300 ಗಿಗಾ ವ್ಯಾಟ್ ವಿದ್ಯುತ್ ಉತ್ಪಾದನೆ ಗುರಿ: ನರೇಂದ್ರ ಮೋದಿ

ಬೆಂಗಳೂರು, ಅ.29: ನಮ್ಮ ದೇಶದಲ್ಲಿ ನೀರು, ಗಾಳಿ, ಕಲ್ಲಿದ್ದಲು, ಸೌರ ಶಕ್ತಿ ಸೇರಿದಂತೆ ಎಲ್ಲ ಮೂಲಗಳಿಂದ 300 ಗಿಗಾ ವ್ಯಾಟ್ ವಿದ್ಯುತ್ ಉತ್ಪಾದನೆಗೆ ಅವಕಾಶಗಳಿವೆ. ಈ ನಿಟ್ಟಿನಲ್ಲಿ ಸರಕಾರದ ವತಿಯಿಂದ ನಿರಂತರ ಪ್ರಯತ್ನಗಳು ನಡೆಯುತ್ತಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ತಿಳಿಸಿದ್ದಾರೆ.

ರವಿವಾರ ನಗರದ ಅರಮನೆ ಮೈದಾನದಲ್ಲಿ ಯಡತೋರೆ ಮಠದ ಶಂಕರ ಭಾರತಿ ಸ್ವಾಮಿ ನೇತೃತ್ವದಲ್ಲಿ ಆಯೋಜಿಸಲಾಗಿದ್ದ ‘ದಶಮ ಸೌಂದರ್ಯ ಲಹರಿ ಪಾರಾಯಣೋತ್ಸವ ಮಹಾಸರ್ಮಪಣೆ’ಯಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.

ನಮ್ಮ ಸರಕಾರದ ಪ್ರಯತ್ನಗಳಿಂದಾಗಿ ಸೌರ ವಿದ್ಯುತ್ ಮಹತ್ವ ವಿಶ್ವಮಟ್ಟದಲ್ಲಿ ಚರ್ಚಿಸಲ್ಪಡುತ್ತಿದೆ. ಕೇಂದ್ರ ಸರಕಾರದ ಎಲ್ಲ ಯೋಜನೆಗಳನ್ನೂ ಪ್ರಕೃತಿಯ ಸಂರಕ್ಷಣೆ ನಡೆಯುತ್ತಿರುವುದನ್ನು ಕಾಣಬಹುದು ಎಂದು ಹೇಳಿದರು.

ವಿಶ್ವದ ಅತೀ ದೊಡ್ಡ ನವೀಕೃತ ವಿದ್ಯುತ್ ಬಳಕೆಯ ಯೋಜನೆ ನಮ್ಮ ದೇಶದಲ್ಲಿದೆ. 2040ರ ವೇಳೆಗೆ ಶೇ.40ರಷ್ಟು ವಿದ್ಯುತ್ ಅವಶ್ಯಕತೆಯನ್ನು ನವೀಕರಿಸಬಹುದಾದ ಮೂಲಗಳಿಂದ ಪಡೆಯುವ ಪ್ರಯತ್ನ ನಡೆಯುತ್ತಿದೆ. 2022ರಲ್ಲಿ ಭಾರತವು 75ನೆ ಸ್ವಾತಂತ್ರ್ಯ ದಿನಾಚರಣೆ ಆಚರಿಸುವ ವೇಳೆಗೆ 175 ಗೀಗಾ ವ್ಯಾಟ್ ನವೀಕರಿಸಬಹುದಾದ ಇಂಧನ ಉತ್ಪಾದನೆಯ ಗುರಿಯಿದೆ. ಕಳೆದ ಮೂರು ವರ್ಷಗಳಲ್ಲಿ 22 ಸಾವಿರ ಮೆಗಾವ್ಯಾಟ್‌ಗಿಂತ ಹೆಚ್ಚು ವಿದ್ಯುತ್ ಅನು ಗ್ರೀಡ್‌ಗೆ ಜೋಡಣೆ ಮಾಡಲಾಗಿದೆ ಎಂದು ಹೇಳಿದರು.

'ಸ್ವಚ್ಛ ಅಡುಗೆ ಮನೆ ಚಳವಳಿ'ಗೆ ಕೈ ಜೋಡಿಸಲು ಕರೆ: ಬೆಂಗಳೂರು ನವೋದ್ಯಮಗಳ ತವರು. ಇಲ್ಲಿನ ಯುವಕರು ಹೊಸ ಆವಿಷ್ಕಾರಗಳ ಮೂಲಕ ಖ್ಯಾತಿಯನ್ನು ಹೊಂದಿದ್ದಾರೆ. ಬನ್ನಿ ನಾವು ಸ್ವಚ್ಛ ಅಡುಗೆ ಮನೆ ಚಳವಳಿಗೆ ಕೈ ಜೋಡಿಸೋಣ ಎಂದು ಯುವಕರಿಗೆ ನರೇಂದ್ರಮೋದಿ ಕರೆ ನೀಡಿದರು.

