ಭ್ರಷ್ಟ ರಾಜಕಾರಣಿಗಳ ಅಕ್ರಮ ಆಸ್ತಿಯ ವಿವರ ಬಹಿರಂಗ: ಸುಪ್ರೀಂಕೋರ್ಟ್ ಸಲಹೆ
ಸುಪ್ರೀಂಕೋರ್ಟ್ ಸಲಹೆ ಹೊಸದಿಲ್ಲಿ, ಸೆ.12: ಅಕ್ರಮ ಆಸ್ತಿ ಪ್ರಕರಣದ ಹಿನ್ನೆಲೆಯಲ್ಲಿ ತನಿಖೆ ಎದುರಿಸುತ್ತಿರುವ ಶಾಸಕರು ಹಾಗೂ ಸಂಸದರು ಮತ್ತೆ ಅಧಿಕಾರಕ್ಕೆ ಬರುವುದು ಈ ದೇಶದಲ್ಲಿ ಕಳೆದ ಸುಮಾರು 30 ವರ್ಷಗಳಿಂದ ನಡೆದು ಬರುತ್ತಿರುವ ಅಚ್ಚರಿಯ ವಿದ್ಯಮಾನವಾಗಿದೆ ಎಂದು ಹೇಳಿರುವ ಸುಪ್ರೀಂಕೋರ್ಟ್, ಭ್ರಷ್ಟ ರಾಜಕಾರಣಿಗಳ ಅಕ್ರಮ ಆಸ್ತಿಯ ವಿವರವನ್ನು ಬಹಿರಂಗಗೊಳಿಸಬೇಕು ಎಂದು ಕೇಂದ್ರಕ್ಕೆ ಸಲಹೆ ನೀಡಿದೆ.
ಸದಸ್ಯತ್ವದ ಐದು ವರ್ಷಾವಧಿಯಲ್ಲಿ ರಾಜಕಾರಣಿಗಳ ಆಸ್ತಿಯಲ್ಲಿ ಪವಾಡ ಸದೃಶ ಹೆಚ್ಚಳವಾಗುತ್ತಿದೆ. ನಿಷ್ಪ್ರಯೋಜಕ ತನಿಖಾ ಪ್ರಕ್ರಿಯೆ ಅಥವಾ ಅವರಿಗೆ ಒದಗಿಸಲಾಗಿರುವ ‘ವಿನಾಯಿತಿ ಹಾಗೂ ಅಧಿಕಾರ’ ಇದಕ್ಕೆ ಕಾರಣವಾಗಿರಬಹುದೇ ಎಂದು ಸುಪ್ರೀಂಕೋರ್ಟ್ನ ನ್ಯಾಯಮೂರ್ತಿಗಳಾದ ಜೆ.ಚೆಲಮೇಶ್ವರ್ ಮತ್ತು ಎಸ್.ಅಬ್ದುಲ್ ನಝೀರ್ ಅವರನ್ನೊಳಗೊಂಡಿರುವ ನ್ಯಾಯಪೀಠ ಪ್ರಶ್ನಿಸಿದೆ.
2014ಕ್ಕೆ ಹೋಲಿಸಿದರೆ 2019ರ ಚುನಾವಣೆ ಸಂದರ್ಭ ಶಾಸಕ ಅಥವಾ ಸಂಸದರ ಆಸ್ತಿಯ ಮೊತ್ತ 10 ಪಟ್ಟು ಹೆಚ್ಚಳವಾದರೆ , ಈ ರೀತಿಯ ಗಮನಾರ್ಹ ಹೆಚ್ಚಳದ ಬಗ್ಗೆ ತನಿಖೆ ನಡೆಸಬಾರದೇಕೆ. ಕಳೆದ ಐದು ವರ್ಷಾವಧಿಯಲ್ಲಿ ತನ್ನ ಆಸ್ತಿಯಲ್ಲಿ ಶೇ.1000ದಷ್ಟು ಹೆಚ್ಚಳವಾಗಿರುವ ಬಗ್ಗೆ ಓರ್ವ ಅಭ್ಯರ್ಥಿ ಘೋಷಿಸಿದ ತಕ್ಷಣ ಆ ಕುರಿತು ತನಿಖೆ ನಡೆಸುವ ವ್ಯವಸ್ಥೆಯೊಂದನ್ನು ಆರಂಭಿಸುವಂತೆ ಸರಕಾರಕ್ಕೆ ಸಲಹೆ ನೀಡಿತು.
ಇದಕ್ಕೆ ಉತ್ತರಿಸಿದ ಅಟಾರ್ನಿ ಜನರಲ್ ಕೆ.ಕೆ.ವೇಣುಗೋಪಾಲ್, ರಾಜಕಾರಣಿಗಳ ಆಸ್ತಿಯಲ್ಲಿ ಅಸಹಜ ಹೆಚ್ಚಳವಾಗಿರುವುದು ಗಮನಕ್ಕೆ ಬಂದೊಡನೆ ಕ್ರಿಮಿನಲ್ ಪ್ರಕರಣ ದಾಖಲಿಸಿ ಕ್ರಮ ಕೈಗೊಳ್ಳಲಾಗಿದೆ ಎಂದರು. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಪೀಠ, ಇಂತಹ ಕ್ರಮದ ಹೊರತಾಗಿಯೂ ಕಳೆದ ಸುಮಾರು 30 ವರ್ಷಗಳಿಂದ ಭ್ರಷ್ಟ ರಾಜಕಾರಣಿಗಳ ಆಸ್ತಿ ಗಣನೀಯ ಪ್ರಮಾಣದಲ್ಲಿ ಹೆಚ್ಚಳವಾಗುತ್ತಿದೆ. ಈ ನಿಟ್ಟಿನಲ್ಲಿ ಇನ್ನಷ್ಟು ಕಠಿಣ ಕ್ರಮ ಕೈಗೊಳ್ಳಲು ಸಾಧ್ಯವಿಲ್ಲವೇ ಎಂದು ಪ್ರಶ್ನಿಸಿತು.
