ಈ ವರ್ಷದ ಗ್ರ್ಯಾಮ್ ಸ್ಲಾಮ್ ಟೂರ್ನಿಯಲ್ಲಿ ಫೆಡರರ್, ನಡಾಲ್ ಪಾರಮ್ಯ

ನ್ಯೂಯಾರ್ಕ್, ಸೆ.12: ವಿಶ್ವದ ನಂ.1 ಆಟಗಾರ ರಫೆಲ್ ನಡಾಲ್ ಹಾಗೂ ನಂ.2ನೆ ಆಟಗಾರ ರೋಜರ್ ಫೆಡರರ್ ಈ ವರ್ಷದ ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ ಪ್ರಾಬಲ್ಯ ಮೆರೆದು ಗಮನ ಸೆಳೆದಿದ್ದಾರೆ.

2017ರ ಋತುವಿಗಿಂತ ಮೊದಲು ನಡಾಲ್ 2014ರಲ್ಲಿ ಕೊನೆಯ ಬಾರಿ ಫ್ರಾನ್ಸ್‌ನಲ್ಲಿ ಗ್ರಾನ್‌ಸ್ಲಾಮ್ ಪ್ರಶಸ್ತಿ ಜಯಿಸಿದ್ದರು. ಫೆಡರರ್ 2012ರಲ್ಲಿ ವಿಂಬಲ್ಡನ್ ಟೂರ್ನಿಯನ್ನು ಗೆದ್ದುಕೊಂಡಿದ್ದರು. ಈ ವರ್ಷ ಇಬ್ಬರು ಹಿರಿಯ ಆಟಗಾರರು ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ ಯಶಸ್ವಿ ಅಭಿಯಾನದಿಂದ ಗಮನ ಸೆಳೆದಿದ್ದಾರೆ. ವಿಶ್ವ ರ್ಯಾಂಕಿಂಗ್ ಪಟ್ಟಿ ಅವರ ಸಾಧನೆಯನ್ನು ಪ್ರತಿಬಿಂಬಿಸುತ್ತಿದೆ.

ಇಬ್ಬರೂ ಆಟಗಾರರ ವಯಸ್ಸು 30 ದಾಟಿದೆ. 31ರ ಹರೆಯದ ನಡಾಲ್ ಗಾಯಾಳು ಸಮಸ್ಯೆಯಿಂದ ಮುಕ್ತವಾದರೆ ಇನ್ನಷ್ಟು ವರ್ಷ ಆಡಬಹುದು. 36ರ ಹರೆಯದ ಫೆಡರರ್ ವಯಸ್ಸು ತನ್ನ ಪ್ರದರ್ಶನಕ್ಕೆ ಅಡ್ಡಿಯಾಗಿಲ್ಲ ಎಂದು ತೋರಿಸಿಕೊಟ್ಟಿದ್ದಾರೆ.

 ಫೆಡರರ್ ಹಾಗೂ ನಡಾಲ್‌ರಿಂದಾಗಿಯೇ ಒಂದೂವರೆ ದಶಕದಿಂದ ಟೆನಿಸ್ ಉನ್ನತ ಹಂತ ತಲುಪಿದೆ. ಇಬ್ಬರು ಒಟ್ಟಿಗೆ 35 ಗ್ರಾನ್‌ಸ್ಲಾಮ್ ಸಿಂಗಲ್ಸ್ ಪ್ರಶಸ್ತಿಗಳನ್ನು ಜಯಿಸಿದ್ದಾರೆ. ಫೆಡರರ್ ಒಟ್ಟು 19 ಪ್ರಶಸ್ತಿ ಜಯಿಸಿ ದಾಖಲೆ ನಿರ್ಮಿಸಿದರೆ, ನಡಾಲ್ 16 ಪ್ರಶಸ್ತಿ ಜಯಿಸುವ ಮೂಲಕ ಸಾರ್ವಕಾಲಿಕ ಶ್ರೇಷ್ಠರ ಸಾಲಿನಲ್ಲಿ ದ್ವಿತೀಯ ಸಾಲಿನಲ್ಲಿದ್ದಾರೆ.

