ಭಾರತದ ‘ಸ್ಮಾರ್ಟ್ ಬಾಂಬ್’ ಪರೀಕ್ಷಾ ಪ್ರಯೋಗ ಯಶಸ್ವಿ
ಹೊಸದಿಲ್ಲಿ, ನ. 3: ದೇಶೀಯವಾಗಿ ನಿರ್ಮಿಸಲಾಗಿರುವ ಲಘು ಭಾರದ ‘ಸ್ಮಾರ್ಟ್’ ಬಾಂಬ್ನ ಪರೀಕ್ಷಾ ಪ್ರಯೋಗವನ್ನು ಒಡಿಶಾದ ಚಾಂಡಿಪುರದಲ್ಲಿ ಯಶಸ್ವಿಯಾಗಿ ನಡೆಸಲಾಗಿದೆ ಎಂದು ಸರಕಾರ ತಿಳಿಸಿದ್ದು , ಇದರೊಂದಿಗೆ ಈ ರೀತಿಯ ಆಧುನಿಕ ಶಸ್ತ್ರಾಸ್ತ್ರ ನಿರ್ಮಾಣ ಕಾರ್ಯದಲ್ಲಿ ಮೈಲುಗಲ್ಲನ್ನು ಸಾಧಿಸಿದಂತಾಗಿದೆ ಎಂದಿದೆ.
‘ಸ್ಮಾರ್ಟ್ ಆ್ಯಂಟಿ ಏರ್ಫೀಲ್ಡ್ ವೆಪನ್(ಎಸ್ಎಎಡಬ್ಲು) ಎಂಬ ಹೆಸರಿನ ಈ ಬಾಂಬನ್ನು ಭಾರತೀಯ ವಾಯುಪಡೆಯ ಯುದ್ಧವಿಮಾನವು ಚಾಂಡಿಪುರದ ಪರೀಕ್ಷಾ ನೆಲೆಯ ಮೇಲೆ ಯಶಸ್ವಿಯಾಗಿ ಪ್ರಯೋಗಿಸಿದೆ. ಮೂರು ಪ್ರತ್ಯೇಕ ಪರೀಕ್ಷೆ ನಡೆಸಲಾಗಿದ್ದು ಮೂರೂ ಯಶಸ್ವಿಯಾಗಿದೆ . ವಿಮಾನದಿಂದ ಕೆಳಕ್ಕೆ ಎಸೆಯಲಾದ ಈ ಬಾಂಬನ್ನು ವಾಯುಯಾನ ವ್ಯವಸ್ಥೆಯ ಮೂಲಕ ನಿರ್ಧಿಷ್ಟ ಗುರಿಗೆ ತಲುಪಿಸಲಾಗಿದೆ ಎಂದು ರಕ್ಷಣಾ ಸಚಿವಾಲಯದ ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಮಾರ್ಗದರ್ಶಕ ವ್ಯವಸ್ಥೆಯ ಮೂಲಕ ಬಾಂಬ್ ಎಸೆಯುವ ಪ್ರಕ್ರಿಯೆಯನ್ನು ‘ಸ್ಮಾರ್ಟ್ ಬಾಂಬ್’ ಹೊಂದಿರುತ್ತದೆ.
‘ರಿಸರ್ಚ್ ಸೆಂಟರ್ ಇಮಾರತ್(ಆರ್ಸಿಐ), ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ(ಡಿಆರ್ಡಿಒ) , ಭಾರತೀಯ ವಾಯುಪಡೆಯ ಜಂಟಿ ಕಾರ್ಯಕ್ರಮದ ಅಂಗವಾಗಿ ‘ಸ್ಮಾರ್ಟ್ ಬಾಂಬ್’ ಅಭಿವೃದ್ಧಿಪಡಿಸಲಾಗಿದೆ.
ಪರೀಕ್ಷಾ ಪ್ರಯೋಗ ಯಶಸ್ವಿಯಾದ ಬಗ್ಗೆ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್ ಡಿಆರ್ಡಿಒ ವಿಜ್ಞಾನಿಗಳಿಗೆ ಹಾಗೂ ಭಾರತೀಯ ವಾಯುಪಡೆಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಈ ಬಾಂಬನ್ನು ಶೀಘ್ರ ಸೇನಾಪಡೆಯ ಶಸ್ತ್ರ ವಿಭಾಗಕ್ಕೆ ಸೇರಿಸಲಾಗುವುದು ಎಂದು ಡಿಆರ್ಡಿಒ ಅಧ್ಯಕ್ಷ ಎಸ್.ಕ್ರಿಸ್ಟೋಫರ್ ತಿಳಿಸಿದ್ದಾರೆ. ಮಾರ್ಗದರ್ಶಕ ಬಾಂಬ್ಗಳನ್ನು ದೇಶೀಯವಾಗಿ ನಿರ್ಮಿಸುವ ನಿಟ್ಟಿನಲ್ಲಿ ಇದು ಒಂದು ಮಹತ್ವದ ಮೈಲುಗಲ್ಲಾಗಿದೆ ಎಂದು ಡಿಆರ್ಡಿಒದ ಕ್ಷಿಪಣಿ ಮತ್ತು ಯುದ್ಧತಂತ್ರಕುಶಲ ವಿಭಾಗದ ಮಹಾನಿರ್ದೇಶಕ ಜಿ.ಸತೀಶ್ ರೆಡ್ಡಿ ತಿಳಿಸಿದ್ದಾರೆ.
