ಕುಲ್ಲೇಟಿರ ಕಪ್ ಹಾಕಿ ಉತ್ಸವ : ಲಾಂಛನ ಮತ್ತು ಕೈಪಿಡಿ ಬಿಡುಗಡೆ

ಮಡಿಕೇರಿ,ಅ.16:ಕೊಡವ ಕುಟುಂಬಗಳ ನಡುವೆ ಮುಂದಿನ ಸಾಲಿನಲ್ಲಿ ನಾಪೋಕ್ಲುವಿನಲ್ಲಿ ನಡೆಯಲಿರುವ ಕೌಟುಂಬಿಕ ಹಾಕಿ ಪಂದ್ಯಾವಳಿ ‘ಕುಲ್ಲೇಟಿರ ಕಪ್ ಹಾಕಿ ಉತ್ಸವ-2018’ರ ಆಕರ್ಷಕ ಲಾಂಛನ ಮತ್ತು ಕೈಪಿಡಿಯನ್ನು ಸರಳ ಸಮಾರಂಭದಲ್ಲಿ ನಗರದಲ್ಲಿ ಅನಾವರಣಗೊಳಿಸಲಾಯಿತು.

ನಗರದ ಪ್ರೆಸ್ ಕ್ಲಬ್‍ನಲ್ಲಿ ಕುಲ್ಲೇಟಿರ ಕುಟುಂಬಸ್ಥರು ಹಾಗೂ ಹಾಕಿ ಉತ್ಸವ ಸಮಿತಿ ವತಿಯಿಂದ ನಡೆದ ಸರಳ ಸಮಾರಂಭದಲ್ಲಿ ಕುಲ್ಲೇಟಿರ ಕಪ್ ಹಾಕಿ ಉತ್ಸವದ ಕೈಪಿಡಿಯನ್ನು ವಿಧಾನ ಪರಿಷತ್ ಸದಸ್ಯರಾದ ಶಾಂತೆಯಂಡ ವೀಣಾ ಅಚ್ಚಯ್ಯ ಮತ್ತು ಲಾಂಛನವನ್ನು ಮಂಡೇಪಂಡ ಸುನಿಲ್ ಸುಬ್ರಮಣಿ ಬಿಡುಗಡೆ ಮಾಡಿದರು.

ಈ ಸಂದರ್ಭ ಮಾತನಾಡಿದ ಎಂಎಲ್‍ಸಿ ಸುನಿಲ್ ಸುಬ್ರಮಣಿ ಕುಲ್ಲೇಟಿರ ಕುಟುಂಬ ಕಡಿಮೆ ಜನಸಂಖ್ಯೆ ಹೊಂದಿದ ಕುಟುಂಬವಾಗಿದ್ದರು, ಕೌಟುಂಬಿಕ ಹಾಕಿ ಉತ್ಸವದಲ್ಲಿ 3 ಬಾರಿ ಗೆಲುವು ಸಾಧಿಸಿ ಅಮೋಘ ಸಾಧನೆ ಮಾಡಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು. ಮುಂದಿನ ಸಾಲಿನ ಹಾಕಿ ಉತ್ಸವದ ಆಯೋಜನೆಗೆ ಸರ್ಕಾರದ ವತಿಯಿಂದ ಅಗತ್ಯ ಅನುದಾನವನ್ನು ದೊರಕಿಸಿಕೊಡುವಲ್ಲಿ ತನ್ನನ್ನು ಒಳಗೊಂಡಂತೆ ಜಿಲ್ಲೆಯ ಶಾಸಕರು, ಸಂಸದರು ಹಾಗೂ ಕಾಂಗ್ರೆಸ್‍ನ ಎಂಎಲ್‍ಸಿ ಆಗಿರುವ ವೀಣಾ ಅಚ್ಚಯ್ಯ ಅವರ ಸಹಕಾರದೊಂದಿಗೆ ಒಗ್ಗಟ್ಟಿನ ಪ್ರಯತ್ನ ಮಾಡುವುದಾಗಿ ಭರವಸೆ ನೀಡಿದರು.

