ಶಬ್ದಮಾಲಿನ್ಯಕ್ಕೆ ಮಸೀದಿಯ ಚಿತ್ರ ಉದಾಹರಣೆ !

 ಹೊಸದಿಲ್ಲಿ, ಜೂ.30: ದಿಲ್ಲಿಯ ಐಸಿಎಸ್‌ಇ (ಇಂಡಿಯನ್ ಸರ್ಟಿಫಿಕೇಟ್ ಆಫ್ ಸೆಕೆಂಡರಿ ಎಜುಕೇಶನ್)ನ 6ನೇ ತರಗತಿಯ ಪಠ್ಯಪುಸ್ತಕವೊಂದರಲ್ಲಿ ಶಬ್ದ ಮಾಲಿನ್ಯವನ್ನು ವಿವರಿಸುವಾಗ ಮಸೀದಿಯ ಚಿತ್ರ ಬಳಸಿರುವ ಘಟನೆ ವರದಿಯಾಗಿದೆ.

ಐಸಿಎಸ್‌ಸಿಯ ವಿದ್ಯಾರ್ಥಿಗಳಿಗೆ ಅಗತ್ಯವಿರುವ ಪಠ್ಯಪುಸ್ತಕಗಳನ್ನು ಖಾಸಗಿ ಪ್ರಕಾಶಕರಿಂದ ಪಡೆಯಲಾಗುತ್ತದೆ. ಅಂತೆಯೇ 6ನೇ ತರಗತಿಯ ‘ಇಂಟೆಗ್ರೇಟೆಡ್ ಸೈಯನ್ಸ್’ ಪಠ್ಯಪುಸ್ತಕವನ್ನು ಹೊಸದಿಲ್ಲಿ ದರಿಯಗಂಜ್‌ನ ಸೆಲಿನಾ ಪಬ್ಲಿಷರ್ಸ್ ಮುದ್ರಿಸಿದೆ.

    ಇದರಲ್ಲಿ ಶಬ್ದ ಮಾಲಿನ್ಯ ಕುರಿತ ಪಾಠದಲ್ಲಿ ವ್ಯಕ್ತಿಯೋರ್ವ ವಿವಿಧ ರೀತಿಯ ಶಬ್ದಮಾಲಿನ್ಯ ಮೂಲಗಳ ನಡುವೆ ನಿಂತಿರುವ ಚಿತ್ರವಿದೆ. ವಿಮಾನ, ವೇಗವಾಗಿ ಚಲಿಸುತ್ತಿರುವ ರೈಲು, ಕೆಲವು ಚತುಷ್ಚಕ್ರ ವಾಹನಗಳು ಹಾಗೂ ಮಸೀದಿಯ ಚಿತ್ರಗಳನ್ನು ಇಲ್ಲಿ ಉದಾಹರಣೆಯಾಗಿ ಬಳಸಲಾಗಿದೆ. ಓರ್ವ ವಿದ್ಯಾರ್ಥಿಯ ತಂದೆ ಈ ಚಿತ್ರವನ್ನು ವಾಟ್ಸಾಪ್‌ನಲ್ಲಿ ಪ್ರಸಾರ ಮಾಡಿದ ಬಳಿಕ ಈ ವಿಷಯ ಬೆಳಕಿಗೆ ಬಂದಿದೆ. ಚಿತ್ರವನ್ನು ನೋಡಿ ನನಗೆ ಸಿಟ್ಟು ತಡೆಯಲಾಗಲಿಲ್ಲ. ಈ ಚಿತ್ರದ ಮೂಲಕ ಯಾವ ಸಂದೇಶ ನೀಡಲು ಬಯಸಲಾಗಿದೆ. ಸಣ್ಣ ಮಕ್ಕಳ ಕೋಮಲ ಮನಸ್ಸಿನ ಮೇಲೆ ಇಂತಹ ಚಿತ್ರ ಯಾವ ರೀತಿಯ ಪರಿಣಾಮ ಬೀರಬಹುದು.ಈ ಮಕ್ಕಳು ದೇಶದ ಭವಿಷ್ಯವಲ್ಲವೇ. ಈ ಧರ್ಮವನ್ನೇ ಯಾಕೆ ಇವರು ಆಯ್ಕೆ ಮಾಡಿಕೊಂಡಿದ್ದಾರೆ ಎಂದವರು ಚಿತ್ರದ ಜೊತೆ ಬರೆದಿರುವ ಸಂದೇಶದಲ್ಲಿ ಪ್ರಶ್ನಿಸಿದ್ದಾರೆ.

ಇತರ ಧರ್ಮೀಯರ ಹಬ್ಬ ಅಥವಾ ಆಚರಣೆಯನ್ನು ಶಬ್ದ ಮಾಲಿನ್ಯಕ್ಕೆ ಯಾಕೆ ಉದಾಹರಣೆಯನ್ನಾಗಿ ನೀಡಿಲ್ಲ ಎಂದೂ ಅವರು ಪ್ರಶ್ನಿಸಿದ್ದಾರೆ. ಇದೀಗ ಪಿಎಫ್‌ಐ ಪುಣೆ ಪೊಲೀಸ್ ಠಾಣೆಯಲ್ಲಿ ಸೆಲಿನಾ ಪಬ್ಲಿಷರ್ಸ್, ಪುಸ್ತಕದ ಸಂಪಾದಕ ಹಾಗೂ ಇತರರ ವಿರುದ್ಧ ಪ್ರಕರಣ ದಾಖಲಿಸಿದೆ.

    ಈ ಪುಸ್ತಕವನ್ನು ಎಸ್.ಕೆ.ಭಾಸಿನ್ ಎಂಬವರು ಸಂಪಾದಿಸಿದ್ದು ‘ ತಜ್ಞ ಶಿಕ್ಷಕರ ತಂಡ ’ ಈ ಪುಸ್ತಕದಲ್ಲಿರುವ ಲೇಖನಗಳನ್ನು ಬರೆದಿದೆ ಎಂದು ತಿಳಿಸಲಾಗಿದೆ. ಇದೊಂದು ಪ್ರಮಾದ . ಆದರೆ ಉದ್ದೇಶಪೂರ್ವಕವಾಗಿ ನಡೆದಿಲ್ಲ ಎಂದು ಸೆರಿನಾ ಪಬ್ಲಿಷರ್ಸ್‌ನ ಹಾಲಿ ಸಂಪಾದಕ ಬಿ.ಕೆ.ಜಾರ್ಜ್ ಒಪ್ಪಿಕೊಂಡಿದ್ದಾರೆ. ಈ ಪುಸ್ತಕವನ್ನು ಹಿಂಪಡೆದಿದ್ದೇವೆ. ಆದರೆ ಈಗಾಗಲೇ ಕೆಲವು ಪ್ರತಿಗಳು ಮಾರಾಟವಾಗಿವೆ. ಮುಂದಿನ ಪುಸ್ತಕದಲ್ಲಿ ಈ ತಪ್ಪನ್ನು ಸರಿಪಡಿಸಲಾಗುವುದು ಎಂದವರು ಹೇಳಿದ್ದಾರೆ.