ರಾಜಕೀಯವನ್ನು ಅಪರಾಧೀಕರಣಗೊಳಿಸುವ ಮತ್ತು ರಾಜಕಾರಣಿಗಳು, ಕ್ರಿಮಿನಲ್ಗಳು ಮತ್ತು ಅಧಿಕಾರವರ್ಗದ ನಡುವೆ ಇರುವ ಅಕ್ರಮ ಹೊಂದಾಣಿಕೆಯ ಬಗ್ಗೆ 1993ರಲ್ಲಿ ಸಲ್ಲಿಸಲಾಗಿದ್ದ ವೋರ ಸಮಿತಿ ವರದಿಯಲ್ಲಿ ತಿಳಿಸಲಾಗಿದೆ ಎಂದು ನ್ಯಾಯಪೀಠ ಸರಕಾರಕ್ಕೆ ತಿಳಿಸಿತು. ರಾಜಕಾರಣಿಗಳ ಅಕ್ರಮ ಆಸ್ತಿಯ ವಿವರದ ಕುರಿತು ಜನತೆಗೆ ಮಾಹಿತಿ ನೀಡಬೇಕು. ರಾಜಕಾರಣಿಗಳಿಗೆ ಕೆಲವು ವಿನಾಯಿತಿ ನೀಡುವುದಕ್ಕೆ ಅರ್ಥವಿಲ್ಲ . ರಾಜಕಾರಣಿಗಳು ಸಾರ್ವಜನಿಕರ ಸೇವಕರು. ಹಾಗಿರುವಾಗ ಅವರ ಆದಾಯ ತೆರಿಗೆ ವಿವರನ್ನೂ ಜನರಿಗೆ ತಿಳಿಯಪಡಿಸಬೇಕು ಎಂದು ನ್ಯಾಯಪೀಠ ತಿಳಿಸಿತು.
ಆದರೆ ಮಾಹಿತಿ ಹಕ್ಕು (ಆರ್ಟಿಐ) ಕಾಯ್ದೆಯಡಿ ಆದಾಯ ತೆರಿಗೆ ವಿವರ ಬಹಿರಂಗಗೊಳಿಸುವಂತಿಲ್ಲ. ಅಲ್ಲದೆ, ಕೇವಲ ರಾಜಕಾರಣಿಗಳ ಆದಾಯ ತೆರಿಗೆ ವಿವರ ಬಹಿರಂಗಗೊಳಿಸಿದರೆ ಪಕ್ಷಪಾತ ತೋರಿದಂತಾಗುತ್ತದೆ ಎಂದು ರಾಜಕಾರಣಿಗಳು ಭಾವಿಸುತ್ತಾರೆ ಎಂದು ಅಟಾರ್ನಿ ಜನರಲ್ ತಿಳಿಸಿದರು.
‘ಪಾನ್ ಕಾರ್ಡ್’ ಮಾಹಿತಿ ಆದಾಯದ ಸಂಪೂರ್ಣ ವಿವರ ಒಳಗೊಂಡಿರುವುದಿಲ್ಲ ಎಂದು ಒಪ್ಪಿಕೊಂಡ ಅಟಾರ್ನಿ ಜನರಲ್, ಕೆಲವೊಂದು ಸಂದರ್ಭದಲ್ಲಿ ಚೆಕ್ ಮೂಲಕ ಹಣ ಪಾವತಿಸಲು ರಾಜಕಾರಣಿಗಳು ನಿರಾಕರಿಸುತ್ತಾರೆ ಎಂದು ತಿಳಿಸಿದರು.
ಕೇಂದ್ರ ಸರಕಾರವು 26 ಲೋಕಸಭೆ ಸಂಸದರು, ಇಬ್ಬರು ರಾಜ್ಯಸಭೆ ಸಂಸದರು ಹಾಗೂ 215 ಶಾಸಕರ ವಿರುದ್ಧ ಕೈಗೊಂಡಿರುವ ಅಕ್ರಮ ಆಸ್ತಿ ಪ್ರಕರಣದ ತನಿಖೆಯ ವಿವವನ್ನು ಸೀಲ್ ಮಾಡಲಾದ ಕವರ್ನಲ್ಲಿ ನ್ಯಾಯಾಲಯಕ್ಕೆ ನೀಡಿದೆ ಎಂಬ ವರದಿಯ ಹಿನ್ನೆಲೆಯಲ್ಲಿ, ಇಂತಹ ಪ್ರಕರಣಗಳನ್ನು ತನಿಖೆ ನಡೆಸುವ ಒಂದು ವ್ಯವಸ್ಥೆ ರೂಪಿಸಬೇಕು ಎಂದು ಎನ್ಜಿಒ ಸಂಸ್ಥೆ ‘ಲೋಕ್ ಪ್ರಹಾರಿ’ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ಸಂದರ್ಭ ನ್ಯಾಯಪೀಠ , ರಾಜಕಾರಣಿಗಳ ಅಕ್ರಮ ಆಸ್ತಿ ಪ್ರಕರಣದ ತನಿಖೆ ಕ್ಷಿಪ್ರ ನ್ಯಾಯಾಲಯದಲ್ಲಿ ನಡೆಯಬೇಕು ಎಂದು ಸಲಹೆ ನೀಡಿತು.
