'ಹೃತಿಕ್' ಸೂಪರ್ 30
ಬಾಲಿವುಡ್ನಲ್ಲಿ ಈಗ ಬಯೋಪಿಕ್ ಚಿತ್ರಗಳ ಸುವರ್ಣ ಯುಗವಾಗಿದೆ. ಭಾಗ್ ಮಿಲ್ಕಾ ಭಾಗ್, ಧೋನಿ, ಸಚಿನ್, ಮೇರಿಕೋಮ್ ಹೀಗೆ ಸಾಲುಸಾಲಾಗಿ ಖ್ಯಾತ ಸಾಧಕರ ಬದುಕಿನ ಕಥೆಯನ್ನಾಧರಿಸಿದ ಚಿತ್ರಗಳು ತೆರೆಕಂಡಿದ್ದು, ಸಾಕಷ್ಟು ಹೆಸರು, ಹಣ ಗಳಿಸಿವೆ. ಇದೀಗ ಖ್ಯಾತ ಗಣಿತಶಾಸ್ತ್ರ ಆನಂದ್ಕುಮಾರ್ ಅವರ ಜೀವನಕಥೆಯನ್ನಾಧರಿಸಿದ ಚಿತ್ರವೊಂದು ನಿರ್ಮಾಣಗೊಳ್ಳಲಿದೆ. ‘‘ಸೂಪರ್ 30’’ ಎಂದು ಹೆಸರಿಡಲಾದ ಈ ಚಿತ್ರದಲ್ಲಿ ಸೂಪರ್ಹೀರೋ ಹೃತಿಕ್ ರೋಶನ್, ಆನಂದ್ಕುಮಾರ್ನ ಪಾತ್ರದಲ್ಲಿ ನಟಿಸಲಿರುವುದು ಈಗ ಕನ್ಫರ್ಮ್ ಆಗಿದೆ.
ವಿಕಾಸ್ ಬೆಹೆಲ್ ಆ್ಯಕ್ಷನ್ ಕಟ್ ಹೇಳಲಿರುವ ಈ ಚಿತ್ರವು ಪ್ರತೀ ವರ್ಷ 30 ಮಂದಿ ಪ್ರತಿಭಾವಂತ ಬಡವಿದ್ಯಾರ್ಥಿಗಳಿಗೆ ಐಐಟಿ-ಜೆಇಇ ಪರೀಕ್ಷೆ ಬರೆಯಲು ಉಚಿತ ತರಬೇತಿ ನೀಡುತ್ತಿರುವ ಆನಂದ್ಕುಮಾರ್ ಅವರ ರೋಚಕ ಬದುಕನ್ನು ಪ್ರೇಕ್ಷಕರ ಮುಂದೆ ಅನಾವರಣಗೊಳಿಸಿದ್ದಾರೆ.
ಈ ಬಗ್ಗೆ ವಿಕಾಸ್ ಬೆಹೆಲ್ ಈಗಾಗಲೇ ಆನಂದ್ಕುಮಾರ್ ಅವರನ್ನು ಭೇಟಿಯಾಗಿ ಅವರ ಸಾಧಕ ಬದುಕಿನ ಬಗ್ಗೆ ಅಪಾರ ಮಾಹಿತಿಗಳನ್ನು ಸಂಗ್ರಹಿಸಿದ್ದಾರೆ. ಆನಂದ್ಕುಮಾರ್ ಕೂಡಾ ತನ್ನ ಜೀವನ ಕಥೆಯನ್ನು ಬೆಹೆಲ್, ಬೆಳ್ಳಿತೆರೆಯ ಮೇಲೆ ಸಮರ್ಥವಾಗಿ ಮೂಡಿಸಲಿದ್ದಾರೆಂಬ ವಿಶ್ವಾಸ ಹೊಂದಿದ್ದಾರೆ. ಒಟ್ಟಿನಲ್ಲಿ ಹಲವಾರು ಯುವಜನರಿಗೆ ಸ್ಫೂರ್ತಿಯಾಗುವಂತಹ ಚಿತ್ರ ಇದಾಗಲಿದೆಯೆಂದು ಅವರು ಭರವಸೆ ವ್ಯಕ್ತಪಡಿಸಿದ್ದಾರೆ.
‘‘ಬೆಳ್ಳಿತೆರೆಯಲ್ಲಿ ತನ್ನ ಪಾತ್ರದಲ್ಲಿ ಹೃತಿಕ್ ಅಭಿನಯಿಸಲಿ ರುವುದು ಆನಂದ್ಗೆ ತುಂಬಾ ಸಂತಸ ತಂದಿದೆಯಂತೆ. ಚಿತ್ರದಲ್ಲಿ ನನ್ನ ಪಾತ್ರಕ್ಕೆ ಜೀವತುಂಬಲು ಒಂದು ಮಟ್ಟದ ಭಾವನಾತ್ಮಕ ಅಭಿವ್ಯಕ್ತಿಯ ಅಗತ್ಯವಿದೆ. ಹೃತಿಕ್ ಅದನ್ನು ಸಮರ್ಥವಾಗಿ ನಿರ್ವಹಿಸಬಲ್ಲರು’’ ಎಂದು ಆನಂದ್ಕುಮಾರ್ ಹೇಳಿದ್ದಾರೆ.
ಹೃತಿಕ್ಗಂತೂ, ಈ ಪಾತ್ರವು ಅತ್ಯಂತ ಚ್ಯಾಲೆಂಜಿಗ್ ಎನಿಸಿದೆಯಂತೆ. ಪಾತ್ರಕ್ಕೆ ಪರಿಪಕ್ವತೆ ತುಂಬುವ ಉದ್ದೇಶದಿಂದ ಕೆಲವು ವಾರಗಳ ಹಿಂದೆ ಅವರು ಆನಂದ್ರನ್ನು ಭೇಟಿಯಾಗಿದ್ದರು. ಒಟ್ಟಿನಲ್ಲಿ ಹೃತಿಕ್ಗೆ ‘ಸೂಪರ್ 30’ ಚಿತ್ರವು ಅವರ ವೃತ್ತಿ ಜೀವನದಲ್ಲಿ ಹೊಸ ತಿರುವು ನೀಡಲಿದೆಯೇ ಎಂಬುದನ್ನು ಕಾದು ನೋಡಬೇಕಾಗಿದೆ.
