ನುಣ್ಣನ್ನ ಬೆಟ್ಟ- ನಿಷ್ಠುರ ಕಣ್ಣುಗಳಲ್ಲಿ ಸ್ಪಷ್ಟ ನಿಲುವುಗಳು

ಇತ್ತೀಚಿನ ದಿನಗಳಲ್ಲಿ ವರ್ತಮಾನದ ಸಾಮಾಜಿಕ ಮತ್ತು ರಾಜಕೀಯ ಸ್ಥಿತಿಗತಿಗಳನ್ನು ಅತ್ಯಂತ ನಿಷ್ಠುರವಾದಿ ಕಣ್ಣುಗಳಿಂದ ನೋಡುತ್ತಾ, ವಿಮರ್ಶಿಸುತ್ತಿರುವವರಲ್ಲಿ ರಾಜಾರಾಂ ತಲ್ಲೂರು ಅವರ ಹೆಸರು ಮೊದಲ ಸಾಲಿನಲ್ಲಿ ನಿಲ್ಲುತ್ತದೆ. ‘ನುಣ್ಣನ್ನ ಬೆಟ್ಟ’ ರಾಜಾರಾಂ ತಲ್ಲೂರು ಅವರ ವೆಬ್ ಅಂಕಣಗಳ ಸಂಗ್ರಹ. ಒಂದು ರೀತಿಯಲ್ಲಿ ಇದು ಅವರ ಚೊಚ್ಚಲ ಕೃತಿ. ಬೆನ್ನುಡಿಯಲ್ಲಿ ಸತೀಶ್ ಚಪ್ಪರಿಕೆಯವರು ಹೇಳುವಂತೆ, ಈ ಕೃತಿಯಲ್ಲಿ ಇರುವ ಬಹುತೇಕ ಬರಹಗಳು, ವರ್ತಮಾನಕ್ಕೆ ನೀಡಲಾದ ತಕ್ಷಣದ ಸ್ಪಂದನ. ಅದು ಚುಟುಕು ಬರಹಗಳ ರೂಪದಲ್ಲಿ. ಹಾಗೆ ನೋಡಿದಲ್ಲಿ ಇಲ್ಲಿನ ಪ್ರತಿಯೊಂದು ಚುಟುಕಿಗೂ ಪೂರ್ಣ ಪ್ರಮಾಣದ ಲೇಖನವಾಗುವ ಎಲ್ಲ ಅರ್ಹತೆಗಳಿವೆ. ಒಂದು ರೀತಿಯಲ್ಲಿ ಇದು ಬರಹಗಳ ಮಿತಿಯೂ ಹೌದು. ಆದರೆ ಇದೇ ಸಂದರ್ಭದಲ್ಲಿ, ವರ್ತಮಾನದ ತಕ್ಷಣದ ಅಗತ್ಯವೂ ಹೌದು. ಇಲ್ಲಿರುವ ಲೇಖನಗಳು ಪುಟ್ಟದಾದರೂ ಅದು ಓದುಗರಲ್ಲಿ ಇನ್ನಷ್ಟು ವಿಸ್ತಾರವಾಗಿ ಬೆಳೆಯುವ ಶಕ್ತಿಯನ್ನು ತನ್ನದಾಗಿಸಿಕೊಂಡಿವೆ. ಈ ಲೇಖನಗಳು ಓದುಗನಲ್ಲಿ ಒಂದು ನಿರ್ದಿಷ್ಟ ಅಭಿಪ್ರಾಯವನ್ನು ತಳೆಯಲು ಒತ್ತಾಯ ಹೇರದೆ, ಒಂದು ಅಭಿಪ್ರಾಯದ ಕಡೆಗೆ ಮುನ್ನಡೆಯಲು ಒಳನೋಟಗಳನ್ನು ಕೊಡುತ್ತವೆ. ಅದು ಈ ಕೃತಿಯ ಹೆಗ್ಗಳಿಕೆಯಾಗಿದೆ.

