ಉಚಿತ ಎಟಿಎಂ ವಿದ್‌ಡ್ರಾಗೆ ಎಸ್‌ಬಿಐ ಅಂಕುಶ; ಡೆಬಿಟ್ ಕಾರ್ಡ್ ಹಾಗೂ ಚೆಕ್‌ಗೆ ಶುಲ್ಕ ಜಾರಿ

    ಹೊಸದಿಲ್ಲಿ, ಜೂ.9: ಎಟಿಎಂನಿಂದ ಹಣ ಹಿಂತೆಗೆತ, ನಗದು ವಹಿವಾಟು, ಚೆಕ್ ಪುಸ್ತಕಗಳ ನೀಡಿಕೆ, ಹಾಳಾದ ನೋಟುಗಳ ವಿನಿಮಯ ಹಾಗೂ ಐಎಂಪಿಎಸ್ ಸೇವೆಯ ಮೂಲಕ ನಿಧಿಗಳ ಆನ್‌ಲೈನ್ ವರ್ಗಾವಣೆಯ ಶುಲ್ಕಗಳನ್ನು ಭಾರತೀಯ ಸ್ಟೇಟ್‌ಬ್ಯಾಂಕ್ (ಎಸ್‌ಬಿಐ) ಜೂನ್ 1ರಿಂದ ಪರಿಷ್ಕರಿಸಿದೆ. ತನ್ನ ಮೊಬೈಲ್ ವಾಲೆಟ್ ಸೇವೆ /ಯಾದ ‘ಸ್ಟೇಟ್‌ಬ್ಯಾಂಕ್ ಬಡಿ’ ಯ ಗ್ರಾಹಕರಿಗೆ ಅವರ ಪ್ರತಿ ಎಟಿಎಂ ಹಣ ಹಿಂತೆಗೆತಕ್ಕೆ 25 ರೂ. ಶುಲ್ಕ ವಿಧಿಸಲಿದೆ.. ಆದಾಗ್ಯೂ ಉಳಿತಾಯ ಬ್ಯಾಂಕ್ ಖಾತೆಗಳ ಗ್ರಾಹಕರು ಮೆಟ್ರೋ ನಗರಗಳಲ್ಲಿ ಎಂಟು ಬಾರಿ (ಎಸ್‌ಬಿಐ ಎಟಿಎಂಗಳಲ್ಲಿ 5 ಬಾರಿ ಹಾಗೂ ಇತರ ಬ್ಯಾಂಕ್‌ಗಳಲ್ಲಿ ಮೂರು ಬಾರಿ) ಹಾಗೂ ಇತರ ನಗರಗಳಲ್ಲಿ 10 ಎಟಿಎಂನಿಂದ ಹಣವನ್ನು ಉಚಿತವಾಗಿ ವಿದ್‌ಡ್ರಾ ಮಾಡಬಹುದಾಗಿದೆಯೆಂದು ಸ್ಟೇಟ್‌ಬ್ಯಾಂಕ್‌ನ ಪ್ರಕಟಣೆ ತಿಳಿಸಿದೆ.

   ಬೇಸಿಕ್ ಉಳಿತಾಯ ಠೇವಣಿ ಖಾತೆಯ ಗ್ರಾಹಕರಿಗೆ ಮಾತ್ರವೇ ತಿಂಗಳಿಗೆ ನಾಲ್ಕು ಬಾರಿ ಎಟಿಎಂ ವಿತ್‌ಡ್ರಾ ಮಿತಿಯನ್ನು ನಿಗದಿಪಡಿಸಲಾಗಿದೆಯೆಂದು ಎಂದು ಬ್ಯಾಂಕ್‌ನ ಪ್ರಕಟಣೆ ತಿಳಿಸಿದೆ. ಸಮಾಜದ ಬಡವರ್ಗಗಳ ಜನತೆಯಲ್ಲಿ ಉಳಿತಾಯ ಮನೋಭಾವನೆಯನ್ನು ಉತ್ತೇಜಿಸುವ ಉದ್ದೇಶದಿಂದ ಬೇಸಿಕ್ ಉಳಿತಾಯ ಬ್ಯಾಂಕ್ ಠೇವಣಿ ಖಾತೆಯನ್ನು ಆರಂಭಿಸಲಾಗಿತ್ತು. ಈ ವಿಧದ ಬ್ಯಾಂಕ್ ಖಾತೆಯಲ್ಲಿ ಎಟಿಎಂ ಹಾಗೂ ಡೆಬಿಟ್ ಕಾರ್ಡ್ ಉಚಿತವಾಗಿ ಲಭ್ಯವಾಗಲಿದ್ದು, ಇದಕ್ಕೆ ಯಾವುದೇ ವಾರ್ಷಿಕ ನಿರ್ವಹಣಾ ಶುಲ್ಕವನ್ನು ವಿಧಿಸಲಾಗುವುದಿಲ್ಲ. ಆದರೆ ಈ ಖಾತೆಯನ್ನು ಹೊಂದಿರುವವರು ಇತರ ಯಾವುದೇ ಉಳಿತಾಯ ಖಾತೆಯನ್ನು ಹೊಂದಲು ಅರ್ಹರಾಗಿರುವುದಿಲ್ಲ.

