ಮೂರನೆ ಏಕದಿನ: ನ್ಯೂಝಿಲೆಂಡ್‌ ಗೆಲುವಿಗೆ 338 ರನ್‌ಗಳ ಕಠಿಣ ಸವಾಲು

ಕಾನ್ಪುರ, ಅ.29: ಇಲ್ಲಿನ ಗ್ರೀನ್ ಪಾರ್ಕ್‌ನಲ್ಲಿ ನಡೆಯುತ್ತಿರುವ ಮೂರನೆ ಹಾಗೂ ಅಂತಿಮ ಏಕದಿನ ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯದಲ್ಲಿ ನ್ಯೂಝಿಲೆಂಡ್ ವಿರುದ್ಧ ಭಾರತ ಆರಂಭಿಕ ದಾಂಡಿಗ ರೋಹಿತ್ ಶರ್ಮ ಮತ್ತು ನಾಯಕ ವಿರಾಟ್ ಕೊಹ್ಲಿ ಶತಕದ ನೆರವಿನಲ್ಲಿ ನಿಗದಿತ 50 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟದಲ್ಲಿ 337 ರನ್ ಗಳಿಸಿದೆ.

ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಭಾರತದ ಮೊದಲ ವಿಕೆಟ್‌ನ್ನು ಬೇಗನೆ ಕಳೆದುಕೊಂಡಿತು. ಶಿಖರ್ ಧವನ್ (14) ಅವರು 7ನೆ ಓವರ್‌ನ ಮೊದಲ ಎಸೆತದಲ್ಲಿ ಟಿಮ್ ಸೌಥಿಗೆ ವಿಕೆಟ್ ಒಪ್ಪಿಸಿದರು. ಆಗ ತಂಡದ ಸ್ಕೋರ್ 29 ಆಗಿತ್ತು. ಬಳಿಕ ರೋಹಿತ್ ಶರ್ಮ ಮತ್ತು ವಿರಾಟ್ ಕೊಹ್ಲಿ ಜೊತೆಯಾಗಿ ತಂಡವನ್ನು ಆಧರಿಸಿದರು.

ರೋಹಿತ್ ಶರ್ಮ 171ನೆ ಏಕದಿನ ಪಂದ್ಯದಲ್ಲಿ 106 ಎಸೆತಗಳಲ್ಲಿ 11 ಬೌಂಡರಿ ಮತ್ತು 2 ಸಿಕ್ಸರ್ ನೆರವಿನಲ್ಲಿ 15ನೆ ಏಕದಿನ ಶತಕ ದಾಖಲಿಸಿದರು.

ವಿರಾಟ್ ಕೊಹ್ಲಿ 202ನೆ ಏಕದಿನ ಪಂದ್ಯದಲ್ಲಿ 32ನೆ ಏಕದಿನ ಶತಕ ಪೂರೈಸಿದರು. ಕೊಹ್ಲಿ 94 ಎಸೆತಗಳಲ್ಲಿ 8 ಬೌಂಡರಿ ಮತ್ತು 1 ಸಿಕ್ಸರ್ ಸಹಾಯದಿಂದ ಶತಕ ಗಳಿಸಿದರು.

ಕೊಹ್ಲಿ ಮತ್ತು ರೊಹಿತ್ 2ನೆ ವಿಕೆಟ್‌ಗೆ 230 ರನ್‌ಗಳ ಜೊತೆಯಾಟ ನೀಡಿದರು. ರೋಹಿತ್ ಶರ್ಮ 147 ರನ್ (138ಎ, 18ಬೌ,2ಸಿ) ಗಳಿಸಿ ಸ್ಯಾಂಟ್ನೆರ್ ಎಸೆತದಲ್ಲಿ ಸೌಥಿಗೆ ಕ್ಯಾಚ್ ನೀಡಿದರು.

 ಕೊಹ್ಲಿ 113 ರನ್(106ಎ, 9ಬೌ,1ಸಿ) ಗಳಿಸಿ ಸೌಥಿ ಎಸೆತದಲ್ಲಿ ವಿಲಿಯಮ್ಸನ್‌ಗೆ ಕ್ಯಾಚ್ ನೀಡಿದರು.

ವಿಕೆಟ್ ಕೀಪರ್ ಮಹೇಂದ್ರ ಸಿಂಗ್ ಧೋನಿ 25 ರನ್, ಹಾರ್ದಿಕ್ ಪಾಂಡ್ಯ 8ರನ್, ಕೇದಾರ್ ಜಾಧವ್ 18 ರನ್ ಗಳಿಸಿ ಔಟಾದರು. ದಿನೇಶ್ ಕಾರ್ತಿಕ್ ಔಟಾಗದೆ 4ರನ್ ಗಳಿಸಿದರು.

ನ್ಯೂಝಿಲೆಂಡ್‌ನ ಟಿಮ್ ಸೌಥಿ(66ಕ್ಕೆ 2), ಆ್ಯಡಮ್ ಮಿಲ್ನೆ(64ಕ್ಕೆ 2), ಸ್ಯಾಂಟ್ನೆರ್(58ಕ್ಕೆ 2) ತಲಾ 2 ವಿಕೆಟ್ ಹಂಚಿಕೊಂಡರು.