ಜನಾಂಗಗಳ ಮೇಲೆ ದ್ವೇಷ ಹರಡಿ ರಾಜಕೀಯ ಲಾಭ: ಮೀನಾಕ್ಷಿ ಸುಂದರಂ

ಬೆಂಗಳೂರು, ಅ.1: ವ್ಯಕ್ತಿ, ಜನಾಂಗಗಳ ಮೇಲೆ ದ್ವೇಷವನ್ನು ಹರಡಿ ರಾಜಕೀಯ ಲಾಭ ಪಡೆಯಲಾಗುತ್ತಿದೆ. ಇದಕ್ಕೆ ಬೆಂಬಲವಾಗಿ ನಿಂತಿರುವುದು ಕೆಲವು ಮುದ್ರಣ-ಇಲೆಕ್ಟ್ರಾನಿಕ್ ಮಾಧ್ಯಮಗಳಿಂದ ಮನಸ್ಸುಗಳನ್ನು ಕದಡುವ ವಿಷ ನೀಡಲಾಗುತ್ತಿದೆ.ಇದರ ವಿರುದ್ಧ ಶಕ್ತಿಯುತವಾಗಿ ಹೋರಾಟಬೇಕು ಎಂದು ಸಿಐಟಿಯು ರಾಜ್ಯ ಘಟಕದ ಪ್ರಧಾನ ಕಾರ್ಯದರ್ಶಿ ಎಂ.ಎಸ್.ಮೀನಾಕ್ಷಿ ಸುಂದರಂ ಹೇಳಿದ್ದಾರೆ.

ರವಿವಾರ ನಗರದ ಅರಮನೆ ರಸ್ತೆಯ ಕೊಂಡಜ್ಜಿ ಸಭಾಂಗಣದಲ್ಲಿ ಭಾರತ ಪ್ರಜಾಸತ್ತಾತ್ಮಕ ಯುವಜನ ಫೆಡರೇಶನ್(ಡಿವೈಎಫ್‌ಐ) ಆಯೋಜಿಸಿದ್ದು, ಮೂರು ದಿನಗಳ 11ನೆಯ ರಾಜ್ಯ ಸಮ್ಮೇಳವನ್ನು ಉದ್ಘಾಟಿಸಿ ಮಾತನಾಡಿ ಅವರು, ನಮ್ಮನ್ನು ಆಳುವ ವರ್ಗಗಳು ಮುನ್ನಚ್ಚರಿಕೆ ಕ್ರಮ ಕೈಗೊಂಡಿದ್ದು, ಈಗಾಗಲೇ ಉದ್ಯೋಗ, ಬಡತನ ಸಮಸ್ಯೆಗಳನ್ನು ಬಗೆಹರಿಸುವಲ್ಲಿ ವಿಫಲಗೊಂಡಿರುವ ಸರಕಾರಗಳ ವಿರುದ್ಧ ಭಾರೀ ಪ್ರತಿರೋಧ ವ್ಯಕ್ತವಾಗಬೇಕಿತ್ತು. ಆದರೆ, ಇದನ್ನು ದಿಕ್ಕು ತಪ್ಪಿಸಲು ಧರ್ಮ ಮೂಲಭೂತವನ್ನು ಸೃಷ್ಟಿ ಹಾಕಿದ್ದಾರೆ ಎಂದು ತಿಳಿಸಿದರು.

ಡಿವೈಎಫ್‌ಐ ರಾಷ್ಟ್ರೀಯ ಅಧ್ಯಕ್ಷ ಮುಹಮ್ಮದ್ ರಿಯಾಝ್ ಮಾತನಾಡಿ, ಇಂದು ಬೆಳ್ಳಗೆ ಅನಿಲ ಬೆಲೆ ಏರಿಕೆಯಾಗಿದೆ. ಪೆಟ್ರೋಲ್ ಬೆಲೆ ನಿರ್ಧಾರದ ಹಕ್ಕನ್ನು ಖಾಸಗಿ ಕಂಪೆನಿಗಳಿಗೆ ನೀಡಲಾಗಿದೆ. 3 ವರ್ಷದಲ್ಲಿ 24 ಬಾರಿ ಬೆಲೆ ಏರಿಕೆ ಆಗಿದ್ದು, ಜನರ ಹಣವನ್ನು ಹಗಲು ದರೋಡೆ ಮಾಡಲಾಗುತ್ತಿದೆ ಎಂದು ಕಿಡಿಕಾರಿದರು.

ಇತ್ತೀಚೆಗೆ ಮುಂಬೈನಲ್ಲಿ ರೈಲ್ವೆ ಅಪಘಾತದಲ್ಲಿ 22 ಜನ ಮೃತಪಟ್ಟಿದ್ದು, ಇದಕ್ಕೆ ಮೂಲ ಕಾರಣ ರೈಲ್ವೆ ಇಲಾಖೆಯಲ್ಲಿನ ಖಾಲಿ ಹುದ್ದೆ ಭರ್ತಿಯಾಗದೇ ಇರುವುದು. ಅಲ್ಲದೆ, ಇಂತಹ ಪರಿಸ್ಥಿತಿಯಲ್ಲಿ ದೇಶದ ಪ್ರಧಾನಿಗಳು ಬುಲೆಟ್ ಟ್ರೈನ್‌ಗಳು ತರಲು ಹೊರಟಿದ್ದಾರೆ ಎಂದ ಅವರು, ಕೋಮುವಾದಿಗಳು ವಿಚಾರವಾದಿಗಳನ್ನು ಕೊಲ್ಲಲು ಸಾಧ್ಯವಿಲ್ಲ ಎಂದರು.