 ಬೇಸಿಕ್ ಉಳಿತಾಯ ಖಾತೆಯ ಠೇವಣಿದಾರರು ತಿಂಗಳಿಗೆ ಎಟಿಎಂನಿಂದ ಸೇರಿದಂತೆ ಒಟ್ಟು ನಾಲ್ಕು ಸಲ ಹಣವನ್ನು ಹಿಂಪಡೆಯಬಹುದಾಗಿದೆ. ತದನಂತರ ಪ್ರತಿ ವಿದ್‌ಡ್ರಾಗೂ ಎಸ್‌ಬಿಐ ಶಾಖೆಯಿಂದ 50 ರೂ. ಹಾಗೂ ಸೇವಾ ತೆರಿಗೆಯನ್ನು ವಿಧಿಸಲಾಗುವುದು. ಇತರ ಎಟಿಎಂಗಳಿಂದ 20 ರೂ. ಹಾಗೂ ಸೇವಾ ತೆರಿಗೆಯನ್ನು ವಿಧಿಸಲಾಗುವುದು.

ಎಸ್‌ಬಿಐನ ಪರಿಷ್ಕೃತ ಶುಲ್ಕಗಳ ವಿವರ

   ಎಟಿಎಂ ಕಾರ್ಡ್‌ಗಳು: ಜೂನ್ 1ರಿಂದ ಹೊಸ ಡೆಬಿಟ್ ಕಾರ್ಡ್ ನೀಡಲು ಶುಲ್ಕವನ್ನು ವಿಧಿಸಲಾಗುವುದು. ಆದರೆ ರೂಪೇ ಕ್ಲಾಸಿಕ್ ಕಾರ್ಡ್‌ನ್ನು ಮಾತ್ರ ಉಚಿತವಾಗಿ ನೀಡಲಾಗುವುದು.

ಆನ್‌ಲೈನ್ ವರ್ಗಾವಣೆ: ಐಎಂಪಿಎಸ್ ಮೂಲಕ ಆನ್‌ಲೈನ್ ನಿಧಿ ವರ್ಗಾವಣೆಗೆ ಸೇವಾತೆರಿಗೆ ಹಾಗೂ 5 ರೂ. ವಿಧಿಸಲಾಗುವುದು. 1 ಲಕ್ಷ ರೂ.ಗಿಂತ ಅಧಿಕ ಹಾಗೂ 2 ಲಕ್ಷ ರೂ.ವರೆಗೆ 15 ರೂ. ಹಾಗೂ ಸೇವಾ ತೆರಿಗೆ ವಿಧಿಸಲಾಗುವುದು. 2 ಲಕ್ಷಕ್ಕಿಂತ ಹೆಚ್ಚು ಹಾಗೂ 5 ಲಕ್ಷ ರೂ.ವರೆಗೆ 25 ರೂ. ಹಾಗೂ ಸೇವಾ ತೆರಿಗೆ ವಿಧಿಸಲಾಗುವುದು.

