ಭದ್ರತಾ ಸಿಬ್ಬಂದಿಯಿಂದಲೇ ಅತ್ಯಾಚಾರಕ್ಕೆ ಯತ್ನ
ಗ್ರೇಟರ್ ನೋಯ್ಡ, ಜೂ.25: ಸುರಕ್ಷತೆ ಕಾರಣಕ್ಕಾಗಿ ಅಪಾರ್ಟ್ಮೆಂಟ್ ವಾಸವನ್ನು ಬಹುತೇಕ ಮಂದಿ ಇಷ್ಟಪಡುತ್ತಾರೆ. ಆದರೆ ಇಲ್ಲೊಂದು ಘಟನೆ ನೋಡಿದರೆ ಶಾಕ್ ಆಗಬಹುದು. ಫ್ಲ್ಯಾಟ್ನ ಭದ್ರತಾ ಸಿಬ್ಬಂದಿಯೇ ಫ್ಲ್ಯಾಟ್ನಲ್ಲಿದ್ದ ಒಬ್ಬಂಟಿ ಯುವತಿಯ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿದ್ದಾನೆ.
ಹೌಸಿಂಗ್ ಸೊಸೈಟಿಯ 12ನೆ ಮಹಡಿಯ ಅಪಾರ್ಟ್ಮೆಂಟ್ನಲ್ಲಿ ವಾಸವಿದ್ದ ಯುವತಿ ತನ್ನ ಮನೆಗೆ ಬೀಗ ಹಾಕಿರಲಿಲ್ಲ. ಯುವತಿಯ ಚಲನ ವಲನಗಳ ಮೇಲೆ ನಿಗಾ ಇಟ್ಟಿದ್ದ 28 ವರ್ಷದ ಭದ್ರತಾ ಸಿಬ್ಬಂದಿ ಇದನ್ನು ಪತ್ತೆ ಮಾಡಿ, ನೇರವಾಗಿ ಆಕೆಯ ಬೆಡ್ರೂಂಗೆ ನುಗ್ಗಿ ಅತ್ಯಾಚಾರಕ್ಕೆ ಯತ್ನಿಸಿದ ಎಂದು ಯುವತಿ ದೂರು ನೀಡಿದ್ದಾರೆ.
ಯುವತಿಯ ಅಪಾರ್ಟ್ಮೆಂಟ್ಗೆ ನುಗ್ಗುವ ಮುನ್ನ ಅದೇ ಮಹಡಿಯಲ್ಲಿದ್ದ ಇತರ ಮೂರು ಅಪಾರ್ಟ್ಮೆಂಟ್ಗಳ ಬಾಗಿಲಿಗೆ ಹೊರಗಿನಿಂದ ಚಿಲಕ ಹಾಕಿದ್ದ ಮತ್ತು ಅ ಮನೆಯ ಬಾಗಿಲನ್ನು ಮುಚ್ಚಿ ಒಳಗಿನಿಂದ ಚಿಲಕ ಹಾಕಿದ್ದ.ಆದ್ದರಿಂದ ಯಾರೂ ಆಕೆಯ ರಕ್ಷಣೆಗೆ ಬರಲು ಸಾಧ್ಯವಾಗಲಿಲ್ಲ.
ಖಾಸಗಿ ಕಾಲೇಜಿನಲ್ಲಿ ಉದ್ಯೋಗದಲ್ಲಿದ್ದ ಯುವತಿ 10:30ರ ವೇಳೆ ಮಲಗಲು ಸಜ್ಜಾಗಿದ್ದಾಗ ರಾಜ್ಕುಮಾರ್ ಎಂಬ ಭದ್ರತಾ ಸಿಬ್ಬಂದಿ ಕೊಠಡಿಯಲ್ಲಿದ್ದುದನ್ನು ನೋಡಿ ದಿಗ್ಭ್ರಮೆಗೊಂಡಳು. "ನನ್ನನ್ನು ಹಿಡಿಯಲು ಬಂದಾಗ ಆತನ ಜತೆ ಹೋರಾಡಿ ಕೊಠಡಿಯಿಂದ ತಪ್ಪಿಸಿಕೊಂಡೆ" ಎಂದು ಯುವತಿ ಹೇಳಿಕೊಂಡಿದ್ದಾಳೆ.
ಈಕೆಯ ಮನೆಯಿಂದ ಚೀರಾಟ ಕೇಳಿದ ಪಕ್ಕದ ಮನೆಯವರು ನೆರವಿಗೆ ಧಾವಿಸಲು ಮುಂದಾದಾಗ, ಹೊರಗಿನಿಂದ ಚಿಲಕ ಹಾಕಿರುವುದು ಪತ್ತೆಯಾಯಿತು. ಯುವತಿ ಪಕ್ಕದ ಮನೆಯ ಚಿಲಕಗಳನ್ನು ತೆಗೆಯುತ್ತಿದ್ದಾಗ ಆರೋಪಿ ತಪ್ಪಿಸಿಕೊಂಡು ಪರಾರಿಯಾದ. 1100 ಕುಟುಂಬಗಳು ವಾಸವಿರುವ ಎವಿಜೆ ಹೈಟ್ಸ್ ಎಂಬ ವಸತಿ ಸಮುಚ್ಛಯದಲ್ಲಿ ಈ ಘಟನೆ ನಡೆದಿದ್ದು, ಒಟ್ಟು 20 ಮಂದಿ ಭದ್ರತಾ ಸಿಬ್ಬಂದಿ ಇಲ್ಲಿದ್ದಾರೆ.
