ಸರಣಿ ಗೆಲುವಿನ ನಿರೀಕ್ಷೆಯಲ್ಲಿ ಟೀಮ್ ಇಂಡಿಯಾ

ಕೊಲಂಬೊ, ಆ. 2: ಗಾಲೆಯಲ್ಲಿ ಮೊದಲ ಟೆಸ್ಟ್ ನಲ್ಲಿ ಭರ್ಜರಿ ಜಯ ಗಳಿಸಿರುವ ವಿರಾಟ್ ಕೊಹ್ಲಿ ನಾಯಕತ್ವದ ಟೀಮ್ ಇಂಡಿಯಾ ಗುರುವಾರ ಆರಂಭಗೊಳ್ಳಲಿರುವ ಎರಡನೆ ಟೆಸ್ಟ್‌ನಲ್ಲೂ ಗೆಲುವಿನ ಮೂಲಕ ಮೂರು ಪಂದ್ಯಗಳ ಟೆಸ್ಟ್ ಸರಣಿಯನ್ನು ವಶಪಡಿಸಿಕೊಳ್ಳುವ ನಿಟ್ಟಿನಲ್ಲಿ ಪ್ರಯತ್ನ ನಡೆಸಲಿದೆ.
ಭಾರತ ಮೊದಲ ಟೆಸ್ಟ್‌ನಲ್ಲಿ ಆರಂಭಿಕ ದಾಂಡಿಗ ಲೋಕೇಶ್ ರಾಹುಲ್ ಸೇವೆಯಿಂದ ವಂಚಿತಗೊಂಡಿತ್ತು. ಜ್ವರದಿಂದಾಗಿ ಅವರು ತಂಡದಿಂದ ದೂರವಾಗಿದ್ದರು. ಹೀಗಿದ್ದರೂ ತಂಡಕ್ಕೆ ಅವರ ಕೊರತೆ ಉಂಟಾಗಲಿಲ್ಲ.ಅವರ ಅನುಪಸ್ಥಿತಿಯಲ್ಲಿ ಅಭಿನವ್ ಮುಕುಂದ್ ಆರಂಭಿಕ ದಾಂಡಿಗನ ಸ್ಥಾನ ತುಂಬಿದ್ದರು.

 ಮೊದಲ ಇನಿಂಗ್ಸ್‌ನಲ್ಲಿ ಮುಕುಂದ್ ಬೇಗನೆ ಔಟಾಗಿದ್ದರೂ, ಎರಡನೆ ಇನಿಂಗ್ಸ್‌ನಲ್ಲಿ ಅರ್ಧಶತಕ ಗಳಿಸಿ ಉಪಯುಕ್ತ ಕೊಡುಗೆ ನೀಡಿದ್ದರು. ಮುಕುಂದ್ ಜೊತೆ ಇನಿಂಗ್ಸ್ ಆರಂಭಿಸಿದ್ದ ಶಿಖರ್ ಧವನ್ ಮೊದಲ ಇನಿಂಗ್ಸ್ ನಲ್ಲಿ 168 ಎಸೆತಗಳಲ್ಲಿ 190 ರನ್ ಗಳಿಸುವ ಮೂಲಕ ತಂಡದ ಸ್ಕೋರ್‌ನ್ನು 600ಕ್ಕೆ ತಲುಪಿಸಲು ನೆರವಾಗಿದ್ದರು. ಐದನೆ ಶತಕ ದಾಖಲಿಸಿದ್ದರು.

  ರಾಹುಲ್ ಫಿಟ್‌ನೆಸ್ ಸಮಸ್ಯೆಯಿಂದ ಹೊರಬಂದರೆ ಅವರಿಗೆ ಮುಕುಂದ್ ಸ್ಥಾನ ಬಿಟ್ಟುಕೊಡಬೇಕಾಗುತ್ತದೆ. ಕೊಹ್ಲಿ ಪಡೆ ಆರಂಭಿಕ ದಾಂಡಿಗರ ಆಯ್ಕೆ ವಿಚಾರದಲ್ಲಿ ಸಂದಿಗ್ಧ್ದತೆಯನ್ನು ಎದುರಿಸುವಂತಾಗಿದೆ. ಎರಡು ವರ್ಷಗಳ ಹಿಂದೆಯೂ ಭಾರತಕ್ಕೆ ಇಲ್ಲಿ ಇಂತಹದ್ದೇ ಪರಿಸ್ಥಿತಿ ಎದುರಾಗಿತ್ತು. ಧವನ್ ಮತ್ತು ವಿಜಯ್ ಗಾಯದಿಂದಾಗಿ ಹೊರಗುಳಿದಾಗ ರಾಹುಲ್ ಅವರು ಪೂಜಾರ ಜೊತೆ ಇನಿಂಗ್ಸ್ ಆರಂಭಿಸಿದ್ದರು.

