ಮೋದಿ ದುರ್ಬಲ ಪ್ರಧಾನಿ
►ಮೋದಿ ದುರ್ಬಲ ಪ್ರಧಾನಿ
-ರಾಹುಲ್ ಗಾಂಧಿ, ಕಾಂಗ್ರೆಸ್ ಉಪಾಧ್ಯಕ್ಷ
♦ದುರ್ಬಲ ವಿರೋಧ ಪಕ್ಷಗಳಿರುವಾಗ ಮೋದಿ ಬಲಿಷ್ಠ ಪ್ರಧಾನಿಯಾಗಿ ಕಾಣುವುದು ಸಹಜ.
---------------------
►ಇರುವವನೇ ಮನೆಯೊಡೆಯ ಯೋಜನೆ ಶೀಘ್ರ ಜಾರಿಯಾಗಲಿದೆ
-ಶಕುಂತಲಾ ಶೆಟ್ಟಿ, ಶಾಸಕಿ
♦ಜನಪ್ರತಿನಿಧಿಗಳೆಲ್ಲ ವಿಧಾನಸೌಧವನ್ನು ತಮ್ಮ ತಮ್ಮ ಹೆಸರಿಗೆ ಬರೆದುಕೊಂಡರೇ?
---------------------
►ಇಸ್ರೇಲ್-ಭಾರತ ಜೋಡಿ ಸ್ವರ್ಗದಲ್ಲೇ ನಿಶ್ಚಯವಾಗಿದೆ
-ಬೆಂಜಮಿನ್ ನೆತನ್ಯಾಹು, ಇಸ್ರೇಲ್ ಪ್ರಧಾನಿ
♦ಇಸ್ರೇಲ್ ಬೆಂಕಿಯಲ್ಲಿ ಮೋದಿ ಸಹಗಮನ ಮಾಡಿ ತಮ್ಮ ಪಾತಿವ್ರತ್ಯವನ್ನು ಸಾಬೀತು ಮಾಡಬೇಕೇ?
---------------------
►ನನ್ನ ಝಂಡ ಬದಲಾಗಿದೆ ಹೊರತು ಅಜೆಂಡಾ ಅಲ್ಲ
-ಎಚ್.ವಿಶ್ವನಾಥ್, ಮಾಜಿ ಸಚಿವ
♦ಸಿದ್ದರಾಮಯ್ಯರನ್ನು ವಿರೋಧಿಸುವ ಅಜೆಂಡಾ ಕುರಿತು ಹೇಳಿಕೆ.
---------------------
►ಜೆಡಿಎಸ್ನಲ್ಲಿ ಸೂಟ್ಕೇಸ್ ಸಂಸ್ಕೃತಿ ಇದೆ
-ಪ್ರಜ್ವಲ್ ರೇವಣ್ಣ, ಮಾಜಿ ಸಚಿವ ಎಚ್. ಡಿ.ರೇವಣ್ಣ ಪುತ್ರ
♦ಅದು ಜೆಡಿಎಸ್ನ ಸನಾತನ ಸಂಸ್ಕೃತಿಯಂತೆ.
---------------------
►ವಿಧಾನಸಭೆ ಚುನಾವಣೆ ದೃಷ್ಟಿಯಲ್ಲಿಟ್ಟು ಕೊಂಡು ರಾಜ್ಯದ ನಾನಾ ಕಡೆ ತಿಂಗಳಿಗೊಂದು ಜನಾಂಗದ ಸಮಾವೇಶ ನಡೆಸಲಾಗುವುದು
-ಎಚ್.ಡಿ.ದೇವೇಗೌಡ, ಮಾಜಿ ಪ್ರಧಾನಿ
♦ಆ ಜನಾಂಗದ ಪ್ರಗತಿಯನ್ನು ದೃಷ್ಟಿಯಲ್ಲಿಟ್ಟು ಕೊಂಡು ಯಾವಾಗ ಸಮಾವೇಶ ಮಾಡುತ್ತೀರಿ?