ಸೋಲಾರ್ ವಿದ್ಯುತ್ ಅಡುಗೆ ಒಲೆಯನ್ನು ಸಿದ್ಧಪಡಿಸೋಣ. ಅರಣ್ಯ ಪ್ರದೇಶದಲ್ಲಿರುವ ಮಹಿಳೆಯರು ಕಟ್ಟಿಗೆಗಳ ಮೊರೆ ಹೋಗದೆ ಸೌರ ವಿದ್ಯುತ್‌ನ ಒಲೆಯನ್ನು ಬಳಸಿ, ಸುರಕ್ಷಿತವಾಗಿ, ಕಡಿಮೆ ಖರ್ಚಿನಲ್ಲಿ ಅಡುಗೆ ಸಿದ್ಧಪಡಿಸುವಂತಾಗಲಿ. ಆ ಮೂಲಕ ಅರಣ್ಯ ಸಂಪತ್ತನ್ನು ರಕ್ಷಿಸೋಣ ಎಂದು ಹೇಳಿದರು.

ಹೊಸ ಪೀಳಿಗೆಗೆ ಅಗತ್ಯವಿರುವ ಆವಿಷ್ಕಾರಗಳತ್ತ ಗಮನ ಹರಿಸೋಣ. ಎಲ್ಲ ಸಂಸ್ಥೆಗಳು ತಮಗೆ ಅಗತ್ಯವಿರುವ ವಿದ್ಯುತ್ ಉತ್ಪಾದನೆ ಮಾಡಿಕೊಳ್ಳುವಲ್ಲಿ ಸಶಕ್ತರಾದರೆ, ಇದರ ಪರಿಣಾಮವು ಸಮಾಜದ ಎಲ್ಲ ವಿಭಾಗಗಳ ಮೇಲೆ ಬೀರುತ್ತದೆ. ಪರಿಸರ ಸಂರಕ್ಷಣೆಯೊಂದಿಗೆ ದೇಶ ಹಾಗೂ ಜನತೆಯ ಕಲ್ಯಾಣವಾಗುತ್ತದೆ ಎಂದು ಅವರು, ಎಲ್‌ಇಡಿ ಬಲ್ಬ್‌ಗಳಿಗೆ ಮೊದಲು 350 ರೂ.ಗಳಿಗಿಂತ ಹೆಚ್ಚಿನ ಮೊತ್ತ ಪಾವತಿ ಮಾಡಬೇಕಿತ್ತು. ಉಜಾಲ ಯೋಜನೆಯಡಿಯಲ್ಲಿ 40-45 ರೂ.ಗಳಿಗೆ ಎಲ್‌ಇಡಿ ಬಲ್ಬ್ ಸಿಗುತ್ತಿದೆ. ಈವರೆಗೆ ದೇಶದಲ್ಲಿ 27 ಕೋಟಿಗಿಂತ ಹೆಚ್ಚು ಎಲ್‌ಇಡಿ ಬಲ್ಬ್‌ಗಳನ್ನು ಹಂಚಿಕೆ ಮಾಡಲಾಗಿದೆ. ಕರ್ನಾಟಕದಲ್ಲಿ 1.75 ಕೋಟಿ ಎಲ್‌ಇಡಿ ಬಲ್ಬ್‌ಗಳನ್ನು ಹಂಚಿಕೆ ಮಾಡಲಾಗಿದೆ ಎಂದು ವಿವರಣೆ ನೀಡಿದರು.

ಎಲ್‌ಇಡಿ ಬಲ್ಬ್‌ಗಳ ಬೆಲೆ ಇಳಿಕೆಯಿಂದಾಗಿ ಸುಮಾರು 7 ಸಾವಿರ ಕೋಟಿ ರೂ. ಜನರ ಹಣ ಉಳಿತಾಯವಾಗಿದೆ. ಎಲ್‌ಇಡಿ ಬಲ್ಬ್‌ಗಳ ಬಳಕೆಯಿಂದ ಮನೆಗಳ ವಿದ್ಯುತ್ ಬಿಲ್ ಕಡಿಮೆಯಾಗುತ್ತದೆ. ಇದರಿಂದ, ವಿದ್ಯುತ್ ಬಳಕೆಯು ಕಡಿಮೆಯಾಗುತ್ತದೆ. ಒಂದು ವರ್ಷದಲ್ಲಿ ಮಧ್ಯಮ ವರ್ಗದ ಕುಟುಂಬಗಳ 14 ಸಾವಿರ ಕೋಟಿ ರೂ.ಗಳಿಗಿಂತ ಹೆಚ್ಚು ಉಳಿತಾಯವಾಗಿದೆ ಎಂದು ಹೇಳಿದರು.

ಉಜ್ವಲ ಯೋಜನೆಯಡಿ 3 ಕೋಟಿ ಮಹಿಳೆಯರಿಗೆ ಉಚಿತವಾಗಿ ಅನಿಲ ಅಡುಗೆ ಸಿಲಿಂಡರ್ ಸಂಪರ್ಕ ಕಲ್ಪಿಸಿದ್ದೇವೆ. ನಮ್ಮ ದೇಶದಲ್ಲಿ ಸಮಯದ ಜೊತೆಗೆ ಪರಿವರ್ತನೆಯು ಆಗುತ್ತಿದೆ. ಇದೇ ವೇಳೆಗೆ ಕೆಲವು ಅನಿಷ್ಠಗಳು ಸೇರಿಸಿಕೊಳ್ಳುತ್ತವೆ. ಅವುಗಳನ್ನು ಸುಧಾರಿಸಲು ಸಮಾಜದ ನಡುವೆಯೇ ಪ್ರಯತ್ನಗಳು ಆಗುತ್ತವೆ ಎಂದು ನರೇಂದ್ರ ಮೋದಿ ತಿಳಿಸಿದರು.