ವಿಭಿನ್ನ ಗೆಟಪ್ ನಲ್ಲಿ ಆಮಿರ್

ಧೂಮ್ 3ನಲ್ಲಿ ಭರ್ಜರಿ ಆ್ಯಕ್ಷನ್ ದೃಶ್ಯಗಳಿಂದ ಪ್ರೇಕ್ಷಕರನ್ನು ರಂಜಿಸಿದ್ದ ಆಮಿರ್ ಖಾನ್ ಇದೀಗ ತನ್ನ ಮುಂದಿನ ಚಿತ್ರ ‘ಥಗ್ಸ್ ಆಫ್ ಹಿಂದೂಸ್ಥಾನ್’ನಲ್ಲಿ ಇನ್ನೊಂದು ಅಚ್ಚರಿ ನೀಡಲು ತಯಾರಾಗಿದ್ದಾರೆ. ಈ ಚಿತ್ರದ ಮೂಲಕ ಆಮಿರ್ ಇದೇ ಮೊದಲ ಬಾರಿಗೆ ಬಾಲಿವುಡ್‌ನ ಬಿಗ್‌ಬಿ ಅಮಿತಾಭ್ ಬಚ್ಚನ್ ಜೊತೆ ನಟಿಸುತ್ತಿದ್ದಾರೆ.

ಮಿಸ್ಟರ್ ಪರ್‌ಫೆಕ್ಷನಿಸ್ಟ್ ಎಂದೇ ಹೆಸರಾದ ಆಮಿರ್ ಯಾವುದೇ ಪಾತ್ರವಾದರೂ ಸರಿ, ಅದರಲ್ಲಿ ನೈಜತೆ, ಪರಿಪೂರ್ಣತೆಯನ್ನು ನೀಡುವಲ್ಲಿ ಸಿದ್ಧಹಸ್ತರು. ಥಗ್ಸ್ ಆಫ್ ಹಿಂದೂಸ್ಥಾನ್‌ನಲ್ಲಿ ಅವರದು ದರೋಡೆಕೋರನ ಪಾತ್ರವಾಗಿರುವುದರಿಂದ ರಗ್ಗೆಡ್ ಲುಕ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಚಿತ್ರದ ಸೆಟ್‌ನಲ್ಲಿ ಮೇಕಪ್‌ನಲ್ಲಿರುವ ಅವರ ಕೆಲವು ಫೋಟೊಗಳು ಅಂತರ್ಜಾಲ ತಾಣಗಳಲ್ಲಿ ಸೋರಿಕೆಯಾಗಿದ್ದು ಸಾಕಷ್ಟು ವೈರಲ್ ಆಗಿದೆ. ಕುರುಚಲು ಗಡ್ಡ, ಕೆದರಿದ ಉದ್ದನೆಯ ಕೂದಲು ಹಾಗೂ ಮಾಸಿದ ಬಟ್ಟೆ ಧರಿಸಿರುವ ಆಮಿರ್, ಚಿತ್ರಕ್ಕಾಗಿ ಗುರುತಿಸಲು ಸಾಧ್ಯವಾಗದಷ್ಟು ಬದಲಾಗಿದ್ದಾರೆ. ಗಜನಿ ಚಿತ್ರಕ್ಕಾಗಿ ದೇಹದಂಡಿಸಿ ಸಿಕ್ಸ್‌ಪ್ಯಾಕ್ ದೇಹದಾರ್ಢ್ಯ ಬೆಳೆಸಿಕೊಂಡಿದ್ದ ಆಮಿರ್ ಈ ಚಿತ್ರಕ್ಕಾಗಿ ತುಂಬಾ ತೆಳ್ಳಗಾಗಿದ್ದಾರೆ. ಕತ್ರಿನಾ ಕೈಫ್ ಹಾಗೂ ಫಾತಿಮಾ ಸನಾ ಶೇಖ್ ಚಿತ್ರದ ನಾಯಕಿಯರು. ಸ್ವಾತಂತ್ರ ಪೂರ್ವದಲ್ಲಿ ಭಾರತವನ್ನೇ ಬೆಚ್ಚಿಬೀಳಿಸಿದ್ದ ಠಕ್ಕರೆಂಬ ದರೋಡೆಕೋರರ ಕುರಿತಾದ ಕಥಾವಸ್ತುವನ್ನು ಹೊಂದಿರುವ ಈ ಚಿತ್ರವನ್ನು ವಿಜಯ್ ಕೃಷ್ಣ ಆಚಾರ್ಯ ನಿರ್ದೇಶಿಸಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದಲ್ಲಿ ‘ಥಗ್ಸ್ ಆಫ್ ಹಿಂದೂಸ್ಥಾನ್’ ಮುಂದಿನ ವರ್ಷದ ನವೆಂಬರ್‌ನಲ್ಲಿ ತೆರೆಗೆ ಅಪ್ಪಳಿಸಲಿದೆ.