ಮಂಗಳೂರು: ಆಶ್ರಯ ಸಮಿತಿ ಸಭೆ

ಮಂಗಳೂರು, ಜು.17: ಮಂಗಳೂರು ನಗರ ದಕ್ಷಿಣ ವಿಧಾನ ಸಭಾ ಕ್ಷೇತ್ರ ಆಶ್ರಯ ಸಮಿತಿ ಸಭೆಯು ಕದ್ರಿಯಲ್ಲಿರುವ ಶಾಸಕ ಜೆ.ಆರ್.ಲೋಬೊರ ಕಚೇರಿಯಲ್ಲಿ ಜರಗಿತು.

ಈ ಸಂದರ್ಭ ಮಾತನಾಡಿದ ಅವರು, ಶಕ್ತಿನಗರದಲ್ಲಿ ನಿರ್ಮಿಸಲಾಗುವ ಮನೆಗಳಿಗೆ ಟೈಲ್ಸ್ ಬದಲಿಗೆ ರೆಡಾಕ್ ಸೈಡ್ ಬಳಸುವಂತೆ ಸೂಚನೆ ನೀಡಿದರು.
 ಮನೆಗಳಿಗೆ ತಲಾ 5 ಲಕ್ಷ ರೂ. ವೆಚ್ಚ ತಗಲುತ್ತಿದ್ದು ಟೈಲ್ಸ್ ಅಳವಡಿಸಿದರೆ ಹೆಚ್ಚುವರಿಯಾಗಿ ಪ್ರತೀ ಮನೆಗೆ 18 ಸಾವಿರ ರೂ. ಆಗುತ್ತದೆ. ಈಗಾಗಲೇ ಮನೆಗಳನ್ನು ಖರೀದಿಸಲು ಹಿಂದಿನ ಮೊತ್ತ 5 ಲಕ್ಷ ರೂ.ಗೆ ಒಡಂಬಡಿಕೆ ಮಾಡಿಕೊಂಡವರು ಹೆಚ್ಚವರಿ ಹಣವನ್ನು ಪಾವತಿಸಲು ಕಷ್ಟವಾಗುತ್ತದೆ. ಆದ್ದರಿಂದ ಟೈಲ್ಸ್ ಬಳಸುವ ಬದಲು ರೆಡಾಕ್ ಸೈಡ್ ಹಾಕುವಂತೆ ಲೋಬೊ ಸಲಹೆ ನೀಡಿದರು.

ಶಕ್ತಿನಗರದಲ್ಲಿ 930 ಮನೆಗಳನ್ನು ನಿರ್ಮಿಸಲಾಗುವುದು. ಈ ಕಾಮಗಾರಿಯನ್ನು 10 ಬ್ಲಾಕ್‌ಗಳಾಗಿ ಮಾಡಿ ಗುತ್ತಿಗೆದಾರರನ್ನು ನೇಮಕ ಮಾಡುವಂತೆ ಸಭೆಯಲ್ಲಿ ನಿರ್ಧರಿಸಲಾಯಿತು. ಈ ಮನೆಗಳ ನಿರ್ಮಾಣಕ್ಕೆ 46.50 ಕೋ. ರೂ. ಅಂದಾಜು ಮಾಡಲಾಗಿದೆ. ಹೆಚ್ಚುವರಿಯಾಗಿ ರಿಟೈನಿಂಗ್ ವಾಲ್ ನಿರ್ಮಿಸಬೇಕಾಗುತ್ತದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.

ಸ್ಲಮ್ ಬೋರ್ಡ್‌ನವರು ಮನೆ ನಿರ್ಮಿಸಲು ಮುಂದಾಗಿದ್ದು ಸೂಕ್ತ ಸ್ಥಳವನ್ನು ಗುರುತಿಸಿ, ಮನೆಗಳಿಗೆ ಬೇಡಿಕೆಯನ್ನು ತೆಗೆದುಕೊಂಡು ಅರ್ಹರಾದವರಿಗೆ ಮಾತ್ರ ನೀಡುವಂತೆ ಶಾಸಕ ಜೆ.ಆರ್.ಲೋಬೊ ತಿಳಿಸಿದರು. ಮನಪಾ ಆಯುಕ್ತ ಮುಹಮ್ಮದ್ ನಝೀರ್, ತಹಶೀಲ್ದಾರ್ ಮಹದೇವಪ್ಪಸಹಿತ ಆಶ್ರಯ ಸಮಿತಿ ಸದಸ್ಯರು ಉಪಸ್ಥಿತರಿದ್ದರು.