ಈ ಇಬ್ಬರು ಆಟಗಾರರು 2004ರಿಂದ 2010ರ ತನಕ ಟೆನಿಸ್ ಲೋಕದಲ್ಲಿ ಪ್ರಾಬಲ್ಯ ಮೆರೆದಿದ್ದರು. ಏಳು ವರ್ಷಗಳ ಅವಧಿಯಲ್ಲಿ 28 ಗ್ರಾನ್‌ಸ್ಲಾಮ್ ಸಿಂಗಲ್ಸ್ ಪ್ರಶಸ್ತಿಗಳ ಪೈಕಿ 24 ಪ್ರಶಸ್ತಿಗಳನ್ನು ಜಯಿಸಿದ್ದರು. ಈ ಅವಧಿಯಲ್ಲಿ ಫೆಡರರ್ 15 ಪ್ರಮುಖ ಪ್ರಶಸ್ತಿಯನ್ನು ಗೆದ್ದುಕೊಂಡರೆ, ನಡಾಲ್ 9 ಟ್ರೋಫಿಗಳನ್ನು ಗೆದ್ದುಕೊಂಡಿದ್ದರು. 1999ರಲ್ಲಿ ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ ಭಾಗವಹಿಸಲು ಆರಂಭಿಸಿದ ನಂತರ ಫೆಡರರ್ ಕಳೆದ ವರ್ಷ ಗಾಯದ ಸಮಸ್ಯೆಯಿಂದಾಗಿ ಫ್ರೆಂಚ್ ಓಪನ್ ಹಾಗೂ ಯುಎಸ್ ಓಪನ್ ಟೂರ್ನಿಯಿಂದ ಹೊರಗುಳಿದಿದ್ದರು. ಈ ವರ್ಷದ ಆರಂಭದಲ್ಲಿ ಆಸ್ಟ್ರೇಲಿಯನ್ ಓಪನ್‌ನಲ್ಲಿ 5ನೆ ಬಾರಿ ಪ್ರಶಸ್ತಿ ಜಯಿಸುವ ಮೂಲಕ ಫೆಡರರ್ ಐದು ವರ್ಷಗಳ ಪ್ರಶಸ್ತಿಯ ಬರವನ್ನು ನೀಗಿಸಿಕೊಂಡಿದ್ದರು. ತನ್ನ ನೆಚ್ಚಿನ ಹಸಿರುಹುಲ್ಲಿನ ಅಂಗಣದಲ್ಲಿ ನಡೆದ ವಿಂಬಲ್ಡನ್ ಟೂರ್ನಿಯನ್ನು 8ನೆ ಬಾರಿ ಗೆಲ್ಲುವ ಮೂಲಕ ದಾಖಲೆ ನಿರ್ಮಿಸಿದರು.

2003ರಲ್ಲಿ ಗ್ರಾನ್‌ಸ್ಲಾಮ್ ಟೂರ್ನಿಗೆ ಕಾಲಿಟ್ಟ ಬಳಿಕ ಸ್ಪೇನ್‌ನ ನಡಾಲ್‌ಗೆ ಗಾಯದ ಸಮಸ್ಯೆ ಕಾಡುತ್ತಾ ಬಂದಿದೆ. ಇದರಿಂದಾಗಿ ಅವರು 8 ಗ್ರಾನ್‌ಸ್ಲಾಮ್ ಟೂರ್ನಿಯಿಂದ ವಂಚಿತರಾಗಿದ್ದರು. 2014ರಲ್ಲಿ 9ನೆ ಬಾರಿ ಫ್ರೆಂಚ್ ಓಪನ್ ಪ್ರಶಸ್ತಿಯನ್ನು ಜಯಿಸಿದ ಬಳಿಕ ನಡಾಲ್ ಕ್ವಾರ್ಟರ್ ಫೈನಲ್‌ನಲ್ಲಿ ಎಡವುತ್ತಾ ಬಂದಿದ್ದರು. ಈ ವರ್ಷ ಮೂರು ಪ್ರಮುಖ ಟೂರ್ನಿಗಳಲ್ಲಿ ಫೈನಲ್‌ಗೆ ತಲುಪಲು ಯಶಸ್ವಿಯಾಗಿರುವ ನಡಾಲ್ ಒಂದರಲ್ಲಿ ಸೋಲು, ಎರಡರಲ್ಲಿ ಜಯ ಸಾಧಿಸಿದ್ದಾರೆ. ಮೆಲ್ಬೋರ್ನ್‌ನಲ್ಲಿ ಜನವರಿಯಲ್ಲಿ ನಡೆದ ಆಸ್ಟ್ರೇಲಿಯನ್ ಓಪನ್ ಫೈನಲ್‌ನಲ್ಲಿ ಫೆಡರರ್ ವಿರುದ್ಧ ಶರಣಾಗಿದ್ದ ನಡಾಲ್ ಫ್ರೆಂಚ್ ಓಪನ್‌ನಲ್ಲಿ 10ನೆ ಬಾರಿ ಪ್ರಶಸ್ತಿ ಜಯಿಸಿದ ಮೊದಲ ಆಟಗಾರ ಎಂಬ ಕೀರ್ತಿಗೆ ಭಾಜನರಾದರು. ರವಿವಾರ ನಡೆದ ಯುಎಸ್ ಓಪನ್‌ನಲ್ಲಿ ದಕ್ಷಿಣ ಆಫ್ರಿಕದ ಕೆವಿನ್ ಆ್ಯಂಡರ್ಸನ್‌ರನ್ನು ಮಣಿಸಿ ಪ್ರಶಸ್ತಿಯನ್ನು ಜಯಿಸಿ 2017ರ ಋತುವನ್ನು ಗೆಲುವಿನೊಂದಿಗೆ ಕೊನೆಗೊಳಿಸಿದ್ದಾರೆ.