ಎಂಎಲ್‍ಸಿ ವೀಣಾ ಅಚ್ಚಯ್ಯ ಮಾತನಾಡಿ, ಕುಲ್ಲೇಟಿರ ಕುಟುಂಬ ಸಾಕಷ್ಟು ಮಂದಿಯನ್ನು ದೇಶದ ಸೇನಾ ಸೇವೆಗೆ ಕಳುಹಿಸಿಕೊಡುವ ಮೂಲಕ ಜಿಲ್ಲೆಯ ಯುವ ಸಮೂಹಕ್ಕೆ ಮಾದರಿಯಾಗಿರುವುದು ಹೆಮ್ಮೆಯ ವಿಚಾರವೆಂದರು. ಮುಂದಿನ ಸಾಲಿನ ಹಾಕಿ ಉತ್ಸವದ ಆಯೋಜನೆಗೆ ಕಳೆದ ಮೂರು ವರ್ಷಗಳಿಂದ ಸಿದ್ಧತೆಗಳನ್ನು ಮಾಡಿಕೊಳ್ಳುತ್ತಿರುವುದು ಶ್ಲಾಘನೀಯ. ಕೊಡವ ಸಮುದಾಯವನ್ನು ಒಂದಾಗಿ ಬೆಸೆಯುವ ಹಾಕಿ ಉತ್ಸವವನ್ನು ಆರಂಭಿಸಿದ ಪಾಂಡಂಡ ಕುಟ್ಟಪ್ಪ ಅವರ ಪ್ರಯತ್ನವನ್ನು ನಾವು ಯಾವತ್ತೂ ಸ್ಮರಿಸಲೇಬೇಕಾಗಿದೆ ಎಂದು ಹೇಳಿದರು.

ಕುಲ್ಲೇಟಿರ ಕುಟುಂಬಸ್ಥರು ತಮ್ಮ ಗುರು ಮನೆ ಮತ್ತು ಐನ್ ಮನೆಗಳನ್ನು ಸಂರಕ್ಷಿಸಿಕೊಂಡು ಬಂದಿದ್ದು, ಈ ರೀತಿಯ ಕಾರ್ಯವನ್ನು ಪ್ರತಿ ಕೊಡವ ಕುಟುಂಬಗಳು ಮಾಡಬೇಕಿದೆ ಎಂದು ಕರೆ ನೀಡಿದರು. ಉತ್ಸವದ ಆಯೋಜನೆಗೆ ಅಗತ್ಯವಾದ ಅನುದಾನವನ್ನು ಒದಗಿಸಲು ಪ್ರಯತ್ನಿಸುವುದಾಗಿ ತಿಳಿಸಿದರು.

ಕೊಡಗು ಜಿಲ್ಲಾ ಪತ್ರಕರ್ತರ ಸಂಘದ ಅಧ್ಯಕ್ಷರಾದ ಅಜ್ಜಮಾಡ ರಮೇಶ್ ಕುಟ್ಟಪ್ಪ ಮಾತನಾಡಿ, ಹಾಕಿ ಎನ್ನುವುದು ಕೊಡಗಿನಲ್ಲಿ ಕೇವಲ ಆಟವಲ್ಲ, ಬದಲಾಗಿ ಉತ್ಸವವಾಗಿದೆ. ಕುಲ್ಲೇಟಿರ ಕುಟುಂಬ ಉತ್ಸವದ ಆಯೋಜನೆಗಾಗಿ ಕಳೆದ ಮೂರು ವರ್ಷಗಳಿಂದ ಶ್ರಮಿಸುತ್ತಿದೆ. ಉತ್ಸವದ ಆಯೋಜನೆಯ ಜೊತೆಯಲ್ಲೆ ಕುಲ್ಲೇಟಿರ ಕುಟುಂಬ ತಮ್ಮ ಕುಟುಂಬದಲ್ಲಿನ ಆರ್ಥಿಕವಾಗಿ ಸಂಕಷ್ಟದಲ್ಲಿರುವ ಮಕ್ಕಳ ಶಿಕ್ಷಣಕ್ಕೆ ನೆರವು ನೀಡುವ ಪ್ರಯತ್ನ ಮಾಡುವಂತಾಗಬೇಕೆಂದರು. ಉತ್ಸವದ ಆಯೋಜನೆಯಲ್ಲಿ ಕುಟುಂಬದ ಪ್ರತಿಯೊಬ್ಬರು ಜವಾಬ್ದಾರಿ ವಹಿಸಿಕೊಂಡು ಕಾರ್ಯನಿರ್ವಹಿಸುವಂತೆ ಸಲಹೆ ನೀಡಿದರು.