---------------------
►ಕಾಂಗ್ರೆಸ್ನವರು ದಲಿತರಿಗೆ ಕುರಿ, ಕೋಳಿ ಕೊಟ್ಟು ಮೂಗಿಗೆ ತುಪ್ಪ ಹಚ್ಚಿ ರಾಜಕಾರಣ ಮಾಡುತ್ತಾರೆ
- ಸಿ.ಟಿ.ರವಿ, ಶಾಸಕ
♦ಕುರಿ, ಕೋಳಿ ಸಾಂಬಾರಿಗೆ ತುಪ್ಪದ ಬದಲು ಎಣ್ಣೆ ಬಳಸಿದರಾಯಿತು.
--------------------
►ರಾಹುಲ್ ಗಾಂಧಿಗೆ ಇನ್ನೂ ಮೆಚ್ಯೂರಿಟಿ ಬಂದಿಲ್ಲ
-ಯಡಿಯೂರಪ್ಪ, ಮಾಜಿ ಮುಖ್ಯಮಂತ್ರಿ
♦ಅವರಿಗಾಗಿ ಹುಡುಗಿ ಹುಡುಕುತ್ತಿದ್ದೀರಾ?
---------------------
►ಮುಂದಿನ ವಿಧಾನಸಭೆ ಚುನಾವಣೆಯಲ್ಲಿ ನಮ್ಮ ಕುಟುಂಬದಿಂದ ಎರಡೇ ಮಂದಿ ಸ್ಪರ್ಧೆ
-ಎಚ್.ಡಿ.ಕುಮಾರಸ್ವಾಮಿ, ಮಾಜಿ ಮುಖ್ಯಮಂತ್ರಿ
♦ಉಳಿದವರೆಲ್ಲ ಬೇರೆ ಪಕ್ಷದಿಂದ ಸ್ಪರ್ಧಿಸಲಿದ್ದಾರೆ ಎಂದಾಯಿತು.
---------------------
►ರಾಹುಲ್ ಗಾಂಧಿಯಂತಹ ಬಚ್ಚಾನಿಂದ ನರೇಂದ್ರ ಮೋದಿ ಏನೂ ಕಲಿಯಬೇಕಾಗಿಲ್ಲ
-ಶೋಭಾ ಕರಂದ್ಲಾಜೆ, ಸಂಸದೆ
♦ಯಾರಿಂದಲಾದರೂ ಸರಿ, ಮೊದಲು ಒಂದಿಷ್ಟು ಕಲಿಯಲಿ.
---------------------
►ಸಚಿವ ಸಂಪುಟ ವಿಸ್ತರಣೆ ಮುಂದಕ್ಕೆ ಹೋಗಿರುವುದಕ್ಕೆ ಆಷಾಢ ಕಾರಣವಲ್ಲ
- ಸಿದ್ದರಾಮಯ್ಯ, ಮುಖ್ಯಮಂತ್ರಿ
♦ಅಷಾಢಭೂತಿ ಹೇಳಿಕೆ ಎಂದರಂತೆ ದೇವೇಗೌಡ.
---------------------
►ರಜನಿಕಾಂತ್ ಆರೋಗ್ಯವೃದ್ಧಿಗಾಗಿ ಅಮೆರಿಕದಲ್ಲಿ ಜೂಜಾಡುತ್ತಿದ್ದಾರೆ
- ಸುಬ್ರಮಣಿಯನ್ ಸ್ವಾಮಿ, ಬಿಜೆಪಿ ಮುಖಂಡ
♦ನನ್ನೊಂದಿಗೆ ಜೂಜಾಟದಲ್ಲಿ ಸೋತವರ ಹತಾಶೆ ಹೇಳಿಕೆ ಎನ್ನುತ್ತಿದ್ದಾರಂತೆ ರಜನಿಕಾಂತ್.
---------------------
►ಉಡುಪಿಯಲ್ಲಿ ನಡೆದಿರುವುದು ಇಫ್ತಾರ್ ಕೂಟವಲ್ಲ, ಸೌಹಾರ್ದ ಭೋಜನ
-ವಿಶ್ವೇಶತೀರ್ಥ ಸ್ವಾಮೀಜಿ, ಪೇಜಾವರ ಮಠ
♦ಜೊತೆಗೆ, ನಡೆದಿರುವುದು ನಮಾಝ್ ಅಲ್ಲ ಯೋಗಾಸನ ಎಂಬ ಹೇಳಿಕೆಯನ್ನೂ ಕೊಟ್ಟು ಬಿಡಿ.
