ಶತಕ ಗಳಿಕೆಯಲ್ಲಿ ಇನ್ನೊಂದು ದಾಖಲೆ ಬರೆದ ವಿರಾಟ್

 ಕೊಲಂಬೊ, ಆ.31: ಶ್ರೀಲಂಕಾ ವಿರುದ್ಧ ಪ್ರೇಮದಾಸ ಸ್ಟೇಡಿಯಂನಲ್ಲಿ ಗುರುವಾರ ನಡೆದ ನಾಲ್ಕನೆ ಏಕದಿನ ಪಂದ್ಯದಲ್ಲಿ 29ನೆ ಶತಕವನ್ನು ಸಿಡಿಸಿದ ಭಾರತದ ನಾಯಕ ವಿರಾಟ್ ಕೊಹ್ಲಿ ಶ್ರೀಲಂಕಾದ ಮಾಜಿ ಹಿರಿಯ ಬ್ಯಾಟ್ಸ್‌ಮನ್ ಸನತ್ ಜಯಸೂರ್ಯ ಅವರ ಶತಕದ ದಾಖಲೆ(28)ಯನ್ನು ಹಿಂದಿಕ್ಕಿದರು.

ನಾಲ್ಕನೆ ಏಕದಿನ ಪಂದ್ಯಕ್ಕೆ ಮೊದಲು ತಲಾ 28 ಶತಕಗಳನ್ನು ಗಳಿಸಿದ್ದ  ಕೊಹ್ಲಿ  ಹಾಗೂ ಜಯಸೂರ್ಯ ಗರಿಷ್ಠ ಏಕದಿನ ಶತಕ ಗಳಿಸಿದ ಬ್ಯಾಟ್ಸ್‌ಮನ್‌ಗಳ ಪಟ್ಟಿಯಲ್ಲಿ ಮೂರನೆ ಸ್ಥಾನವನ್ನು ಹಂಚಿಕೊಂಡಿದ್ದರು.

96 ಎಸೆತಗಳಲ್ಲಿ 131 ರನ್ ಗಳಿಸಿದ ಕೊಹ್ಲಿ ಚಾಂಪಿಯನ್ ಬ್ಯಾಟ್ಸ್‌ಮನ್ ಸಚಿನ್ ತೆಂಡುಲ್ಕರ್(49 ಶತಕ) ಹಾಗೂ ರಿಕಿ ಪಾಂಟಿಂಗ್(30) ಬಳಿಕ ಗರಿಷ್ಠ ಶತಕ ಗಳಿಸಿದ ವಿಶ್ವದ ಮೂರನೆ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 28ರ ಹರೆಯದ ದಿಲ್ಲಿ ದಾಂಡಿಗ ಕೊಹ್ಲಿ ಇನ್ನೊಂದು ಶತಕ ಗಳಿಸಿದರೆ ಆಸೀಸ್‌ನ ಮಾಜಿ ನಾಯಕ ಪಾಂಟಿಂಗ್ ಶತಕದ ದಾಖಲೆಯನ್ನು ಸರಿಗಟ್ಟಲಿದ್ದಾರೆ.

  ಕೊಹ್ಲಿ ಕೇವಲ 76 ಎಸೆತಗಳಲ್ಲಿ ಶ್ರೀಲಂಕಾದ ವಿರುದ್ಧ ಏಳನೆ ಶತಕ ಪೂರೈಸಿದರು. ಮಿಲಿಂದ ಸಿರಿವರ್ದನ ಎಸೆತವನ್ನು ಬೌಂಡರಿಗೆ ಅಟ್ಟುವ ಮೂಲಕ ಮೂರಂಕೆಯನ್ನು ದಾಟಿದರು. ಇದರಲ್ಲಿ 14 ಬೌಂಡರಿ, 1 ಸಿಕ್ಸರ್‌ಗಳಿದ್ದವು. 96 ಎಸೆತಗಳಲ್ಲಿ 17 ಬೌಂಡರಿ ಹಾಗೂ 2 ಸಿಕ್ಸರ್‌ಗಳನ್ನೊಳಗೊಂಡ 131 ರನ್ ಗಳಿಸಿದ ಕೊಹ್ಲಿ 300ನೆ ಏಕದಿನ ಪಂದ್ಯವನ್ನಾಡಿದ ಲಸಿತ ಮಾಲಿಂಗಗೆ ವಿಕೆಟ್ ಒಪ್ಪಿಸಿದರು.

