ಸಮ ಸಮಾಜಕ್ಕಾಗಿ ಸಾಮಾಜಿಕ ಬದಲಾವಣೆ ಅಗತ್ಯ: ಸಿಎಂ ಸಿದ್ದರಾಮಯ್ಯ

ಬೆಂಗಳೂರು, ನ.6: ಕನಕದಾಸರು, ಬಸವಣ್ಣನವರು ಸಮಾಜದಲ್ಲಿ ಬದಲಾವಣೆ ಆಗಬೇಕು. ಇಲ್ಲದಿದ್ದರೆ ಸಮ ಸಮಾಜ ನಿರ್ಮಾಣವಾಗಲು ಸಾಧ್ಯವಿಲ್ಲ ಎಂದು ಪ್ರತಿಪಾದಿಸಿದ್ದರು. ಸಮಾಜದಲ್ಲಿ ಜಾತಿ ವ್ಯವಸ್ಥೆ ಸ್ವಲ್ಪಸುಧಾರಣೆ ಕಾಣುತ್ತದೆ. ಮತ್ತೆ ಅಲ್ಲೇ ನಿಲ್ಲುತ್ತದೆ. ಶೋಷಿತ ವರ್ಗದ ಜನ ಜಾಗೃತರಾದರೆ ಮಾತ್ರ ಸಂಪೂರ್ಣ ಸುಧಾರಣೆ ಕಾಣಲು ಸಾಧ್ಯ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ತಿಳಿಸಿದ್ದಾರೆ.

ಸೋಮವಾರ ವಿಧಾನಸೌಧದ ಮುಂಭಾಗದಲ್ಲಿ ಆಯೋಜಿಸಲಾಗಿದ್ದ ಸಂತ ಶ್ರೇಷ್ಠ ಕನಕದಾಸರ ಜಯಂತಿ, ಕನಕ ಶ್ರೀ ಪ್ರಶಸ್ತಿ, ಕನಕ ಗೌರವ ಹಾಗೂ ಕನಕ ಯುವ ಪುರಸ್ಕಾರ ಪ್ರದಾನ ಸಮಾರಂಭವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ದೇಶದ ಸಂಪತ್ತು, ಅಧಿಕಾರ ಎಲ್ಲರಿಗೂ ಸಮನಾಗಿ ಹಂಚಿಕೆ ಆದಾಗ ಮಾತ್ರ ಶೋಷಿತರಿಗೆ ಆರ್ಥಿಕ, ಸಾಮಾಜಿಕ ಸ್ವಾತಂತ್ರ್ಯ ಸಿಗಲು ಸಾಧ್ಯ. ಯಾರು ಬದಲಾವಣೆ ಪರವಾಗಿದ್ದಾರೆ. ವಿರುದ್ಧವಾಗಿ ನಿಂತಿರುವವರು ಯಾರು ಎಂಬುದನ್ನು ಜನ ಗುರುತಿಸಬೇಕು ಎಂದು ಅವರು ಕಿವಿಮಾತು ಹೇಳಿದರು.

ಕೆಲವರು ಪರಿವರ್ತನಾ ರ್ಯಾಲಿ ಹೊರಟಿದ್ದಾರೆ. ಮೊದಲು ಅವರು ಕೋಮುವಾದದಿಂದ ಜಾತ್ಯತೀತವಾದಕ್ಕೆ ಪರಿವರ್ತನೆ ಆಗಬೇಕು. ಅದಿಲ್ಲದೆ ಯಾವ ರ್ಯಾಲಿ ಮಾಡಿ ಏನು ಪ್ರಯೋಜನ ಎಂದು ಪರೋಕ್ಷವಾಗಿ ಬಿಜೆಪಿಯವರು ಮಾಡುತ್ತಿರುವ ರ್ಯಾಲಿಯನ್ನು ಮುಖ್ಯಮಂತ್ರಿ ಟೀಕಿಸಿದರು.