---------------------
►ದತ್ತಪೀಠ ವಿವಾದ ಕುರಿತಾದ ತೀರ್ಮಾನವನ್ನು ದಿಢೀರಾಗಿ ತೆಗೆದುಕೊಳ್ಳಲು ಸಾಧ್ಯವಿಲ್ಲ
- ರೋಶನ್ ಬೇಗ್, ಸಚಿವ
♦ಅಂದರೆ ವಿವಾದ ನಿನ್ನೆ ಶುರುವಾದದ್ದಷ್ಟೇ ಎನ್ನುತ್ತೀರಾ?
---------------------
►ಆಪರೇಷನ್ ಕಮಲದಿಂದ ನಮಗೆ ಬಹಳಷ್ಟು ಅನುಭವ ಆಗಿದೆ
- ಎಚ್.ಡಿ.ದೇವೇಗೌಡ, ಮಾಜಿ ಪ್ರಧಾನಿ
♦ಆ ಅನುಭವವನ್ನು ಬಳಸಿಕೊಂಡು ನೀವೂ ಆಪರೇಷನ್ಗೆ ಇಳಿಯುವ ಯೋಜನೆ ಇದೆಯೇ?
---------------------
►ದಲಿತರು ಯಾವುದೇ ಹುದ್ದೆ ನೀಡಿದರೂ ನಿಭಾಯಿಸುತ್ತಾರೆ
- ಡಾ.ಜಿ.ಪರಮೇಶ್ವರ್, ಕೆಪಿಸಿಸಿ ಅಧ್ಯಕ್ಷ
♦ತಲೆ ತಲಾಂತರಗಳಿಂದ ಮಲ ಹೊರುತ್ತಾ ಬಂದದ್ದು ಇದೇ ಕಾರಣದಿಂದ.
---------------------
►ಬೇರೆಯವರ ಮೇಲೆ ತಮ್ಮ ನಿಲುವು, ವಿಚಾರಗಳನ್ನು ಬಲವಂತವಾಗಿ ಹೇರುವ ಜನರನ್ನು ದೂರವಿಡಬೇಕು
-ವೆಂಕಯ್ಯ ನಾಯ್ಡು, ಕೇಂದ್ರ ಸಚಿವ
♦ಮತ್ತೇಕೆ ತಡ, ಆರೆಸ್ಸೆಸ್ನಿಂದ ದೂರವಿದ್ದರಾಯಿತು.
---------------------
►ಗೋವಾ ಸರಕಾರವನ್ನು ಅಧಿಕಾರದಿಂದ ಕೆಳಗಿಳಿಸಲು ನಾವು ಎಂದೂ ಅಪಮಾರ್ಗ ಹಿಡಿಯುವುದಿಲ್ಲ
-ಗಿರೀಶ್ ಚೂಡನ್ಕರ್, ಎಐಸಿಸಿ ಕಾರ್ಯದರ್ಶಿ
♦ಮತ್ಯಾವ ಮಾರ್ಗ ಹಿಡಿದಿದ್ದೀರಿ ಎನ್ನುವುದನ್ನು ಹೇಳಿ.
---------------------
►ಪ್ರಣವ್ ಮುಖರ್ಜಿ ನನ್ನ ತಂದೆಯಂತೆ
-ನರೇಂದ್ರ ಮೋದಿ, ಪ್ರಧಾನಿ
♦ಪ್ರಣವ್ ಅವರನ್ನು ಜಶೋದಾ ಬೆನ್ ಮಾವ ಎಂದು ಕರೆಯಬಹುದೇ?
---------------------
►ಜಿಎಸ್ಟಿ ಕ್ರಾಂತಿಯಲ್ಲ
-ಯು.ಟಿ.ಖಾದರ್, ಸಚಿವ
♦ಕಾರ್ಪೊರೇಟ್ ವಾಂತಿ ಎಂದು ಕರೆಯಬಹುದೇ?
---------------------
►ಗಂಗಾ-ಯಮುನಾ ಜೀವಂತ ಘಟಕಗಳಲ್ಲ
-ಸುಪ್ರೀಂಕೋರ್ಟ್
♦ಮನುಷ್ಯರು ಜೀವಂತ ಘಟಕ ಎನ್ನುವುದರ ಕುರಿತಂತೆ ಒಂದು ತೀರ್ಪನ್ನು ಬೇಗ ನೀಡಿ.
