ವೈರಲ್ ವೀಡಿಯೊದಲ್ಲಿನ ಮಗುವಿನ ಪೋಷಕರು ವಿರಾಟ್ ಕೊಹ್ಲಿಗೆ ಹೇಳಿದ್ದೇನು ?
ಈ ಮಗು ಯಾರು ಗೊತ್ತೇ ?
ಹೊಸದಿಲ್ಲಿ, ಆ.22: ಕ್ರಿಕೆಟಿಗರಾದ ವಿರಾಟ್ ಕೊಹ್ಲಿ, ಶಿಖರ್ ಧವನ್, ಯುವರಾಜ್ ಸಿಂಗ್ ಮತ್ತು ರಾಬಿನ್ ಉತ್ತಪ್ಪ ಇತ್ತೀಚೆಗೆ ತಮ್ಮ ಸಾಮಾಜಿಕ ಮಾಧ್ಯಮವಾದ ಇನ್ಸ್ಟಗ್ರಾಮ್ ಪುಟದಲ್ಲಿ - ಮಕ್ಕಳನ್ನು ಬಯ್ಯಬೇಡಿ ಎಂದು ವಿನಂತಿಸುವ ಹೇಳಿಕೆಯನ್ನು ಹಾಗೂ ಇದರ ಜೊತೆಗೆ ಸಣ್ಣ ಬಾಲಕಿಯೋರ್ವಳ ವೀಡಿಯೊ ದೃಶ್ಯವನ್ನು ಪೋಸ್ಟ್ ಮಾಡಿದ್ದರು. ಈ ಫೋಟೋ ವೈರಲ್ ಆಗಿತ್ತು. ಒಂದೂವರೆ ನಿಮಿಷದ ಈ ವೀಡಿಯೋದಲ್ಲಿ ತಾಯಿಯೊಬ್ಬಳು ತನ್ನ ಮೂರು ವರ್ಷದ ಮಗುವನ್ನು ಬೈಯುವ ದೃಶ್ಯವಿದೆ.
ಹಯ ಎಂಬ ಹೆಸರಿನ ಈ ಮೂರು ವರ್ಷದ ಬಾಲಕಿ ಬಾಲಿವುಡ್ ಗಾಯಕರಾದ ತೋಷಿ ಮತ್ತು ಶರಿಬ್ ಸಬ್ರಿ ಅವರ ಸೋದರನ ಪುತ್ರಿ ಎಂದು ಈಗ ಬಹಿರಂಗಗೊಂಡಿದೆ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ತೋಷಿ ಹಾಗೂ ಸಬ್ರಿ, ನಮ್ಮ ಸೋದರನ ಮಗಳ ಬಗ್ಗೆ ನಮಗೆ ಚೆನ್ನಾಗಿ ತಿಳಿದಿದೆ. ಹಯಳನ್ನು ಬಯ್ದರೆ ಕೆಲ ಕ್ಷಣದಲ್ಲೇ ಅದನ್ನು ಮರೆತುಬಿಟ್ಟು ಆಡಲು ಓಡುತ್ತಾಳೆ. ಆದರೆ ಹಾಗೆಂದು ಅವಳನ್ನು ಕೇವಲ ಮುದ್ದು ಮಾಡಿದರೆ ಆಕೆ ಓದಿನ ಬಗ್ಗೆ ನಿರ್ಲಕ್ಷ ತಳೆಯುವುದಿಲ್ಲವೇ ಎಂದು ಪ್ರಶ್ನಿಸುತ್ತಾರೆ.
ಆದರೆ ಈ ವೀಡಿಯೊ ವೈರಲ್ ಆಗುತ್ತದೆ ಎಂದು ಈ ದಂಪತಿ ಭಾವಿಸಿರಲಿಲ್ಲ. ಈ ವೀಡಿಯೊವನ್ನು ಮಗುವಿನ ತಾಯಿ ರೆಕಾರ್ಡ್ ಮಾಡಿಕೊಂಡಿದ್ದು ತನ್ನ ಮಗಳು ಎಷ್ಟೊಂದು ಹಠಮಾರಿ ಎಂಬುದನ್ನು ತೋರಿಸಿಕೊಡುವ ಉದ್ದೇಶ ಅವರದ್ದಾಗಿತ್ತು ಎನ್ನುತ್ತಾರೆ ತೋಷಿ.
ಈ ವೀಡಿಯೊವನ್ನು ವೀಕ್ಷಿಸಿ ಹಲವರಿಗೆ ಬೇಜಾರಾಗಿರಬಹುದು. ಆದರೆ ತಾಯಿಯ ಭಾವನೆಯನ್ನೂ ಅರ್ಥ ಮಾಡಿಕೊಳ್ಳಬೇಕು. ಬಯ್ದು ಮಕ್ಕಳನ್ನು ತಿದ್ದುವ ಕಾಳಜಿಯನ್ನೂ ಅರ್ಥ ಮಾಡಿಕೊಳ್ಳಬೇಕು ಎನ್ನುತ್ತಾರೆ ತೋಷಿ.