ಪ್ರಾಸ್ತಾವಿಕವಾಗಿ ಮಾತನಾಡಿದ ಕುಲ್ಲೇಟಿರ ಹಾಕಿ ನಮ್ಮೆಯ ಆಯೋಜನಾ ಸಮಿತಿಯ ಅಧ್ಯಕ್ಷರಾದ ಕುಲ್ಲೇಟಿರ ಪಿ. ಮಂದಪ್ಪ(ಶಂಭು), ಕೌಟುಂಬಿಕ ಹಾಕಿ ಉತ್ಸವ ವರ್ಷದಿಂದ ವರ್ಷಕ್ಕೆ ಉತ್ತಮವಾಗಿ ನಡೆಯುತ್ತಿದ್ದು, ಇದಕ್ಕೆ ಕಾರಣಕರ್ತರಾದ ಉತ್ಸವದ ಜನಕ ಪಾಂಡಂಡ ಕುಟ್ಟಪ್ಪ ಅವರಿಗೆ ನಾವು ಚಿರಋಣಿಯಾಗಿದ್ದೇವೆ. ಕುಲ್ಲೇಟಿರ ಕುಟುಂಬ ಇಲ್ಲಿಯವರೆಗೆ ಹಾಕಿ ಉತ್ಸವದಲ್ಲಿ ಮೂರು ಬಾರಿ ಪ್ರಶಸ್ತಿಯನ್ನು ಪಡೆದ ಸಾಧನೆ ಮಾಡಿದೆ. ಇದರೊಂದಿಗೆ ಕುಲ್ಲೇಟಿರ ಕುಟುಂಬ ಸೈನ್ಯಕ್ಕೆ 27 ಮಂದಿ ಸೈನ್ಯಾಧಿಕಾರಿಗಳನ್ನು ನೀಡಿದ ಸಾಧನೆ ಮಾಡಿರುವುದಲ್ಲದೆ, ಕುಟುಂಬದ ಮೇಜರ್ ಕುಲ್ಲೇಟಿರ ಎ. ಸೋಮಯ್ಯ ಅವರು 1987ರ ಶ್ರೀಲಂಕಾದ ಆಪರೇಷನ್ ಪವನ್ ಕಾರ್ಯಾಚರಣೆಯಲ್ಲಿ ಹುತಾತ್ಮರಾಗಿದ್ದು, ಅವರು ಮರಣೋತ್ತರ  ಸೇನಾಪದಕವನ್ನು ಪಡೆದಿದ್ದಾರೆಂದು ಮಾಹಿತಿ ನೀಡಿದರು.

 ಕುಲ್ಲೇಟಿರ ಕುಟುಂಬದ ಉತ್ತಯ್ಯ ಅವರು ಹಾಕಿ ಕ್ಷೇತ್ರಕ್ಕೆ ನೀಡಿದ ಅನುಪಮ ಕೊಡುಗೆಗೆ ‘ಏಕಲವ್ಯ’ ಪ್ರಶಸ್ತಿಯನ್ನು ಪಡೆದವರಾಗಿದ್ದು, ಇವರು ಭಾರತ ತಂಡವನ್ನು ಪ್ರತಿನಿಧಿಸಿರುವುದಲ್ಲದೆ, ರಾಜ್ಯ ಹಾಕಿ ತಂಡದ ನಾಯಕರಾಗಿಯೂ ಅತ್ಯುತ್ತಮ ಆಟವನ್ನು ಪ್ರದರ್ಶಿಸಿರುವುದಾಗಿ  ತಿಳಿಸಿದರು.