ನಾವು ನುಡಿದಂತೆ ನಡೆದಿದ್ದೇವೆ. ಅದನ್ನು ತಡೆದುಕೊಳ್ಳಲು ಆಗದವರು ರ್ಯಾಲಿ ಹೊರಟು ಜನರನ್ನು ದಾರಿ ತಪ್ಪಿಸುವ ಪ್ರಯತ್ನ ಮಾಡುತ್ತಿದ್ದಾರೆ. ಇನ್ನೂ ಕೆಲವರದ್ದು ಕುಮಾರ ಪರ್ವವಂತೆ. ನಮ್ಮದು ಸಾಧನೆಯ ಪರ್ವ. ಜನ ಈಗಾಗಲೇ ತೀರ್ಮಾನ ಮಾಡಿದ್ದಾರೆ. ನಮ್ಮ ಕಾರ್ಯಕ್ರಮಗಳನ್ನು ಮೆಚ್ಚಿದ್ದಾರೆ. ಮತ್ತೆ ನಮಗೆ ಆಶೀರ್ವಾದ ಮಾಡುತ್ತಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಕನಕದಾಸರು, ಬಸವಣ್ಣನವರು ಧರ್ಮಕ್ಕೆ ವೈಚಾರಿಕತೆ ಕೊಟ್ಟವರು. ಯಾರೂ ಮಾಡದ ಜಯಂತಿಯನ್ನು ನಾವು ಮಾಡಿದ್ದೇವೆ. ಕೆಲವರು ಟಿಪ್ಪು ಜಯಂತಿಯನ್ನು ವಿರೋಧ ಮಾಡುತ್ತಿದ್ದಾರೆ. ಟಿಪ್ಪು ಮತಾಂಧ ಎಂದು ಹೇಳಿ ಜನರನ್ನು ತಪ್ಪುದಾರಿಗೆ ಎಳೆಯುತ್ತಿದ್ದಾರೆ. ಆ ರೀತಿ ಆಗಿದ್ದರೆ ತಮ್ಮ ದಿವಾನರನ್ನಾಗಿ ಪೂರ್ಣಯ್ಯ ಅವರನ್ನು ಟಿಪ್ಪುನೇಮಕ ಮಾಡಿಕೊಳ್ಳುತ್ತಿರಲಿಲ್ಲ ಎಂದು ಹೇಳಿದರು.

ಹಲವಾರು ಮಹಾ ಪುರುಷರು, ಮಹಾ ಮಾತೆಯರ ಜಯಂತಿಯನ್ನು ಸರಕಾರ ರಾಜಕೀಯ ಕಾರಣಗಳಿಗಾಗಿ ಆಚರಣೆ ಮಾಡುತ್ತಿಲ್ಲ. ಕೆಲವರು ಇದನ್ನು ವಿರೋಧ ಮಾಡುತ್ತಾರೆ. ಕಾಮಾಲೆ ಕಣ್ಣಿನವರ ಮಾತುಗಳಿಗೆ ಸೊಪ್ಪುಹಾಕಬಾರದು ಎಂದು ಮನವಿ ಮಾಡಿದರು.

ಯಾರೂ ಇತಿಹಾಸ ತಿರುಚಬಾರದು. ತಿರುಚಿದರೆ ಅದು ಇತಿಹಾಸಕ್ಕೆ ಮಾಡುವ ದ್ರೋಹ. ಸಮಾಜದ ಒಳಿತಿಗೆ ದುಡಿದವರು, ನಾಡಿಗಾಗಿ ಪ್ರಾಣತ್ಯಾಗ ಮಾಡಿದವರು ಯಾರೇ ಆಗಿರಲಿ ಅವರನ್ನು ನೆನಪು ಮಾಡಿಕೊಳ್ಳಬೇಕು ಎಂದು ಅವರು, ಹುಟ್ಟು, ಸಾವಿನ ನಡುವಣ ಬದುಕು ಸಾರ್ಥಕ ಮಾಡಿಕೊಳ್ಳಬೇಕಾದರೆ ಮಹಾ ಪುರುಷರು ನಮಗೆ ಸ್ಫೂರ್ತಿ ಆಗಬೇಕು. ಮಹಾ ಪುರುಷರು ಆಕಸ್ಮಿಕವಾಗಿ ಹುಟ್ಟಿರುತ್ತಾರೆ. ಅವರನ್ನು ಒಂದು ಸಮುದಾಯಕ್ಕೆ ಸೀಮಿತ ಮಾಡಬಾರದು. ಅವರು ಸಮಾಜದ ಆಸ್ತಿ. ಹೀಗಾಗಿ ಸರಕಾರ ಎಲ್ಲ ಮಹಾ ಪುರುಷರು, ಮಹಾ ಮಾತೆಯರ ಜಯಂತಿ ಆಚರಿಸುತ್ತದೆ ಎಂದು ತಿಳಿಸಿದರು.

ಮಹಾ ಪುರುಷರು, ದಾರ್ಶನಿಕರು ಜಡತ್ವದಿಂದ ಕೂಡಿದ್ದ ಧರ್ಮಕ್ಕೆ ಚಲನೆ ನೀಡಿದರು. ಅಂತಹ ಮಹಾ ಪುರುಷರ ವಿಚಾರಧಾರೆ ಅನುಸರಿಸದಿದ್ದರೆ ಸಮಾಜಕ್ಕೆ ಯಾವುದೇ ಕೊಡುಗೆ ನೀಡಲು ಅಸಾಧ್ಯ. ಕನಕದಾಸರು ಭಕ್ತಿ, ದೇವರ ವರ್ಣನೆಗೆ ಮಾತ್ರ ಸೀಮಿತ ಆಗಿರಲಿಲ್ಲ. ಸಮಾಜದಲ್ಲಿನ ಅಸಮಾನತೆ ತೊಡೆದು ಹಾಕಲು ಶ್ರಮಿಸಿದರು ಎಂದರು.

