ಬಿಸಿಸಿಐಯಿಂದ ಭಾರೀ ಪರಿಹಾರದ ನಿರೀಕ್ಷೆಯಲ್ಲಿ ಪಿಸಿಬಿ

ಕರಾಚಿ, ಅ.1: ತನ್ನೊಂದಿಗೆ ಎರಡು ಸ್ವದೇಶಿ ದ್ವಿಪಕ್ಷೀಯ ಸರಣಿಯಲ್ಲಿ ಆಡಲು ವಿಫಲವಾಗಿರುವ ಭಾರತೀಯ ಕ್ರಿಕೆಟ್ ಮಂಡಳಿಯಿಂದ (ಬಿಸಿಸಿಐ)ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯು(ಪಿಸಿಬಿ) 70 ಮಿಲಿಯನ್ ಯುಎಸ್ ಡಾಲರ್ ಪರಿಹಾರ ನಿರೀಕ್ಷಿಸುತ್ತಿದೆ.

 ತನ್ನ ಸಮಾಲೋಚನಾ ಪ್ರಕ್ರಿಯೆಗಳನ್ನು ಅಂತಿಮಗೊಳಿಸಿರುವ ಪಾಕ್ ಕ್ರಿಕೆಟ್ ಮಂಡಳಿಯು ಬಿಸಿಸಿಐ ವಿರುದ್ಧ ತನ್ನ ಪರಿಹಾರ ಕೇಳಲು ನಿರ್ಧರಿಸಿದೆ. ಇನ್ನು ಕೆಲವೇ ದಿನಗಳಲ್ಲಿ ನಡೆಯಲಿರುವ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್‌ನ(ಐಸಿಸಿ) ವಿವಾದ ಇತ್ಯರ್ಥ ಸಮಿತಿಯ ಮುಂದೆ ಕಡತಗಳನ್ನು ಸಲ್ಲಿಸಲು ಸಜ್ಜಾಗಿದೆ.

‘‘ಬಿಸಿಸಿಐ 2014ರಲ್ಲಿ ನಮ್ಮಂದಿಗೆ ಆರು ದ್ವಿಪಕ್ಷೀಯ ಸರಣಿ ಆಡುವುದಕ್ಕೆ ಸಂಬಂಧಿಸಿ ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕಿತ್ತು. ಆದರೆ ಈ ತನಕ ಒಂದೂ ಸರಣಿಯನ್ನು ಆಡಿಲ್ಲ. 2008ರಿಂದ ಪಾಕ್ ಕ್ರಿಕೆಟ್ ತಂಡದೊಂದಿಗೆ ದ್ವಿಪಕ್ಷೀಯ ಸರಣಿ ಆಡಲು ನಿರಾಕರಿಸುತ್ತಾ ಬಂದಿದೆ. ಆದರೆ ಭಾರತಕ್ಕೆ ಐಸಿಸಿ ಆಯೋಜಿಸಲ್ಪಡುವ ಟೂರ್ನಿಗಳಲ್ಲಿ ಪಾಕ್ ವಿರುದ್ದ ಆಡಲು ಯಾವುದೇ ಸಮಸ್ಯೆಯಿಲ್ಲ’’ ಎಂದು ಪಿಸಿಬಿ ಚೇರ್ಮನ್ ನಜಮ್ ಸೇಥಿ ಹೇಳಿದ್ದಾರೆ.

2015 ಹಾಗೂ 2023ರ ನಡುವೆ ಆರು ದ್ವಿಪಕ್ಷೀಯ ಸರಣಿ ಆಡುವ ಬಗ್ಗೆ ತಿಳುವಳಿಕೆ ಪತ್ರಕ್ಕೆ ಸಹಿ ಹಾಕಲಾಗಿತ್ತು. ಮೊದಲ ಸರಣಿಯನ್ನು ಪಾಕ್ ಆತಿಥ್ಯವಹಿಸಬೇಕಿತ್ತು.

  ಪಾಕಿಸ್ತಾನ ವಿರುದ್ಧ ದ್ವಿಪಕ್ಷೀಯ ಸರಣಿ ಆಡಲು ತನ್ನ ಸರಕಾರದಿಂದ ಅನುಮತಿ ಸಿಕ್ಕಿಲ್ಲ ಎಂದು ಬಿಸಿಸಿಐ ವಾದ ಮಂಡಿಸುತ್ತಿದೆ. ಆದರೆ,ಭಾರತಕ್ಕೆ ಪಾಕ್ ವಿರುದ್ಧ ಐಸಿಸಿ ಟೂರ್ನಿಗಳಲ್ಲಿ ಭಾಗವಹಿಸಲು ಸರಕಾರ ಅನುಮತಿ ನೀಡುತ್ತದೆಯೇ? ನಾವು ಆಡಬೇಕಾಗಿರುವ ಸ್ವದೇಶಿ ಸರಣಿಯನ್ನು ತಟಸ್ಥ ಸ್ಥಳಗಳಲ್ಲಿ ಆಡುವ ಕುರಿತು ನಾವು ಪ್ರಸ್ತಾವಿಸಿದ್ದೆವು. ಇದಕ್ಕೆ ಎರಡೂ ಕಡೆಯವರು ಒಪ್ಪಿಗೆ ನೀಡಿದ್ದರು. 2016ರಲ್ಲಿ ಶ್ರೀಲಂಕಾದಲ್ಲಿ ಏಕದಿನ ಸರಣಿ ಆಯೋಜಿಸುವ ಬಗ್ಗೆ ನಾವು ಆಫರ್ ನೀಡಿದ್ದೆವು. ತಟಸ್ಥ ಸ್ಥಳದಲ್ಲಿ ಭಾರತ ವಿರುದ್ಧ ದ್ವಿಪಕ್ಷೀಯ ಸರಣಿ ಆಡಲು ಪಾಕ್‌ನಿಂದ ಯಾವುದೇ ಅಭ್ಯಂತರವಿಲ್ಲ. ಬಿಸಿಸಿಐ ಧೋರಣೆಯಿಂದಾಗಿ ಪಿಸಿಬಿಗೆ ಭಾರೀ ಹಣಕಾಸು ನಷ್ಟವಾಗುತ್ತಿದೆ. 2009ರಿಂದ ಅಂತಾರಾಷ್ಟ್ರೀಯ ಕ್ರಿಕೆಟ್ ತಂಡಗಳು ಪಾಕ್‌ಗೆ ಪ್ರವಾಸಕೈಗೊಳ್ಳಲು ನಿರಾಕರಿಸುತ್ತಿರುವ ಹಿನ್ನೆಲೆಯಲ್ಲಿ ಈಗಾಗಲೇ ಸಾಕಷ್ಟು ಆರ್ಥಿಕ ನಷ್ಟವಾಗಿದೆ ಎಂದು ಸೇಥಿ ಹೇಳಿದ್ದಾರೆ.