ಪ್ಲೆಸಿಸ್ ದಾಖಲೆ ಮುರಿದ ಕೊಹ್ಲಿ: ಈ ವರ್ಷ ಏಕದಿನ ಕ್ರಿಕೆಟ್‌ನಲ್ಲಿ ಗರಿಷ್ಠ ಸ್ಕೋರ್ ದಾಖಲಿಸಿದ ಕೊಹ್ಲಿ ದಕ್ಷಿಣ ಆಫ್ರಿಕದ ನಾಯಕ ಎಫ್‌ಡು ಪ್ಲೆಸಿಸ್ ದಾಖಲೆಯನ್ನು ಮುರಿದರು.

ಗುರುವಾರ ಶತಕ ಸಿಡಿಸಿದ ಕೊಹ್ಲಿ ಈ ವರ್ಷ ಆಡಿದ 17 ಏಕದಿನ ಪಂದ್ಯಗಳಲ್ಲಿ 85.20ರ ಸರಾಸರಿಯಲ್ಲಿ ಒಟ್ಟು 907 ರನ್ ಗಳಿಸಿದ್ದಾರೆ. ಪ್ಲೆಸಿಸ್ 16 ಪಂದ್ಯಗಳಲ್ಲಿ 58.14ರ ಸರಾಸರಿಯಲ್ಲಿ 814 ರನ್ ಗಳಿಸಿ ಗರಿಷ್ಠ ಸ್ಕೋರರ್ ಎನಿಸಿಕೊಂಡಿದ್ದರು.

ಐಸಿಸಿ ಚಾಂಪಿಯನ್ಸ್ ಟ್ರೋಫಿ, ವೆಸ್ಟ್‌ಇಂಡೀಸ್ ಹಾಗೂ ಇಂಗ್ಲೆಂಡ್ ವಿರುದ್ಧದ ಏಕದಿನ ಸರಣಿಯಲ್ಲಿ ಕೊಹ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದು, ಈವರ್ಷ ಒಟ್ಟು 3 ಶತಕ ದಾಖಲಿಸಿದ್ದಾರೆ. ಸ್ವದೇಶಿ ಸರಣಿಯಲ್ಲಿ ಇಂಗ್ಲೆಂಡ್ ವಿರುದ್ಧ ಹಾಗೂ ಜುಲೈನಲ್ಲಿ ವೆಸ್ಟ್‌ಇಂಡೀಸ್‌ನ ವಿರುದ್ಧ ಕೊಹ್ಲಿ ಶತಕ ಗಳಿಸಿದ್ದಾರೆ. ಈ ಮೂಲಕ 2017ರಲ್ಲಿ ಗರಿಷ್ಠ ಸ್ಕೋರ್ ದಾಖಲಿಸಿದ್ದ ಇಂಗ್ಲೆಂಡ್‌ನ ಇಯಾನ್ ಮೊರ್ಗನ್ ಹಾಗೂ ಜೋ ರೂಟ್ ದಾಖಲೆಯನ್ನು ಹಿಂದಿಕ್ಕಿದ್ದರು. ಈ ವರ್ಷ ಗರಿಷ್ಠ ಸ್ಕೋರ್ ಗಳಿಸಿದವರ ಪಟ್ಟಿಯಲ್ಲಿ ಕೊಹ್ಲಿ ಮೊದಲ ಸ್ಥಾನದಲ್ಲಿದ್ದರೆ, ರೂಟ್(785) ಹಾಗೂ ಪ್ಲೆಸಿಸ್(814) ಕ್ರಮವಾಗಿ 2ನೆ ಹಾಗೂ 3ನೆ ಸ್ಥಾನದಲ್ಲಿದ್ದಾರೆ.