 ಕೃತಿಯಲ್ಲಿ ಜಿ. ಎನ್. ಮೋಹನ್ ಅವರು ಹೇಳುವಂತೆ ‘‘ರಾಜಾರಾಂ ಅವರ ಬರಹಗಳು ಸದ್ದಿಲ್ಲದೆ ಒಂದು ವೈಚಾರಿಕ ಭೂಮಿಕೆಯನ್ನು ಸಿದ್ಧಪಡಿಸಿವೆ. ಒಂದು ಹೋರಾಟಕ್ಕೆ ಬೇಕಾದ, ಸಮಾಜದ ಮುನ್ನಡೆಗೆ ಬೇಕಾದ ಸ್ಪಷ್ಟತೆಯನ್ನು ಕೊಡಲು ಪ್ರಯತ್ನಿಸಿದೆ’’. ಸಾಧಾರಣವಾಗಿ ಪತ್ರಿಕೆಗಳಲ್ಲಿ ಪ್ರಕಟವಾಗುವ ಅಂಕಣಗಳ ಬಗ್ಗೆಯೇ ಚಿಂತಕರ ಟೀಕೆಗಳಿವೆ. ಅವುಗಳನ್ನು ತೀರಾ ಗಂಭೀರವಾಗಿ ತೆಗೆದುಕೊಳ್ಳಲು ಹಿಂಜರಿಯುವವರೂ ಇದ್ದಾರೆ. ಪುಟಗಳ ಮಿತಿ, ವಾರಗಳ ಮಿತಿ, ಪ್ರಸ್ತುತತೆ ಇವೆಲ್ಲವನ್ನು ದೃಷ್ಟಿಯಲ್ಲಿಟ್ಟುಕೊಂಡು, ಅಂಕಣಕಾರ ಪತ್ರಿಕಾ ಸಂಪಾದಕರ ಕೈಕೋಳದ ಜೊತೆಗೆ ಬರೆಯಬೇಕು ಎನ್ನುವ ಆರೋಪಗಳಿವೆ. ವೆಬ್ ಅಂಕಣಗಳ ಚೌಕಟ್ಟು ಅದಕ್ಕಿಂತಲೂ ಕಿರಿದಾದುದು. ಯಾಕೆಂದರೆ, ದೀರ್ಘವಾದಷ್ಟು ವೆಬ್‌ಗಳಲ್ಲಿ ಓದುವವರ ಸಂಖ್ಯೆ ಕಡಿಮೆಯಾಗುತ್ತದೆ ಎನ್ನುವ ಅಳಲು ವೆಬ್ ಸಂಪಾದಕರದಾಗಿರುತ್ತದೆ. ಅದುದರಿಂದ ಕಿರಿದಾದುದರೊಳ್ ಹಿರಿದನ್ನು ಹೇಳುವ ಲೇಖಕರ ಹುಡುಕಾಟದಲ್ಲಿ ಇರುತ್ತಾರೆ.ತಲ್ಲೂರಿನ ಬರಹಗಳಲ್ಲಿ ಸಂಪಾದಕರಾದ ಮೋಹನ್ ಅವರು ಅಂತಹದೊಂದು ಶಕ್ತಿಯನ್ನು ಗುರುತಿಸಿದ್ದಾರೆ ಮತ್ತು ತನ್ನ ಹೊಣೆಗಾರಿಕೆಯನ್ನು ಸಮರ್ಥವಾಗಿ ನಿಭಾಯಿಸಿದ್ದಾರೆ. ಇಲ್ಲಿ ನೂರಕ್ಕೂ ಅಧಿಕ ಕಿರು ಲೇಖನಗಳು ನಮ್ಮಾಳಗೆ ಹಿರಿದಾದ ಚಿಂತನೆಯ ಬೀಜವನ್ನು ಬಿತ್ತಿ ಹೋಗುತ್ತವೆ. ಅದನ್ನು ನೀರು ಹಾಕಿ ಉಳಿಸಿ, ಬೆಳೆಸುವುದು ಓದುಗನ ಹೊಣೆಗಾರಿಕೆಯಾಗಿದೆ. 316 ಪುಟಗಳ ಈ ಕೃತಿಯ ಮುಖಬೆಲೆ 150 ರೂಪಾಯಿ. ಪ್ರೊ-ಡಿಜಿ ಮುದ್ರಣ, ಉಡುಪಿ ಇವರು ಈ ಕೃತಿಯನ್ನು ಪ್ರಕಟಿಸಿದ್ದಾರೆ.