ತೆರೆಮೇಲೆ ಬರಲಿದ್ದಾರೆ ಮನಮೋಹನ್ ಸಿಂಗ್!

ಹೊಸದಿಲ್ಲಿ, ಜೂ.7: ಕೆಲವು ದಿನಗಳ ಹಿಂದೆ ಬಿಡುಗಡೆಯಾದ ಕ್ರಿಕೆಟಿಗ ಸಚಿನ್ ಅವರ ಬಯೋಗ್ರಾಫಿ ಬಾಲಿವುಡ್ ನಲ್ಲಿ ಕುತೂಹಲದ ಕೇಂದ್ರಬಿಂದುವಾಗಿತ್ತು. ಅದಾದ ನಂತರ ಸಿಂಧೂ, ಸೈನಾ ಸೇರಿದಂತೆ ಹಲವರ ಬದುಕಿನ ಚಿತ್ರಣವನ್ನು ಒಳಗೊಂಡ ಸಿನೆಮಾ ಮಾಡುವ ಪ್ರಯತ್ನದ ಸುದ್ದಿಯೂ ಹರಿದಾಡತೊಡಗಿತು. ಇದೀಗ ಮಾಜಿ ಪ್ರಧಾನಿ ಡಾ.ಮನ ಮೋಹನ್  ಸಿಂಗ್ ಕುರಿತ ಚಿತ್ರವೂ ನಿರ್ಮಾಣವಾಗುತ್ತಿದೆ ಎನ್ನುವ ಸುದ್ದಿಯೊಂದು ಹೊರಬಿದ್ದಿದೆ.

'ದಿ ಆಕ್ಸಿಡೆಂಟಲ್ ಪ್ರೈಮ್ ಮಿನಿಸ್ಟರ್' ಹೆಸರಿನಲ್ಲಿ ಈ ಚಿತ್ರ ತೆರೆಕಾಣಲಿದೆ. ಬನ್ಸಾಲ್ ಮೆಹ್ತಾ  ಚಿತ್ರಕಥೆ ಬರೆದಿದ್ದು  ಸಿನಿಮಾಗೆ ವಿಜಯ್ ರತ್ನಾಕರ್ ಅವರು ಆಕ್ಷನ್ ಕಟ್ ಹೇಳಲಿದ್ದಾರೆ. 

ಮನಮೋಹನ್ ಸಿಂಗ್ ಯುಪಿಎ ಆಡಳಿತವಿದ್ದ  ಎರಡೂ ಅವಧಿಯ ಸರಕಾರಗಳನ್ನು   ಯಶಸ್ವಿಯಾಗಿ  ಮುನ್ನಡೆಸಿದವರು. ಸೌಮ್ಯ ಸ್ವಭಾದ ಈ ನಾಯಕ ಒಂದು ಕಾಲದಲ್ಲಿ ರಿಸರ್ವ್ ಬ್ಯಾಂಕ್  ಅಧಿಕಾರಿಯಾಗಿದ್ದವರು. ಮನಮೋಹನ್ ಸಿಂಗ್ ಅವರ ಸಲಹೆಗಾರರಾಗಿದ್ದ ಸಂಜಯ್ ಬರೋ 'ದಿ ಅಕ್ಸಿಡೆಂಟಲ್ ಪ್ರೈಮ್ ಮಿನಿಸ್ಟರ್' ಎಂಬ ಕೃತಿಯನ್ನು ಬರೆದಿದ್ದರು. ಆ ಕೃತಿಯೇ ಇದೀಗ  ಸಿನಿಮಾವಾಗುತ್ತಿದೆ.

ಮನಮೋಹನ್ ಸಿಂಗ್ ಪಾತ್ರವನ್ನು ಹಿರಿಯ ನಟ ಅನುಪಮ್ ಖೇರ್ ಅವರು ನಿರ್ವಹಿಸಲಿದ್ದಾರೆ.  ಈ ಚಿತ್ರದ ಬಗ್ಗೆ ಕೆಲವು ದಿನಗಳಿಂದ  ಸುದ್ದಿ ಹರಿದಾಡುತ್ತಿದ್ದಾರೂ ಇದೀಗ ಆ ಚಿತ್ರದ ಫಸ್ಟ್ ಪೋಸ್ಟರ್ ಆ ಸುದ್ದಿಯನ್ನು ಧೃಡಪಡಿಸಿದೆ.  ಈ ಚಿತ್ರ ಇನ್ನೆರಡು ವರ್ಷಗಳಲ್ಲಿ ಶೂಟಿಂಗ್ ಪೂರ್ಣಗೊಳಿಸಿ 2019ರಲ್ಲಿ ತೆರೆಗೆ ಬರಲಿದೆ ಎಂದು ಮೆಹ್ತಾ ಹೇಳಿದ್ದಾರೆ.