ಮನುಸ್ಮೃತಿ ಜಾರಿಗೆ ಕೇಂದ್ರದ ಹುನ್ನಾರ: ವೀರಭದ್ರ ಚೆನ್ನಮಲ್ಲ ಸ್ವಾಮಿ ಆಂತಕ

ಬೆಂಗಳೂರು, ಆ. 20: ಕೇಂದ್ರ ಸರಕಾರ ಮನುಸ್ಮೃತಿ ಆಧಾರಿತ ಸಂವಿಧಾನವನ್ನು ಜಾರಿ ಮಾಡುವ ನಿಟ್ಟಿನಲ್ಲಿ ಲೋಕಸಭೆ ಹಾಗೂ ರಾಜ್ಯಸಭೆಯಲ್ಲಿ ಮೂರನೆ ಎರಡರಷ್ಟು ಬಹುಮತ ಪಡೆಯಲು ಹಪಹಪಿಸುತ್ತಿದೆ ಎಂದು ನಿಡುಮಾಮಿಡಿ ಮಠದ ವೀರಭದ್ರ ಚೆನ್ನಮಲ್ಲ ಸ್ವಾಮೀಜಿ ಆತಂಕ ವ್ಯಕ್ತಪಡಿಸಿದ್ದಾರೆ.

 ರವಿವಾರ ನಗರದ ಅಂಬೇಡ್ಕರ್ ಭವನದಲ್ಲಿ ದೇವರಾಜ ಅರಸು ಗೌರವಾರ್ಥ ನೆನಪಿನ ಪ್ರಯುಕ್ತ ಆಯೋಜಿಸಿದ್ದ ‘ಅಹಿಂದ-20’ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಬಿಜೆಪಿ ನೇತೃತ್ವದ ಕೇಂದ್ರ ಸರಕಾರ ಜನತೆಗೆ ಒಳಿತು ಮಾಡಲು ಆಡಳಿತ ನಡೆಸುತ್ತಿಲ್ಲ ಎಂಬುದು ಕಳೆದ ಮೂರು ವರ್ದ ಆಡಳಿತದಲ್ಲಿ ಸ್ಪಷ್ಟವಾಗಿದೆ ಎಂದು ತಿಳಿಸಿದರು.

ದೇಶದ ಆಡಳಿತ ನಡೆಸಲು ಹಾಗೂ ಜನಪರ ಯೋಜನೆಗಳನ್ನು ರೂಪಿಸಲು ಸಾಮಾನ್ಯ ಬಹುಮತ ಸಿಕ್ಕರೆ ಸಾಕು. ಆದರೆ, ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರಕಾರಕ್ಕೆ ಜನಪರ ಯೋಜನೆಗಳನ್ನು ರೂಪಿಸುವ ಯಾವುದೇ ಆಸಕ್ತಿಯಿಲ್ಲ. ಕೇವಲ ಬ್ರಾಹ್ಮಣಶಾಹಿ ಹಾಗೂ ಬಂಡವಾಳಶಾಹಿ ಸಿದ್ದಾಂತಕ್ಕೆ ಪೂರಕವಾಗಿರುವಂತಹ ಯೋಜನೆಗಳತ್ತ ಮಾತ್ರ ಆಸಕ್ತಿ ವಹಿಸಿದ್ದಾರೆ. ಇಂತಹ ಜನವಿರೋಧಿ ನೀತಿಗಳನ್ನು ರೂಪಿಸುವುದಕ್ಕಾಗಿ ಮೂರನೇ ಎರಡರಷ್ಟು ಬಹುಮತಕ್ಕೆ ಹಾತೊರಿಯುತ್ತಿದ್ದಾರೆ ಎಂದು ಅವರು ಕಿಡಿಕಾರಿದರು.

ಕೇಂದ್ರದಲ್ಲಿ ಬಿಜೆಪಿ ಆಡಳಿತ ನಡೆಸಿದಾಗಿನಿಂದ ಗೋಹತ್ಯೆ ಹೆಸರಿನಲ್ಲಿ ಜನ ಸಾಮಾನ್ಯರ ಮಾರಣ ಹೋಮ ನಡೆಯುತ್ತಿದೆ. ಇದರ ಜೊತೆ ಜೊತೆಗೆ ನೋಟು ನಿಷೇಧ, ಗ್ಯಾಸ್ ಸಿಲಿಂಡರ್ ಮೇಲಿನ ಸಬ್ಸಿಡಿ ಕಡಿತ, ಜಿಎಸ್‌ಟಿ ಜಾರಿ ಹಾಗೂ ಸರಕಾರಿ ಸ್ವಾಮ್ಯದ ಕೈಗಾರಿಕೆಗಳನ್ನು ಖಾಸಗೀಕರಣ ಮಾಡುವ ಹಂತಕ್ಕೆ ಮುಟ್ಟಿದೆ. ಇಂತಹ ಜನವಿರೋಧಿ ನೀತಿಗಳನ್ನು ಹೊರತು ಪಡಿಸಿದರೆ ಕಳೆದ ಮೂರು ವರ್ಷದಲ್ಲಿ ಕೇಂದ್ರ ಸರಕಾರ ಮತೇನು ಮಾಡಿಲ್ಲವೆಂದು ಅವರು ತಿಳಿಸಿದರು.

