ಹೊಸ ಚಿತ್ರದೊಂದಿಗೆ ದ್ವಾರಕೀಶ್

ದ್ವಾರಕೀಶ್ ನಿರ್ಮಾಣದ ಚಿತ್ರಗಳೆಂದರೆ ದಕ್ಷಿಣ ಭಾರತವೇ ತಿರುಗಿ ನೋಡುವ ಕಾಲವಿತ್ತು. ಚತುರ್ಭಾಷಾ ಚಿತ್ರಗಳ ನಿರ್ಮಾಪಕನಾಗಿ ಗುರುತಿಸಿ ಕೊಂಡಿರುವ ಹಿರಿಯ ನಟ ದ್ವಾರಕೀಶ್ 51ನೇ ಚಿತ್ರ ನಿರ್ಮಾಣಕ್ಕೆ ಮುಂದಾಗಿದ್ದಾರೆ.

ಐವ್ವತ್ತನೇ ಚಿತ್ರವಾದ 'ಚೌಕ'ದ ಯಶಸ್ಸಿನ ಬಳಿಕ ಇಂಥದೊಂದು ಪ್ರಯತ್ನಕ್ಕೆ ಮುಂದಾಗಿದ್ದು, ಇದು ತಮಿಳಿನ 'ಪಿಚ್ಚೈಕಾರನ್' ಎಂಬ ಚಿತ್ರದ ರಿಮೇಕ್ ಅಂತೆ. ಚಿತ್ರದ ಕುರಿತು ಮಾತನಾಡಿದ ಯೋಗಿ ದ್ವಾರಕೀಶ್  'ಚಿತ್ರವನ್ನು ಚೈತನ್ಯ ನಿರ್ದೇಶಿಸಲಿದ್ದು, ಇಶಾನ್ ನಾಯಕರಾಗಿ ಕಾಣಿಸಿಕೊಳ್ಳಲಿದ್ದಾರೆ' ಎಂದರು. ಚಿತ್ರಕ್ಕೆ 'ಅಮ್ಮಾ ಐ ಲವ್ ಯೂ' ಎಂದು ಹೆಸರಿಡುವ ಬಗ್ಗೆ ಯೋಚನೆ ಮಾಡಿದ್ದಾರಂತೆ. ಎತ್ತರದ ನಾಯಕ ಇಶಾನ್ ಮಾತನಾಡಿ 'ಇಂಥದೊಂದು ಪಾತ್ರ ದೊರಕಿರುವುದು ತಮ್ಮ ಅದೃಷ್ಟ' ಎಂದರು.

75ರ ಸಂಭ್ರಮ

ಇದೇ ಸಂದರ್ಭದಲ್ಲಿ ದ್ವಾರಕೀಶ್ ಅವರ 75ನೇ ವರ್ಷದ ಜನ್ಮದಿನಾಚರಣೆಯ ಸಂಭ್ರಮವೂ ಇತ್ತು. ಅವರ ಇಬ್ಬರು ಪತ್ನಿಯರೂ ಸೇರಿದಂತೆ ಮಕ್ಕಳು ಮೊಮ್ಮಕ್ಕಳ ಜೊತೆಗಿನ ಸಂಭ್ರಮದ ಸನ್ನಿವೇಶ ಅಲ್ಲಿ ಮನೆಮಾಡಿತ್ತು. ತಮ್ಮ ವೃತ್ತಿ ಬದುಕಿನ 55ನೇ ವರ್ಷಾಚರಣೆ ನಡೆಯುತ್ತಿದೆ ಎಂದ ದ್ವಾರಕೀಶ್, 'ನಾನು ಒರಿಜಿನಲ್ಲು, ರಿಮೇಕು ಎಲ್ಲ ರೀತಿಯ ಚಿತ್ರಗಳನ್ನು ಮಾಡಿದ್ದೇನೆ. ಆದರೆ ರಿಮೇಕ್ ಮಾಡಿದಾಗ 'ರಿಮೇಕ್ ರಾಜ' ಎಂದು ಮಾಧ್ಯಮದವರು ಕರೆದಿದ್ದರು. ಕಂಟೆಂಟ್ ಚೆನ್ನಾಗಿದ್ದರೆ ರಿಮೇಕ್ ಮಾಡುವುದರಲ್ಲಿ ತಪ್ಪೇನಿದೆ' ಎಂದು ಪ್ರಶ್ನಿಸಿದರು. ಯೋಗಿಯ ಪ್ರಕಾರ ಎಲ್ಲವೂ ಅಂದುಕೊಂಡಂತೆ ನಡೆದರೆ ಜನವರಿ 19ಕ್ಕೆ ಚಿತ್ರ ಥಿಯೇಟರ್ ಗೆ ಬರುತ್ತದೆಯಂತೆ. ಅಂದಹಾಗೆ ಆ ತಿಂಗಳಲ್ಲಿ ರಜನಿಕಾಂತ್ ರ ಹೊಸ ಚಿತ್ರ ಬಿಡುಗಡೆಯಾಗುವುದಾದರೆ ಮಾತ್ರ ದಿನಾಂಕ ಬದಲಿಸುವ ಸಾಧ್ಯತೆ ಇದೆ ಎಂದರು.