ಮಮತಾ ಹತ್ಯೆಗೆ 65 ಲಕ್ಷ ರೂ. ಬಹುಮಾನ!

ಕೊಲ್ಕತ್ತಾ, ಅ. 18: ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿಯವರನ್ನು ಹತ್ಯೆ ಮಾಡಿದರೆ ಒಂದು ಲಕ್ಷ ಡಾಲರ್ (65 ಲಕ್ಷ ರೂಪಾಯಿ) ಬಹುಮಾನ ನೀಡುವ ಆಶ್ವಾಸನೆಯ ವಾಟ್ಸ್ಆ್ಯಪ್ ಸಂದೇಶ ಹರಿದಾಡುತ್ತಿದೆ.

ಮುರ್ಶಿದಾಬಾದ್‌ನ ಬೆರ್ಹಾಂಪುರದ 19 ವರ್ಷದ ವಿದ್ಯಾರ್ಥಿಯ ಮೊಬೈಲ್‌ಗೆ ಈ ಸಂದೇಶವು ಅಮೆರಿಕದ ಫ್ಲೋರಿಡಾದಿಂದ ಬಂದಿದೆ.

"ಲ್ಯಾಟಿನ್ ಮೂಲದ ವ್ಯಕ್ತಿ ಎಂದು ಹೇಳಿಕೊಂಡ ವ್ಯಕ್ತಿಯೊಬ್ಬನಿಂದ ಸೋಮವಾರ ಮಧ್ಯಾಹ್ನ ಸಂದೇಶ ಬಂದಿದೆ. ಉಗ್ರ ಸಂಘಟನೆಯೊಂದರ ಪರವಾಗಿ ಕಾರ್ಯ ನಿರ್ವಹಿಸುತ್ತಿದ್ದು, ಭಾರತದಲ್ಲೂ ಪಾಲುದಾರರನ್ನು ನೋಡುತ್ತಿರುವುದಾಗಿ ಆತ ಸಂದೇಶ ರವಾನಿಸಿದ್ದಾನೆ" ಎಂದು ವಿದ್ಯಾರ್ಥಿ ಹೇಳಿಕೊಂಡಿದ್ದಾನೆ.

"ನಮಗೆ ನೆರವು ನೀಡುವುದಾದರೆ 65 ಲಕ್ಷ ರೂ. ನೀಡುತ್ತೇವೆ. ನೀನು ಸುರಕ್ಷಿತವಾಗಿರುತ್ತಿ. ನೀನು ಸಿದ್ಧನಿರುವೆಯಾ?" ಎಂದು ಪ್ರಶ್ನಿಸಿದ್ದಾನೆ. ವಿದ್ಯಾರ್ಥಿ ಸ್ವಲ್ಪ ಕಾಲಾವಕಾಶ ನೀಡುವಂತೆ ಕೋರಿದ್ದಾನೆ. ಅದಕ್ಕೆ ಪ್ರತಿಯಾಗಿ, "ತಕ್ಷಣ ಮಾಡಬೇಕು. ಇಲ್ಲದಿದ್ದರೆ ಬೇರೊಬ್ಬನನ್ನು ನಾವು ಆಯ್ಕೆ ಮಾಡುತ್ತೇವೆ. ಒಂದು ಲಕ್ಷ ಡಾಲರ್ ಕೈಬಿಡಬೇಡ" ಎಂದು ಉತ್ತರಿಸಿದ್ದಾನೆ. ಇದಕ್ಕೆ ವಿದ್ಯಾರ್ಥಿ, "ನೋ ಥ್ಯಾಂಕ್ಸ್" ಎಂದು ಪ್ರತಿಕ್ರಿಯೆ ನೀಡಿದ್ದಾನೆ.

2.46ರ ವೇಳೆಗೆ ಮತ್ತೆ ಕರೆ ಮಾಡಿ, ನೀನು ಅವಕಾಶ ಕಳೆದುಕೊಂಡೆ ಎಂದು ಹೇಳಿದ್ದಾನೆ. ಮಧ್ಯಾಹ್ನ 3.30ರ ವೇಳೆಗೆ, ಭಾರತಕ್ಕೆ ಭೇಟಿ ನೀಡುವ ಇಂಗಿತ ವ್ಯಕ್ತಪಡಿಸಿ ಸಂದೇಶ ಬಂದಿದೆ. ಅದಕ್ಕೆ ವಿದ್ಯಾರ್ಥಿ, "ನಾನು ನಮ್ಮ ದೇಶವನ್ನು ಪ್ರೀತಿಸುತ್ತೇನೆ; ಅದರ ವಿನಾಶವನ್ನಲ್ಲ" ಎಂದು ಹೇಳಿಕೊಂಡಿದ್ದಾನೆ. ಆ ಕಡೆಯಿಂದ ವ್ಯಕ್ತಿ, "ನಾನು ಭಾರತವನ್ನು ನಾಶ ಮಾಡುವುದಿಲ್ಲ. ನಾವು ಕೇವಲ ಒಬ್ಬ ವ್ಯಕ್ತಿಯ ಹತ್ಯೆಗೆ ಮುಂದಾಗಿದ್ದೇವೆ" ಎಂದು ಹೇಳಿದ್ದಾನೆ.