ಡಿವೈಎಫ್‌ಐ ರಾಜ್ಯಾಧ್ಯಕ್ಷ ಮುನೀರ್ ಕಾಟಿಪಳ್ಳ ಮಾತನಾಡಿ, ತುಳುನಾಡಿನಲ್ಲಿ ಮತೀಯ ಶಕ್ತಿಗಳಿಂದ ಆಶ್ರಫ್ ಹಾಗೂ ಶರತ್ ಮಡಿವಾಳ ಕೊಲೆಯಾಗಿದ್ದು, ಅವರ ಕುಟುಂಬಗಳು ಇಂದು ಬೀದಿ ಪಾಲಾಗಿದ್ದಾರೆ. ಸಮಾಜದಲ್ಲಿ ಎಲ್ಲರೂ ಒಂದಾಗಿ ಬಾಳುವ ವಾತಾವರಣ ನಿರ್ಮಿಸಬೇಕಾಗಿದೆ ಎಂದು ಅವರು ಹೇಳಿದರು.

ಕರಾವಳಿಯ ಯುದ್ಧ ಭೂಮಿಯಲ್ಲಿ ಡಿವೈಎಫ್‌ಐ ಕೋಮುವಾದದ ವಿರುದ್ಧ ಹೋರಾಟದಲ್ಲಿ ನಿರತವಾಗಿದೆ. ಈ ಹಿಂದೆ, ಸೌಹಾರ್ದ ರ್ಯಾಲಿಗಾಗಿ ಕೇರಳದ ಮುಖ್ಯಮಂತ್ರಿ ಪಿಣರಾಯ್ ವಿಜಯನ್ ಬಂದಿದ್ದ ವೇಳೆ ಕೋಮುವಾದಿಗಳು ಮಂಗಳೂರು ಬಂದ್‌ಗೆ ಕರೆ ನೀಡಿದ್ದರು. ಆದರೆ, ಜನರ ಬೆಂಬಲದಿಂದ ಸೌಹಾರ್ದ ರ್ಯಾಲಿಯನ್ನು ಯಶಸ್ವಿಗೊಳಿಸಲಾಯಿತು. ಕೋಮುವಾದಿಗಳು ದ್ವೇಷ ಹರಡಿದರೆ ನಾವು ಪ್ರೀತಿ ಹಂಚುವೆವುದಾಗಿ ಕರೆ ನೀಡಿದರು.

ಡಿವೈಎಫ್‌ಐ ರಾಜ್ಯ ಕಾರ್ಯದರ್ಶಿ ಬಿ.ರಾಜಶೇಖರ ಮೂರ್ತಿ ಮಾತನಾಡಿ, ಯುವ ಜನರು ದೇಶದ ಸಂಪತ್ತು. ದೇಶ, ಸಮಾಜದ ಅಭಿವೃದ್ಧಿ, ಪರಿವರ್ತನೆಗೆ ಯುವ ಶಕ್ತಿಯನ್ನು ಬಳಕೆ ಮಾಡಿಕೊಳ್ಳಬೇಕು. ಆದರೆ, ಇಂದು ಕೋಟ್ಯಾಂತರ ಯುವ ಜನತೆ ಕೆಲಸ ಇಲ್ಲದೆ ಅಭದ್ರತೆಯಿಂದ ನರಳುವಂತಾಗಿದೆ. ಅಸಂಘಟಿತ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿರುವ ಯುವ ಜನತೆ ಆತಂಕದಿಂದ ಬದುಕು ನಡೆಸುವಂಥ ವಾತಾವರಣ ನಿರ್ಮಾಣವಾಗಿದೆ ಎಂದರು.

ಸಮ್ಮೇಳನದಲ್ಲಿ ಹಿರಿಯ ಕಾರ್ಮಿಕ ಮುಖಂಡ ಆರ್.ಶ್ರೀನಿವಾಸ್, ಡಿವೈಎಫ್‌ಐ ಅಖಿಲ ಭಾರತ ಉಪಾಧ್ಯಕ್ಷೆ ದೀಪಾ, ಮಹಿಳಾ ಹೋರಾಟಗಾರ್ತಿ ಕೆ.ಎಸ್.ವಿಮಲಾ, ಹಿರಿಯ ಪತ್ರಕರ್ತ ಜಿ.ಎನ್.ಮೋಹನ್, ಡಿವೈಎಫ್‌ಐ ರಾಜ್ಯ ಸಮಿತಿ ಸದಸ್ಯರಾದ ಸಂತೋಷ್ ಬಜಾಲ್, ಬಸವರಾಜ ಪೂಜಾರ್ ಸೇರಿ ಪ್ರಮುಖರಿದ್ದರು.