 ಚೆಕ್ ಪುಸ್ತಕ: ಜೂನ್ 1ರಿಂದ ಬೇಸಿಕ್ ಉಳಿತಾಯ ಬ್ಯಾಂಕ್ ಠೇವಣಿ ಖಾತೆಯ ಗ್ರಾಹಕನು 10 ಹಾಳೆಗಳ ಚೆಕ್‌ಪುಸ್ತಕ ಪಡೆಯಲು 30 ರೂ. ಹಾಗೂ ಸೇವಾ ಶುಲ್ಕವನ್ನು ತೆರಬೇಕಾಗುತ್ತದೆ. 25 ಹಾಳೆಗಳ ಚೆಕ್ ಪುಸ್ತಕ್ಕೆ 75 ರೂ. ಮತ್ತು ಸೇವಾ ತೆರಿಗೆ ಹಾಗೂ 50 ಹಾಳೆಗಳ ಚೆಕ್ ಪುಸ್ತಕಕ್ಕೆ 150 ರೂ. ಹಾಗೂ ಸೇವಾ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ.

  ಶಿಥಿಲಗೊಂಡ ನೋಟುಗಳ ವಿನಿಮಯ: ಶಿಥಿಲಗೊಂಡ 20 ನೋಟುಗಳಿಗೆ ಅಥವಾ 5 ಸಾವಿರ ರೂ.ವೌಲ್ಯದವರೆಗಿನ ನೋಟುಗಳಿಗೆ ಯಾವುದೇ ಶುಲ್ಕ ವಿಧಿಸಲಾಗುವುದಿಲ್ಲ. ಆದಾಗ್ಯೂ 20ಕ್ಕೂ ಅಧಿಕ ಸಂಖ್ಯೆಯ ಶಿಥಿಲ ನೋಟುಗಳಿಗೆ, ಪ್ರತಿ ನೋಟಿಗೆ 2 ರೂ. ಅಥವಾ 1 ಸಾವಿರ ರೂ.ವೌಲ್ಯದ ನೋಟುಗಳಿಗೆ ತಲಾ 5 ರೂ. ಹಾಗೂ ಸೇವಾ ತೆರಿಗೆ ವಿಧಿಸಲಾಗುವುದು. ಉದಾಹರಣೆಗೆ 500 ರೂ.ಗಳ 25 ನೋಟುಗಳಿಗೆ (ಒಟ್ಟು ವೌಲ್ಯ 12,500) , ಪ್ರತಿ ನೋಟಿಗೆ 3 ರೂ. ಹಾಗೂ 1 ಸಾವಿರ ರೂ. ವೌಲ್ಯದ ನೋಟುಗಳಿಗೆ 62.50 ರೂ. ಹಾಗೂ ಸೇವಾ ತೆರಿಗೆ ವಿಧಿಸಲಾಗುವುದು.

    ಬ್ಯಾಂಕಿಂಗ್ ಪ್ರತಿನಿಧಿಗಳ ಮೂಲಕ ನಗದು ವ್ಯವಹಾರ: ಬ್ಯಾಂಕಿಂಗ್ ಪ್ರತಿನಿಧಿಗಳ ಮೂಲಕ 10 ಸಾವಿರ ರೂ.ವರೆಗಿನ ನಗದು ಠೇವಣಿಗಳಿಗೆ ಅದರ ಒಟ್ಟು ವೌಲ್ಯದ 0.25 ಶೇಕಡ ಅಥವಾ ಕನಿಷ್ಠ 2 ರೂ. ಹಾಗೂ ಗರಿಷ್ಠ 8 ರೂ. ಮತ್ತು ಸೇವಾ ತೆರಿಗೆ ವಿಧಿಸಲಾಗುವುದು. ಬ್ಯಾಂಕ್ ಪ್ರತಿನಿಧಿಗಳ ಮೂಲಕ ನಡೆಸಲಾಗುವ 2 ಸಾವಿರ ರೂ.ವರೆಗೆ ಹಣ ಹಿಂತೆಗೆತಕ್ಕೆ ವಹಿವಾಟು ನಡೆಸಲಾದ ವೌಲ್ಯದ ಶೇ.2.50ರಷ್ಟು ಅಥವಾ ಕನಿಷ್ಟ ಆರು ರೂ. ಮತ್ತು ಸೇವಾ ತೆರಿಗೆ ವಿಧಿಸಲಾಗುವುದು.