ಎಫ್ಟಿಐಐಗೆ ದಿಢೀರ್ ಭೇಟಿ ನೀಡಿದ ನೂತನ ಅಧ್ಯಕ್ಷ ಅನುಪಮ್ ಖೇರ್
ಪುಣೆ,ಅ.16: ಇಲ್ಲಿಯ ಭಾರತೀಯ ಚಲನಚಿತ್ರ ಮತ್ತು ದೂರದರ್ಶನ ಸಂಸ್ಥೆ (ಎಫ್ಟಿಐಐ)ಯ ನೂತನ ಅಧ್ಯಕ್ಷರಾಗಿ ನೇಮಕಗೊಂಡಿರುವ ಖ್ಯಾತ ಬಾಲಿವುಡ್ ನಟ ಅನುಪಮ್ ಖೇರ್ ಅವರು ಸೋಮವಾರ ಯಾವುದೇ ಮನ್ಸೂಚನೆಯಿಲ್ಲದೆ ದಿಢೀರ್ ಆಗಿ ಎಫ್ಟಿಐಐ ಕ್ಯಾಂಪಸ್ಗೆ ಭೇಟಿ ನೀಡಿ ಎಲ್ಲರಲ್ಲಿ ಅಚ್ಚರಿ ಮೂಡಿಸಿದರಲ್ಲದೆ, ತಾನು ವಿದ್ಯಾರ್ಥಿಗಳ ಪರವಾಗಿದ್ದೇನೆಂದು ಭರವಸೆಯನ್ನು ನೀಡಿದರು.
ಸಾಮಾಜಿಕ ಮಾಧ್ಯಮಗಳಲ್ಲಿ ಪೋಸ್ಟ್ ಮಾಡಲಾದ ಲೈವ್ ವೀಡಿಯೊದಲ್ಲಿ ತಾನು ಎಫ್ಟಿಐಐಗೆ ತೆರಳುತ್ತಿರುವುದಾಗಿ ತಿಳಿಸಿದ್ದ ಖೇರ್ ಸುಮಾರು 40 ವರ್ಷಗಳ ಹಿಂದೆ ತಾನು ವ್ಯಾಸಂಗ ಮಾಡಿದ್ದ ಸಂಸ್ಥೆಯ ಕ್ಯಾಂಪಸ್ನ ರಸ್ತೆಗಳಲ್ಲಿ ನಡೆದುಕೊಂಡು ಬರುವ ಮೂಲಕ ಭದ್ರತಾ ಸಿಬ್ಬಂದಿಗಳು, ವಿದ್ಯಾರ್ಥಿಗಳು ಮತ್ತು ಶಿಕ್ಷಕ ವೃಂದವನ್ನು ಅಚ್ಚರಿಯಲ್ಲಿ ಕೆಡವಿದರು.
ಓರ್ವ ನಟನಾಗಿ ನನ್ನ ಭದ್ರ ಬುನಾದಿಯನ್ನು ರೂಪಿಸಿದ್ದ, 1978ರಲ್ಲಿ ನಾನು ಕಲಿತಿದ್ದ ಸಂಸ್ಥೆಯತ್ತ ನಾನು ತೆರಳುತ್ತಿದ್ದೇನೆ. ನಾನು ಅಲ್ಲಿಗೆ ಮತ್ತೊಮ್ಮೆ ವಿದ್ಯಾರ್ಥಿಯಾಗಿ ಹೋಗಲು ಬಯಸಿದ್ದರಿಂದ ಅಲ್ಲಿಯ ಯಾರಿಗೂ ನಾನು ಬರುತ್ತಿರುವುದಾಗಿ ತಿಳಿಸಿಲ್ಲ ಎಂದು ಲೈವ್ ವೀಡಿಯೊದಲ್ಲಿ ತಿಳಿಸಿದ್ದ ಖೇರ್ ನಂತರ, 33 ವರ್ಷಗಳಲ್ಲಿ 508 ಚಿತ್ರಗಳಲ್ಲಿ ಮತ್ತು 120 ನಾಟಕಗಳಲ್ಲಿ ನಟಿಸಿರುವ ಹೆಗ್ಗಳಿಕೆಯ ಭಾವನೆಯೊಂದಿಗೆ ಅಲ್ಲಿಗೆ ಹೋಗಲು ನಾನು ಬಯಸಿರಲಿಲ್ಲ. ನಾನು ಓರ್ವ ವಿನಮ್ರ ವಿದ್ಯಾರ್ಥಿಯಾಗಿ ಮಾತ್ರ ತೆರಳಲು ಬಯಸಿದ್ದೆ ಎಂದು ಸೇರಿಸಿದ್ದರು.
ತನ್ನ ಕ್ಯಾಮೆರಾವನ್ನು ಎಫ್ಟಿಐಐನ ಪ್ರವೇಶದ್ವಾರಕ್ಕೆ ಫೋಕಸ್ ಮಾಡಿದ ಖೇರ್(62), ಇದು ನನಗೆ ಜೀವನದ ಅದ್ಭುತ ಅಂತರ್ದಷ್ಟಿಯನ್ನು ನೀಡಿದ, ಸತ್ಯಜಿತ್ ರೇ ಮತ್ತು ಮೃಣಾಲ್ ಸೇನ್ ಅವರಂತಹ ಮಹಾನ್ ಸಿನಿಮಾ ಪ್ರತಿಭೆಗಳ ಜೀವನ ಮತ್ತು ಅವರ ಯುಗದಲ್ಲಿ ಪ್ರವೇಶ ನೀಡಿದ ಅದ್ಭುತ ಪ್ರವೇಶದ್ವಾರವಾಗಿದೆ ಎಂದು ಹೇಳಿದರು.
ಎಫ್ಟಿಐಐ ಅಧ್ಯಕ್ಷರಾಗಿದ್ದ ಗಜೇಂದ್ರ ಚೌಹಾಣ್ ಅವರ ಉತ್ತರಾಧಿಕಾರಿಯಾಗಿ ಖೇರ್ ಅವರನ್ನು ಅ.11ರಂದು ನೇಮಕಗೊಳಿಸಿಲಾಗಿತ್ತು. 2014ರಲ್ಲಿ ಚೌಹಾನ್ ಅವರ ನೇಮಕವು ಕ್ಯಾಂಪಸ್ನಲ್ಲಿ ಭಾರೀ ಪ್ರತಿಭಟನೆಗೆ ಕಾರಣವಾಗಿತ್ತು.
ಖೇರ ಸಂಸ್ಥೆಯನ್ನು ಪ್ರವೇಶಿಸುತ್ತಿದ್ದಂತೆ ‘‘12 ಗಂಟೆಗಳ ಪಾಳಿಯು ಅಮಾನುಷ ವಾಗಿದೆ’’ ಎಂಬ ಭಿತ್ತಿಫಲಕವನ್ನು ಹಿಡಿದುಕೊಂಡಿದ್ದ ಪ್ರತಿಭಟನಾನಿರತ ವಿದ್ಯಾರ್ಥಿಗಳ ಗುಂಪೊಂದನ್ನು ಭೇಟಿಯಾಗಿ, ನಾನು ನಿಮ್ಮ ಪರವಾಗಿದ್ದೇನೆ. ನಿಮ್ಮ ಎಲ್ಲ ಸಮಸ್ಯೆಗಳನ್ನೂ ಬಗೆಹರಿಸುತ್ತೇನೆ ಎಂದು ಭರವಸೆ ನೀಡಿದರು.
