ರಜಿನಿಯ ಬಹುನಿರೀಕ್ಷಿತ '2.0' ಚಿತ್ರದ ಕುರಿತ ಅತಿದೊಡ್ಡ ರಹಸ್ಯ ಬಹಿರಂಗಪಡಿಸಿದ ಆಮಿರ್ ಖಾನ್ !

ಮುಂಬೈ , ಅ.20 : ಬಾಲಿವುಡ್ ನಟ ಆಮಿರ್ ಖಾನ್ ಅವರು ಪರಿಪೂರ್ಣತೆಗೆ ಇನ್ನೊಂದು ಹೆಸರು. ತಮ್ಮ ಚಿತ್ರಜೀವನದ 17 ವರ್ಷಗಳಲ್ಲಿ ಅವರು ಸತತವಾಗಿ ಹಿಟ್ ಚಿತ್ರಗಳನ್ನು ನೀಡಿದವರು. ಭಾರತದ ಬಹುಬೇಡಿಕೆಯ ನಟರಾದ ಆಮಿರ್ ಏಷ್ಯಾ ಖಂಡದಲ್ಲಿಯೇ ಅತ್ಯಂತ ದುಬಾರಿ ಬಜೆಟ್ ಚಿತ್ರವೆಂದು ಪರಿಗಣಿಸಲ್ಪಟ್ಟಿರುವ ಬಹುನಿರೀಕ್ಷಿತ ರಜಿನಿಕಾಂತ್ ಅಭಿನಯದ '2.0' ಬಗ್ಗೆ ರಹಸ್ಯವೊಂದನ್ನು ಬಹಿರಂಗಪಡಿಸಿದ್ದಾರೆ.

ಈ ಚಿತ್ರದಲ್ಲಿ ರಜನಿಕಾಂತ್ ಅಭಿನಯಿಸಿರುವ ಪಾತ್ರವನ್ನು ನಿರ್ದೇಶಕ ಎಸ್. ಶಂಕರ್ ಆಮಿರ್ ಅವರಿಗೆ ಆಫರ್ ಮಾಡಿದ್ದರು. ಆದರೆ ಈ ಪಾತ್ರ ರಜಿನಿಕಾಂತ್ ಅವರಿಗೇ ಅತ್ಯಂತ ಸೂಕ್ತ ಎಂದು ಆ ಪಾತ್ರದಲ್ಲಿ ಕಾಣಿಸಿಕೊಳ್ಳಲು ಒಪ್ಪಿಲ್ಲ ಎಂದು ಸ್ವತಃ ಆಮಿರ್ ಬಹಿರಂಗಪಡಿಸಿದ್ದಾರೆ. 

‘‘ನಾನು ನಿರ್ದೇಶಕ ಶಂಕರ್ ಹಾಗೂ ರಜನಿ ಅವರ ದೊಡ್ಡ ಅಭಿಮಾನಿ. ಶಂಕರ್ ಅವರು ಆ ಚಿತ್ರದಲ್ಲಿನ ಪಾತ್ರ ನನಗೆ ಆಫರ್ ಮಾಡಿದರು. ರಜಿನಿಕಾಂತ್  ಕೂಡ ನನಗೆ ಕರೆ ಮಾಡಿ ದಯವಿಟ್ಟು ಆ ಪಾತ್ರ ಮಾಡಿ ಎಂದು ಕೇಳಿಕೊಂಡರು".

‘‘ಆ ಚಿತ್ರದ ಸ್ಕ್ರಿಪ್ಟ್ ಸೂಪರ್ ಆಗಿತ್ತು. ಆ ಚಿತ್ರ ಬಹಳ ಚೆನ್ನಾಗಿ ಓಡಲಿದೆಯೆಂದೂ ಗೊತ್ತಿತ್ತು. ಆದರೆ ಪ್ರತಿ ಬಾರಿ ನಾನು ಕಣ್ಣು ಮುಚ್ಚಿದಾಗಲೆಲ್ಲಾ ಆ ಪಾತ್ರದಲ್ಲಿ ನಾನು ರಜಿನಿ ಸರ್ ಅವರನ್ನು ನೋಡುತ್ತಿದ್ದೆ. ನಂತರ ಶಂಕರ್ ಅವರಿಗೆ ಕರೆ ಮಾಡಿ ಆ ಪಾತ್ರ ಮಾಡಲು ನನಗೆ ಸಾಧ್ಯವಿಲ್ಲ. ರಜಿನಿ ಸರ್ ಮಾತ್ರ ಅದನ್ನು ಮಾಡಲು ಸಾಧ್ಯವಿದೆ. ಅವರಿಗೆ ಸಾಟಿ ಯಾರೂ ಇಲ್ಲ’’ ಎಂದು ಹೇಳಿಬಿಟ್ಟೆ ಎಂದಿದ್ದಾರೆ ಆಮಿರ್.

2010ರಲ್ಲಿ ತೆರೆ ಕಂಡ ರಜಿನಿಕಾಂತ್ ಹಾಗು ಐಶ್ವರ್ಯ ರೈ ಅಭಿನಯದ ರೋಬೊಟ್ ಚಿತ್ರದ ಮುಂದುವರಿದ ಭಾಗವಾಗಿ 2.0 ಹೊರಬರಲಿದೆ. ಈ ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಅವರೂ ಪ್ರಮುಖ ಭೂಮಿಕೆಯಲ್ಲಿದ್ದು ಇದು ಅಕ್ಷಯ್ ಅವರ ಅಭಿನಯದ ಪ್ರಥಮ ತಮಿಳು ಚಿತ್ರವಾಗಿದೆ. ಚಿತ್ರ ಜನವರಿ 25, 2018ರಲ್ಲಿ ಬಿಡುಗಡೆಗೊಳ್ಳಲಿದೆ.