ಹೆಪ್ಟಾಥ್ಲಾನ್‌ನಲ್ಲಿ ಥಿಯಮ್‌ಗೆ ಚಿನ್ನ

ಲಂಡನ್, ಆ.7: ಬೆಲ್ಜಿಯಂನ ನಫಿ ಥಿಯಮ್ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನ ಹೆಪ್ಟಾಥ್ಲಾನ್‌ನಲ್ಲಿ ಚಿನ್ನದ ಪದಕ ಜಯಿಸಿದ್ದಾರೆ. ಕಳೆದ ವರ್ಷ ರಿಯೋ ಒಲಿಂಪಿಕ್ಸ್‌ನಲ್ಲಿ ಥಿಯಮ್ ಚಿನ್ನದ ಪದಕ ಗೆದ್ದುಕೊಂಡಿದ್ದರು.

ರವಿವಾರ ನಡೆದ 800 ಮೀ. ಓಟದ ಹೀಟ್ಸ್ ನಲ್ಲಿ 2:21.42 ಸೆಕೆಂಡ್‌ನಲ್ಲಿ ಗುರಿ ತಲುಪಿದ ಥಿಯಮ್ ಒಟ್ಟು 6,784 ಅಂಕ ಗಳಿಸುವ ಮೂಲಕ ಹೆಪ್ಟಾಥ್ಲಾನ್‌ನಲ್ಲಿ ಮೊದಲ ಸ್ಥಾನ ಪಡೆದರು.

ಥಿಯಮ್ ಪ್ರತಿಸ್ಪರ್ಧಿ ಜರ್ಮನಿಯ ಕರೊಲಿನ್ ಚಾಫೆರ್ 2:15.34 ಸೆಕೆಂಡ್‌ನಲ್ಲಿ ಗುರಿ ತಲುಪಿ 6,696 ಅಂಕ ಗಳಿಸಿ ಬೆಳ್ಳಿ ಪದಕ ಜಯಿಸಿದ್ದಾರೆ.
ಜಾವೆಲಿನ್ ಎಸೆತದ ಸ್ಪರ್ಧೆಯಲ್ಲಿ 58.41 ಮೀ. ದೂರ ಜಾವೆಲಿನ್ ಎಸೆದು ಪ್ರೇಕ್ಷಕರ ಶ್ಲಾಘನೆಗೆ ಒಳಗಾಗಿದ್ದ ಹಾಲೆಂಡ್‌ನ ಅನೌಕ್ ವೆಟ್ಟೆರ್ ಒಟ್ಟು 6,636 ಅಂಕ ಗಳಿಸಿ ಕಂಚಿನ ಪದಕ ತನ್ನದಾಗಿಸಿಕೊಂಡರು.