 ದೇಶದಲ್ಲಿ ಬಹುಜನರು ತಿನ್ನುವ ಆಹಾರಕ್ಕೆ ಕುತ್ತು ಬಂದಿದೆ. ಜನತೆ ಏನ್ನನ್ನು ತಿನ್ನಬೇಕು. ಯಾವ ಉಡುಗೆ ತೊಡಬೇಕು. ಯಾವ ಹಬ್ಬವನ್ನು ಹೇಗೆ ಆಚರಿಸಬೇಕು ಎಂಬುದನ್ನು ಕೋಮುವಾದಿಗಳು ನಿರ್ದೇಶಿಸುವ ಮಟ್ಟಕ್ಕೆ ಬಲಿಷ್ಟಗೊಂಡಿದ್ದಾರೆ. ಮುಂದಿನ ಬಾರಿಯೂ ಕೇಂದ್ರದಲ್ಲಿ ಬಿಜೆಪಿ ಆಡಳಿತಕ್ಕೆ ಬಂದರೆ ದೇಶದ ಬಹುತ್ವ, ಬಹುಸಂಸ್ಕೃತಿ ಹಾಗೂ ಡಾ.ಬಿ.ಆರ್.ಅಂಬೇಡ್ಕರ್ ಆಶಯ ನಿರ್ಣಾಮವಾಗಲಿದೆ. ಹೀಗಾಗಿ ಅಹಿಂದ ವರ್ಗಗಳು ಎಚ್ಚೆತ್ತುಕೊಂಡು ಕೋಮುವಾದಿಗಳನ್ನು ಮಟ್ಟ ಹಾಕಬೇಕೆಂದು ಅವರು ಮನವಿ ಮಾಡಿದರು.

 ದೇಶದಲ್ಲಿ ಇಂದಿರಾ ಗಾಂಧಿ ಪ್ರಧಾನಿಯಾಗಿದ್ದ ಸಂದರ್ಭದಲ್ಲಿ ಅಲ್ಪಸಂಖ್ಯಾತ, ಹಿಂದುಳಿದ ಹಾಗೂ ದಲಿತ ಸಮುದಾಯದ ಏಳ್ಗೆಗಾಗಿ ತಮ್ಮ ಆಡಳಿತವನ್ನು ಮೀಸಲಿಟ್ಟರು. ಅದೇ ಹಾದಿಯಲ್ಲಿ ದೇವರಾಜು ಅರಸು ರಾಜ್ಯದಲ್ಲಿ ಅಹಿಂದ ವರ್ಗಕ್ಕೆ ರಾಜಕೀಯ, ಸಾಮಾಜಿಕ ಸ್ಥಾನಮಾನಗಳನ್ನು ದೊರಕಿಸಿಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು ಎಂದು ಅವರು ಸ್ಮರಿಸಿದರು.

ಕಾರ್ಯಕ್ರಮದಲ್ಲಿ ಸಮಾಜ ಕಲ್ಯಾಣ ಸಚಿವ ಎಚ್.ಆಂಜನೇಯ, ಯೋಜನಾ ಆಯೋಗದ ಉಪಾಧ್ಯಕ್ಷ ಸಿ.ಎಂ.ಇಬ್ರಾಹಿಂ, ಅಹಿಂದ ಮುಖಂಡರಾದ ಡಾ.ಎನ್.ಲಕ್ಷ್ಮೀಪತಿ ಬಾಬು, ನರಸಿಂಹಯ್ಯ, ಲೇಖಕ ಡಾ.ಎಸ್.ನಟರಾಜ ಬೂದಾಳು, ದಲಿತ ಮುಖಂಡರಾದ ಎನ್.ಮುನಿಸ್ವಾಮಿ, ಸಿ.ಎಂ.ಮುನಿಯಪ್ಪ, ಮಾವಳ್ಳಿ ಶಂಕರ್ ಮತ್ತಿತರರಿದ್ದರು.

 ‘ಇವತ್ತು ಸಿಎಂ ಸಿದ್ದರಾಮಯ್ಯ ರಾಜ್ಯದಲ್ಲಿ ಅತ್ಯುನ್ನತ ಸ್ಥಾನಕ್ಕೇರಲು ಅಹಿಂದದ ಕೊಡುಗೆ ಬಹಳಷ್ಟಿದೆ. ಜೆಡಿಎಸ್‌ನಿಂದ ಹೊರಗೆ ಬಂದ ಅವರನ್ನು ಅಹಿಂದ ಚಳವಳಿಯ ಮುಖಂಡರು ಬರಮಾಡಿಕೊಂಡು ಅತ್ಯುನ್ನತ ಸ್ಥಾನ ಕೊಟ್ಟು, ಸಿಎಂ ಹುದ್ದೆಗೇರುವವರಿಗೆ ಜೊತೆಯಾದರು. ಹೀಗಾಗಿ ಸಿಎಂ ಸಿದ್ದರಾಮಯ್ಯ ಅಹಿಂದ ವರ್ಗಗಳ ಆಶಯದಂತೆ ತಮ್ಮ ನಾಲ್ಕು ವರ್ಷದ ಆಡಳಿತವನ್ನು ನಡೆಸಿ, ಜನಮನ್ನಣೆ ಗಳಿಸಿದ್ದಾರೆ’

-ವೀರಭದ್ರ ಚೆನ್ನಮಲ್ಲ ಸ್ವಾಮೀಜಿ ನಿಡುಮಾಮಿಡಿ ಮಠ