 ಭಾರತ ವಿಶ್ವದ ನಂ.1 ಟೆಸ್ಟ್ ತಂಡ. ಶ್ರೀಲಂಕಾ ನಂ.7 ತಂಡ. ಹೀಗಿದ್ದರೂ ಪ್ರವಾಸಿ ತಂಡ ತನಗೆ ಅಪರಿಚಿತವಾದ ಪಿಚ್‌ನಲ್ಲಿ ಸಮಸ್ಯೆ ಎದುರಿಸುವುದು ಸಹಜ. ಆದರೆ ಭಾರತಕ್ಕೆ ಗಾಲೆ ಪಿಚ್‌ನಲ್ಲಿ ಸಮಸ್ಯೆ ಎದುರಾಗಲಿಲ್ಲ. ಲಂಕಾದ ದಾಂಡಿಗರು ಸಮಸ್ಯೆ ಎದುರಿಸಿದರು. ಶ್ರೀಲಂಕಾ 12 ತಿಂಗಳ ಹಿಂದೆ ಟೆಸ್ಟ್ ಸರಣಿಯಲ್ಲಿ ಆಸ್ಟ್ರೇಲಿಯವನ್ನು 3-0 ಅಂತರದಲ್ಲಿ ಮಣಿಸಿತ್ತು.ಆದರೆ ಈ ಬಾರಿ ಲಂಕಾದ ಆಟಕ್ಕೆ ಪಿಚ್ ಪೂರಕವಾಗಿದ್ದಂತೆ ಕಂಡು ಬಂದಿಲ್ಲ.

ಜ್ವರದಿಂದ ಬಳಲುತ್ತಿದ್ದ ಲಂಕಾದ ನಾಯಕ ದಿನೇಶ್ ಚಾಂಡಿಮಾಲ್ ಚೇತರಿಸಿಕೊಂಡಿದ್ದಾರೆ. ಅವರು ಎರಡನೆ ಟೆಸ್ಟ್‌ಗೆ ತಂಡದ ಸೇವೆಗೆ ಲಭ್ಯರಿದ್ದಾರೆ. 2015ರಲ್ಲಿ ಗಾಲೆ ಟೆಸ್ಟ್‌ನಲ್ಲಿ ಚಾಂಡಿಮಾಲ್ ಭಾರತದ ದಾಳಿಯನ್ನು ಪುಡಿಪುಡಿ ಮಾಡಿದ್ದರು. 169 ಎಸೆತಗಳಲ್ಲಿ 162 ರನ್ ಸಿಡಿಸಿದ್ದರು. ಕಳೆದ ಟೆಸ್ಟ್‌ನಲ್ಲಿ ಕೈ ಬೆರಳಿಗೆ ಗಾಯ ಮಾಡಿಕೊಂಡಿರುವ ಅಸೆಲಾ ಗುಣರತ್ನೆ ಸರಣಿಯ ಉಳಿದ ಟೆಸ್ಟ್‌ಗಳಿಗೆ ಲಭ್ಯರಿಲ್ಲ. ಇವರ ಬದಲಿಗೆ ಲಹಿರು ತಿರಿಮನ್ನೆ ತಂಡಕ್ಕೆ ವಾಪಸಾಗಿದ್ದಾರೆ.
 2016ರಲ್ಲಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ನಲ್ಲಿ ತಿರಿಮನ್ನೆ ಲಂಕಾ ತಂಡದಲ್ಲಿ ಕೊನೆಯ ಬಾರಿ ಆಡಿದ್ದರು. ಇತ್ತೀಚೆಗೆ ಮೊದಲ ಟೆಸ್ಟ್‌ಗೆ ಮುನ್ನ ಕೊಲಂಬೊದಲ್ಲಿ ನಡೆದ ಅಭ್ಯಾಸ ಪಂದ್ಯದಲ್ಲಿ ಲಂಕಾದ ಮಂಡಳಿ ಅಧ್ಯಕ್ಷರ ಇಲೆವೆನ್ ತಂಡದಲ್ಲಿ ಆಡಿದ್ದ ಅವರು 59 ರನ್ ದಾಖಲಿಸಿದ್ದರು. ಎಡಗೈ ಸ್ಪಿನ್ನರ್ ಲಕ್ಶನ್ ಸಂದಕನ್ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳ ಲಾಗಿದೆ. ಹಂಗಾಮಿ ನಾಯಕರಾಗಿದ್ದ ರಂಗನ ಹೆರಾತ್ ಕಳೆದ ಪಂದ್ಯದ ವೇಳೆ ಗಾಯಗೊಂಡಿದ್ದರು. ಈ ಕಾರಣದಿಂದಾಗಿ ಅವರ ಬದಲಿಗೆ ಸಂದಕನ್‌ರನ್ನು ತಂಡಕ್ಕೆ ಸೇರಿಸಿಕೊಳ್ಳಲಾಗಿತ್ತು.