ಶಾಲಾಭಿವೃದ್ಧಿಗೆ ರೂ.50 ಲಕ್ಷ
ಮುಂದಿನ ಸಾಲಿನ ಹಾಕಿ ಉತ್ಸವವನ್ನು ನಾಪೋಕ್ಲುವಿನ ಮೂರು ಮೈದಾನಗಳಲ್ಲಿ ನಡೆಸಲು ಈಗಾಗಲೆ ಅಗತ್ಯ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗುತ್ತಿದೆ. ಹಾಕಿ ಉತ್ಸವದಲ್ಲಿ  325 ಕ್ಕೂ ಹೆಚ್ಚಿನ ತಂಡಗಳ ಪಾಲ್ಗೊಳ್ಳುವಿಕೆಯನ್ನು ನಿರೀಕ್ಷಿಸಲಾಗುತ್ತಿದೆ. ಉತ್ಸವಕ್ಕೆ 1.50 ಕೋಟಿಯಿಂದ 2 ಕೋಟಿ ವೆಚ್ಚ ತಗುಲುವ ನಿರೀಕ್ಷೆ ಇದೆ. ಹಾಕಿ ಉತ್ಸವಕ್ಕೆ ಕೇಂದ್ರದ ಅನುದಾನ ಲಭ್ಯವಾದಲ್ಲಿ 50 ಲಕ್ಷ ರೂ.ಗಳನ್ನು ನಾಪೋಕ್ಲು ಸರಕಾರಿ ಶಾಲೆಯ ಅಭಿವೃದ್ಧಿಗೆ ಬಳಸಲು ಉದ್ದೇಶಿಸಿರುವುದಾಗಿ ಮಂದಪ್ಪ ತಿಳಿಸಿದರು.

ಸಮಾರಂಭದ ಅಧ್ಯಕ್ಷತೆಯನ್ನು ಕುಟುಂಬದ ಪಟ್ಟೆದಾರರಾದ ಕುಲ್ಲೇಟಿರ ಎಸ್.ಮಾದಪ್ಪ ವಹಿಸಿದ್ದರು. ಸರಳ ಸಮಾರಂಭದಲ್ಲಿ ಕೊಡವ ಸಾಹಿತ್ಯ ಅಕಾಡೆಮಿಯ ಮಾಜಿ ಅಧ್ಯಕ್ಷರಾದ ಬಿದ್ದಾಟಂಡ ಎಸ್. ತಮ್ಮಯ್ಯ, ಹಾಕಿ ಕೂರ್ಗ್ ಕಾರ್ಯದರ್ಶಿ ಪಳಂಗಂಡ ಲವ, ಬಲ್ಲಚಂಡ ಪಾರ್ಥ ಚಂಗಪ್ಪ ಮೊದಲಾದ ಗಣ್ಯರು ಪಾಲ್ಗೊಂಡಿದ್ದರು. ರಿಯಾ ಮತ್ತು ಕ್ಷಮಾ ಅವರ ಪುನರಾವರ್ತನೆಯೊಂದಿಗೆ ಆರಂಭಗೊಂಡ ಸಮಾರಂಭದಲ್ಲಿ ಹಾಕಿ ನಮ್ಮೆ ಆಯೋಜನಾ ಸಮಿತಿಯ ಖಜಾಂಚಿ ಕುಲ್ಲೇಟಿರ ನಂದಾ ನಾಚಪ್ಪ ಸ್ವಾಗತಿಸಿದರು. ಕಾರ್ಯದರ್ಶಿ ಕುಲ್ಲೇಟಿರ ಅಜಿತ್ ನಾಣಯ್ಯ ಕಾರ್ಯಕ್ರಮ ನಿರೂಪಿಸಿದರು.