ಪಾಕಿಸ್ತಾನಕ್ಕೆ ರಕ್ಷಣಾ ನೆರವು: ಕಠಿಣ ಶರತ್ತು ವಿಧಿಸಿದ ಅಮೆರಿಕ ಸಂಸತ್ತು

ವಾಶಿಂಗ್ಟನ್, ಜು. 15: ಪಾಕಿಸ್ತಾನಕ್ಕೆ ನೀಡುವ ರಕ್ಷಣಾ ಅನುದಾನದ ಅನುಮೋದನೆಗೆ ಕಠಿಣ ಶರತ್ತುಗಳನ್ನು ವಿಧಿಸುವ ಮೂರು ಶಾಸನ ತಿದ್ದುಪಡಿಗಳ ಪರವಾಗಿ ಅಮೆರಿಕದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ ಮತ ಹಾಕಿದೆ. ಈ ತಿದ್ದುಪಡಿಗಳ ಪ್ರಕಾರ, ಪಾಕಿಸ್ತಾನವು ಭಯೋತ್ಪಾದನೆ ವಿರುದ್ಧದ ಹೋರಾಟದಲ್ಲಿ ತೃಪ್ತಿದಾಯಕ ಪ್ರಗತಿಯನ್ನು ತೋರಿಸುವುದು ಅಗತ್ಯವಾಗಿದೆ.

ಭಯೋತ್ಪಾದಕರು ಮತ್ತು ಭಯೋತ್ಪಾದಕ ಸಂಘಟನೆಗಳಿಗೆ ಪಾಕಿಸ್ತಾನವು ನೀಡುತ್ತಿರುವ ಬೆಂಬಲದ ಹಿನ್ನೆಲೆಯಲ್ಲಿ ಈ ಶರತ್ತುಗಳನ್ನು ರೂಪಿಸಲಾಗಿದೆ. ಈ ಬಗ್ಗೆ ಅಮೆರಿಕದ ಹಲವಾರು ಉನ್ನತ ಅಧಿಕಾರಿಗಳು ಮತ್ತು ಸಂಸದರು ಈ ಹಿಂದೆ ಪದೇ ಪದೇ ಕಳವವಳ ವ್ಯಕ್ತಪಡಿಸಿದ್ದಾರೆ.

‘651 ಬಿಲಿಯ ಡಾಲರ್ ರಾಷ್ಟ್ರೀಯ ರಕ್ಷಣಾ ಅಂಗೀಕಾರ ಕಾಯ್ದೆ (ಎನ್‌ಡಿಎಎ), 2018’ಕ್ಕೆ ಸೂಚಿಸಲಾದ ಎಲ್ಲ ಮೂರು ಶಾಸನ ತಿದ್ದುಪಡಿಗಳನ್ನು ಅಮೆರಿಕ ಕಾಂಗ್ರೆಸ್‌ನ ಕೆಳಮನೆ ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ ಶುಕ್ರವಾರ ಧ್ವನಿ ಮತದಿಂದ ಅಂಗೀಕರಿಸಿದೆ.

2017 ಅಕ್ಟೋಬರ್ 1ರಿಂದ ಆರಂಭಗೊಳ್ಳುವ ಹಣಕಾಸು ವರ್ಷಕ್ಕಾಗಿ, ವಾರ್ಷಿಕ ರಕ್ಷಣಾ ವೆಚ್ಚವನ್ನು ಅನುಮೋದಿಸುವ ಎನ್‌ಡಿಎಎ-2018 ಮಸೂದೆಯನ್ನು ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ 344-81 ಮತಗಳ ಅಂತರದಿಂದ ಅಂಗೀಕರಿಸಿತು.

ಇನ್ನು, ಭಯೋತ್ಪಾದನೆ ವಿರುದ್ಧದ ಹೋರಾಟದಲ್ಲಿ ನೆರವು ನೀಡಿರುವುದಕ್ಕಾಗಿ ಪಾಕಿಸ್ತಾನಕ್ಕೆ ಅನುದಾನ ನೀಡುವ ಮುನ್ನ, ಪಾಕಿಸ್ತಾನ ತನ್ನ ಕರ್ತವ್ಯಗಳನ್ನು ನಿರ್ವಹಿಸಿದೆ ಎಂಬುದಾಗಿ ರಕ್ಷಣಾ ಕಾರ್ಯದರ್ಶಿ ಪ್ರಮಾಣಪತ್ರ ನೀಡಬೇಕಾಗಿದೆ.

 ಪಾಕಿಸ್ತಾನದ ಮೂಲಕ ಹಾದು ಹೋಗುವ ಸಂವಹನ ಮಾರ್ಗದ ಉದ್ದಕ್ಕೂ ಪಾಕಿಸ್ತಾನ ಭದ್ರತೆ ಏರ್ಪಡಿಸಿದೆ ಹಾಗೂ ಭಯೋತ್ಪಾದನೆ ನಿಗ್ರಹ ಕಾರ್ಯಾಚರಣೆಗಳಿಗೆ ಬೆಂಬಲವಾಗಿ ಹೇಳಿಕೊಳ್ಳಬಹುದಾದ ಕ್ರಮಗಳನ್ನು ತೆಗೆದುಕೊಂಡಿದೆ ಎಂಬುದನ್ನು ರಕ್ಷಣಾ ಕಾರ್ಯದರ್ಶಿ ತನ್ನ ಪ್ರಮಾಣಪತ್ರದಲ್ಲಿ ನಮೂದಿಸಬೇಕಾಗಿದೆ.

ಭಾರತದ ಜೊತೆಗಿನ ರಕ್ಷಣಾ ಸಹಕಾರಕ್ಕೆ ಅಸ್ತು

ಭಾರತದೊಂದಿಗೆ ರಕ್ಷಣಾ ಸಹಕಾರವನ್ನು ಹೆಚ್ಚಿಸುವ ಪ್ರಸ್ತಾಪವನ್ನು ಒಳಗೊಂಡ ತಿದ್ದುಪಡಿಯೊಂದನ್ನು ಅಮೆರಿಕದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್, ಎನ್‌ಡಿಎಎ-2018 ಮಸೂದೆಯೊಂದಿಗೆ ಅಂಗೀಕರಿಸಿದೆ.

ಭಾರತೀಯ ಅಮೆರಿಕನ್ ಸಂಸದ ಅಮಿ ಬೇರಾ ಮಂಡಿಸಿದ ತಿದ್ದುಪಡಿಯನ್ನು ಸದನವು ಧ್ವನಿಮತದಿಂದ ಅಂಗೀಕರಿಸಿತು.

ಈ ನಿರ್ಣಯದ ಪ್ರಕಾರ, ರಕ್ಷಣಾ ಕಾರ್ಯದರ್ಶಿಯು ವಿದೇಶ ಕಾರ್ಯದರ್ಶಿಯೊಂದಿಗೆ ಸಮಾಲೋಚಿಸಿ ಅಮೆರಿಕ ಮತ್ತು ಭಾರತಗಳ ನಡುವಿನ ರಕ್ಷಣಾ ಸಹಕಾರವನ್ನು ಮುಂದುವರಿಸುವುದಕ್ಕಾಗಿ ತಂತ್ರಗಾರಿಕೆಯೊಂದನ್ನು ರೂಪಿಸಬೇಕಾಗಿದೆ.