ಜನರಿಗಾಗಿ ಧರ್ಮವೇ ಹೊರತು, ಧರ್ಮಕ್ಕಾಗಿ ಜನ ಅಲ್ಲ. ಕನಕದಾಸರು ಹಿಂದೂ ಧರ್ಮದಲ್ಲಿದ್ದುಕೊಂಡೇ ಅಲ್ಲಿನ ಕೊಳಕನ್ನು ತೆಗೆಯಲು ಹೊರಟಿದ್ದವರು. ದಾಸ ಪರಂಪರೆಯಲ್ಲಿ ಕನಕದಾಸರು ಮಹಾನ್ ವ್ಯಕ್ತಿಯಾಗಿ ಕಾಣಿಸಿಕೊಂಡಿದ್ದಾರೆ ಎಂದು ಸಿದ್ದರಾಮಯ್ಯ ತಿಳಿಸಿದರು.

ಪ್ರಶಸ್ತಿ: ಕನಕ ಶ್ರೀ ಪ್ರಶಸ್ತಿ-ಡಾ.ಗೋಕುಲನಾಥ್, ಕನಕ ಗೌರವ ಪುರಸ್ಕಾರ-ಹಿರಿಯ ವಿದ್ವಾಂಸ ಡಾ.ಕಬ್ಬಿನಾಲೆ ವಸಂತ ಭಾರದ್ವಾಜ್, ಕನಕ ಯುವ ಪುರಸ್ಕಾರ-ಯುವ ಲೇಖಕ ಡಾ.ಗವಿಸಿದ್ದಪ್ಪ ಎಚ್.ಪಾಟೀಲ್‌ಗೆ ಮುಖ್ಯಮಂತ್ರಿ ಪ್ರಶಸ್ತಿ ಪ್ರದಾನ ಮಾಡಿದರು.

ಕಾರ್ಯಕ್ರಮದ ದಿವ್ಯ ಸಾನಿಧ್ಯವನ್ನು ಕಾಗಿನೆಲೆ ಕನಕ ಗುರುಪೀಠದ ಶ್ರೀ ನಿರಂಜನಾನಂದಪುರಿ ಸ್ವಾಮಿವಹಿಸಿದ್ದರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಉಮಾಶ್ರೀ, ಸಾರಿಗೆ ಸಚಿವ ಎಚ್.ಎಂ.ರೇವಣ್ಣ, ಬೆಂಗಳೂರು ಅಭಿವೃದ್ಧಿ ಹಾಗೂ ನಗರ ಯೋಜನೆ ಸಚಿವ ಕೆ.ಜೆ.ಜಾರ್ಜ್, ಸಂಸದ ಪ್ರಕಾಶ್ ಹುಕ್ಕೇರಿ, ಶಾಸಕ ಭೈರತಿ ಬಸವರಾಜ, ವಿಧಾನಪರಿಷತ್ ಸದಸ್ಯರಾದ ಗೋವಿಂದರಾಜ್, ಭೈರತಿ ಸುರೇಶ್, ಮೇಯರ್ ಸಂಪತ್‌ರಾಜ್ ಸೇರಿದಂತೆ ಇನ್ನಿತರರು ಉಪಸ್ಥಿತರಿದ್ದರು.

ಮುಖ್ಯಮಂತ್ರಿ ಎದುರು ಆತ್ಮಹತ್ಯೆಗೆ ಯತ್ನ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಭಾಷಣ ಮಾಡಲು ಮುಂದಾಗುತ್ತಿದ್ದಂತೆ 1993ರ ಕೆಎಎಸ್ ಬ್ಯಾಚ್ ಅಭ್ಯರ್ಥಿ ಮೈಸೂರು ಮೂಲದ ಪರಶುರಾಮ ಎಂಬವರು ವಿಷದ ಬಾಟಲಿ ಹಿಡಿದುಕೊಂಡು ವೇದಿಕೆ ಮೇಲೆ ಹತ್ತಲು ಪ್ರಯತ್ನಿಸಿದ್ದಲ್ಲದೆ, ಆತ್ಮಹತ್ಯೆ ಮಾಡಿಕೊಳ್ಳುವ ಬೆದರಿಕೆ ಹಾಕಿದರು. ಎರಡು ತಿಂಗಳ ಹಿಂದೆ ನಿಮಗೆ ಮನವಿ ಕೊಟ್ಟಿದ್ದೆ. ಆದರೆ, ಯಾವುದೇ ಪ್ರಯೋಜನವಾಗಲಿಲ್ಲ. ‘ನನಗೆ ನ್ಯಾಯಬೇಕು, ನ್ಯಾಯ ಕೊಡಿಸಿ’ ಇಲ್ಲದಿದ್ದರೆ ವಿಷ ಕುಡಿಯುತ್ತೇನೆ ಎಂದು ಕೂಗಾಡಿದರು. ಕೂಡಲೇ ಪೊಲೀಸರು ಆತನನ್ನು ಹಿಡಿದುಕೊಂಡು ವಿಷ ಸೇವಿಸದಂತೆ ರಕ್ಷಿಸಿದರು. ಅಲ್ಲದೆ, ಸ್ಥಳದಿಂದ ಹೊರಗೆ ಕರೆದೊಯ್ದರು.