ಕೊಲಂಬೊದಲ್ಲಿ ಈ ಹಿಂದೆ ನಡೆದ ಟೆಸ್ಟ್ ಗಳಲ್ಲಿ ಉಭಯ ತಂಡಗಳು ತಲಾ 2 ಟೆಸ್ಟ್‌ಗಳಲ್ಲಿ ಜಯ ಗಳಿಸಿದ್ದವು. 2015ರಲ್ಲಿ ಭಾರತ 117 ರನ್‌ಗಳ ಅಂತರದಲ್ಲಿ ಇದೇ ಕ್ರೀಡಾಂಗಣದಲ್ಲಿ ಜಯ ಗಳಿಸಿತ್ತು. 1993ರಲ್ಲಿ ಮುಹಮ್ಮದ್ ಅಝರುದ್ದೀನ್ ನಾಯಕತ್ವದ ಟೀಮ್ ಇಂಡಿಯಾ 235 ರನ್‌ಗಳ ಅಂತರದಲ್ಲಿ ಜಯ ಗಳಿಸಿತ್ತು. ಆ ಸರಣಿಯನ್ನು ಭಾರತ 1-0 ಅಂತರದಲ್ಲಿ ಗೆದ್ದುಕೊಂಡಿತ್ತು.

ತಂಡಗಳು 

ಭಾರತ: ವಿರಾಟ್ ಕೊಹ್ಲಿ(ನಾಯಕ), ಶಿಖರ್ ಧವನ್, ಲೋಕೇಶ್ ರಾಹುಲ್, ಚೇತೇಶ್ವರ ಪೂಜಾರ, ಅಜಿಂಕ್ಯ ರಹಾನೆ, ರೋಹಿತ್ ಶರ್ಮ, ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜ, ವೃದ್ಧಿಮಾನ್ ಸಹಾ(ವಿಕೆಟ್ ಕೀಪರ್), ಇಶಾಂತ್ ಶರ್ಮಾ, ಉಮೇಶ್ ಯಾದವ್, ಹಾರ್ದಿಕ್ ಪಾಂಡ್ಯ, ಭುವನೇಶ್ವರ ಕುಮಾರ್, ಮುಹಮ್ಮದ್ ಶಮಿ, ಕುಲದೀಪ್ ಯಾದವ್, ಅಭಿನವ್ ಮುಕುಂದ್.

ಶ್ರೀಲಂಕಾ: ದಿನೇಶ್ ಚಾಂಡಿಮಾಲ್(ನಾಯಕ), ಆ್ಯಂಜೆಲೊ ಮ್ಯಾಥ್ಯೂಸ್, ಉಪುಲ್ ತರಂಗ, ದಿಮಿತ ಕರುಣರತ್ನೆ, ನಿರೋಶನ್ ಡಿಕ್ವೆಲ್ಲಾ(ವಿಕೆಟ್ ಕೀಪರ್), ಕುಸಲ್ ಮೆಂಡಿಸ್, ಧನಂಜಯ್ ಡಿ ಸಿಲ್ವ, ಧನುಷ್ಕ ಗುಣತಿಲಕ, ಲಹಿರು ಕುಮಾರ, ವಿಶ್ವ ಫೆರ್ನಾಂಡೊ, ನುವಾನ್ ಫೆರ್ನಾಂಡೊ, ನುವಾನ್ ಪ್ರದೀಪ್, ರಂಗನ ಹೆರಾತ್, ದಿಲ್ರುವಾನ್ ಪೆರೆರಾ, ಮಲಿಂದಾ ಪುಷ್ಪಕುಮಾರ, ಲಕ್ಶನ್ ಸಂದಕನ್, ಲಹಿರು ತಿರಿಮನ್ನೆ.

ಪಂದ್ಯದ ಸಮಯ: ಬೆಳಗ್ಗೆ 10ಕ್ಕೆ ಆರಂಭ.