲ್ಲಿ ತೊಡಗಿದ ಸರಕಾರವೊಂದರ ಸೇವೆಯಲ್ಲಿ ನೀವು ಹಿರಿಯ ಅಧಿಕಾರಿಯಾಗಿದ್ದಿರಿ’’ ಎಂದು ಆ ದಾಖಲೆ ಹೇಳುತ್ತದೆ.
ವ್ಯಾಂಕೂವರ್ ವಿಮಾನ ನಿಲ್ದಾಣದಲ್ಲಿ ವಲಸೆ ಅಧಿಕಾರಿಗಳು ಹೊರಡಿಸಿದ ಎರಡನೆ ವರದಿಯಲ್ಲಿ ಮೇಲೆ ವಿವರಿಸಿದ ರೀತಿಯಲ್ಲಿನ ಭಾರತದ ಬಣ್ಣನೆಯನ್ನು ಕೈಬಿಡಲಾಗಿದೆ. ಆದಾಗ್ಯೂ, ನೀವು ಸಿಆರ್ಪಿಎಫ್ನಲ್ಲಿ ಸೇವೆ ಸಲ್ಲಿಸಿರುವುದರಿಂದ ಕೆನಡಕ್ಕೆ ನಿಮಗೆ ಪ್ರವೇಶ ನೀಡಲು ಸಾಧ್ಯವಿಲ್ಲ ಎಂದು ಅಧಿಕಾರಿಗಳು ಪಟ್ಟುಹಿಡಿದರು ಎನ್ನಲಾಗಿದೆ.
ಹಿಂಸೆ, ಸ್ವೇಚ್ಛಾಚಾರದ ಬಂಧನ, ಕೊಲೆ ಮತ್ತು ಲೈಂಗಿಕ ಆಕ್ರಮಣದಂಥ ವ್ಯವಸ್ಥಿತ ಮಾನವಹಕ್ಕು ಉಲ್ಲಂಘನೆಯಲ್ಲಿ ತೊಡಗಿದ ಸಿಆರ್ಪಿಎಫ್ನಲ್ಲಿ ಸೇವೆ ಸಲ್ಲಿಸಿರುವುದೇ ಇದಕ್ಕೆ ಕಾರಣ ಎಂದು ಅವರಿಗೆ ತಿಳಿಸಲಾಯಿತು.
ಬಳಿಕ ಅವರು ಲುಧಿಯಾನಕ್ಕೆ ಹಿಂದಿರುಗಿದರು.