 ಕ್ಯಾಲೆಂಡರ್ ವರ್ಷದಲ್ಲಿ ನಾಲ್ಕನೆ ಬಾರಿ ಫೆಡರರ್ ಹಾಗೂ ನಡಾಲ್ ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ ಮೇಲುಗೈ ಸಾಧಿಸಿದ್ದಾರೆ. 2006, 2007 ಹಾಗೂ 2010ರಲ್ಲಿ ಈ ಸಾಧನೆ ಮಾಡಿದ್ದರು. 2006 ಹಾಗೂ 2007ರಲ್ಲಿ ಫೆಡರರ್ ಮೂರು(ಆಸ್ಟ್ರೇಲಿಯನ್, ವಿಂಬಲ್ಡನ್, ಯುಎಸ್ ಓಪನ್) ಹಾಗೂ ನಡಾಲ್ ಒಂದು(ಫ್ರೆಂಚ್ ಓಪನ್) ಪ್ರಶಸ್ತಿಯನ್ನು ಜಯಿಸಿದ್ದರು. 2010ರಲ್ಲಿ ನಡಾಲ್ ಫ್ರೆಂಚ್ ಓಪನ್, ವಿಂಬಲ್ಡನ್ ಹಾಗೂ ಯುಎಸ್ ಓಪನ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದರು. ಆ ವರ್ಷ ಫೆಡರರ್ ಆಸ್ಟ್ರೇಲಿಯನ್ ಓಪನ್ ಜಯಿಸಿದ್ದರು. ಈ ವರ್ಷ ತಲಾ ಎರಡು ಪ್ರಶಸ್ತಿಯನ್ನು ಜಯಿಸಿದ್ದಾರೆ.

ಫೆಡರರ್ ಹಾಗೂ ನಡಾಲ್‌ರ ಪಾರಮ್ಯದ ನಡುವೆ ಮಿಂಚಿದವರು ಸರ್ಬಿಯದ ನೊವಾಕ್ ಜೊಕೊವಿಕ್. ಜೊಕೊವಿಕ್ 2011 ಹಾಗೂ 2015ರಲ್ಲಿ ಮೂರು ಗ್ರಾನ್‌ಸ್ಲಾಮ್ ಪ್ರಶಸ್ತಿಗಳನ್ನು ಜಯಿಸಿದ್ದರು. ಆದರೆ ಫ್ರೆಂಚ್‌ಓಪನ್ ಪ್ರಶಸ್ತಿ ಜಯಿಸಲು ಸಾಧ್ಯವಾಗಿರಲಿಲ್ಲ. 2011ರಲ್ಲಿ ನಡಾಲ್ ಹಾಗೂ 2015ರಲ್ಲಿ ಸ್ಟಾನ್ ವಾವ್ರಿಂಕ ಫ್ರೆಂಚ್ ಓಪನ್ ಪ್ರಶಸ್ತಿ ಜಯಿಸಿದ್ದರು. 2016ರಲ್ಲಿ ಫ್ರೆಂಚ್ ಓಪನ್ ಪ್ರಶಸ್ತಿ ಜಯಿಸಿದ್ದ ಜೊಕೊವಿಕ್ ಎಲ್ಲ ನಾಲ್ಕು ಗ್ರಾನ್‌ಸ್ಲಾಮ್ ಪ್ರಶಸ್ತಿ ಜಯಿಸಿದ ಸಾಧನೆ ಮಾಡಿದ್ದರು.