ಪ್ಯಾರಡೈಸ್ ಪೇಪರ್ಸ್ ಸೋರಿಕೆ: ವಂಚಕರ ಪಟ್ಟಿಯಲ್ಲಿ ಭಾರತೀಯ ಮಾಧ್ಯಮಗಳೂ ಶಾಮೀಲು

 ಹೊಸದಿಲ್ಲಿ, ನ.7: ಪ್ಯಾರಡೈಸ್ ಪೇಪರ್ಸ್ ಸೋರಿಕೆಯಲ್ಲಿ ಹಲವು ಸಾಗರೋತ್ತರ ಕಂಪೆನಿಗಳ ಹೆಸರುಗಳನ್ನು ಬಯಲು ಮಾಡಿದ ನಂತರ ಇದೀಗ ಈ ವರದಿಯಲ್ಲಿ ಕೆಲವು ಭಾರತೀಯ ಮಾಧ್ಯಮಗಳ ಸಂಸ್ಥೆಗಳ ಹೆಸರೂ ಕಾಣಿಸಿಕೊಳ್ಳುತ್ತಿವೆ.

ಈ ವಂಚನಾ ಜಾಲದಲ್ಲಿ ನೆಟ್‌ವರ್ಕ್ 18 ಸೇರಿದಂತೆ ಹಿಂದೂಸ್ಥಾನ್ ಟೈಮ್ಸ್ ಗ್ರೂಪ್ ಮತ್ತು ಝೀ ಮೀಡಿಯಾ ಗ್ರೂಪ್ ಹೆಸರುಗಳು ಕೂಡಾ ಶಾಮೀಲಾಗಿವೆ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ತನಿಖೆಯಲ್ಲಿ ಬಯಲಾಗಿದೆ.

ಇಂಡಿಯನ್ ಎಕ್ಸ್‌ಪ್ರೆಸ್ ಆ್ಯಪಲ್‌ಬೈಯಿಂದ ಪಡೆದುಕೊಂಡಿರುವ ಮಾಹಿತಿಯಂತೆ, ಹಿಂದೂಸ್ಥಾನ್ ಟೈಮ್ಸ್ ಗ್ರೂಪ್ (ಎಚ್‌ಟಿ ಗ್ರೂಪ್) ಎಚ್‌ಟಿಬಿಸಿ ಲಿಮಿಟೆಡ್ ಮೂಲಕ ಗೊ4ಐ.ಕಾಮ್ (ಬರ್ಮುಡಾ) ಎಂಬ ಸಂಸ್ಥೆಯನ್ನು ಹುಟ್ಟುಹಾಕಿತ್ತು. ಈ ಸಂಸ್ಥೆಯ ಮೂರು ಪಾಲುದಾರರಲ್ಲಿ ಎಚ್‌ಟಿಬಿಸಿ ಕೂಡಾ ಒಂದಾಗಿತ್ತು.

ಕೇಮನ್ ಐಲ್ಯಾಂಡ್‌ನಲ್ಲಿರುವ ಸ್ವಾಮಿನ್ ಇನ್ವೆಸ್ಟ್‌ಮೆಂಟ್ಸ್ ಮತ್ತು ಬರ್ಮುಡಾ ಮೂಲದ ಇಂಡೋಸಿಯನ್ ಇಂಟರ್ನೆಟ್ ಹೋಲ್ಡಿಂಗ್ಸ್ ಇತರ ಎರಡು ಪಾಲುದಾರ ಸಂಸ್ಥೆಗಳಾಗಿವೆ. 2003-04ರ ಎಚ್‌ಟಿ ಗ್ರೂಪ್‌ನ ವಾರ್ಷಿಕ ವರದಿಯಲ್ಲಿ ಗೊ4ಐ.ಕಾಮ್ (ಬರ್ಮುಡಾ)ವನ್ನು ಅಂಗಸಂಸ್ಥೆಯೆಂದು ಉಲ್ಲೇಖಿಸಿದ್ದರೂ ಅದರಲ್ಲಿ ಪಾಲುದಾರಿಕೆಯಿರುವ ಬಗ್ಗೆ ಯಾವುದೇ ಮಾಹಿತಿಯನ್ನು ನೀಡಿರಲಿಲ್ಲ.

 2003-04ರಲ್ಲಿ ಗೊ4ಐ.ಕಾಮ್ ಸಂಸ್ಥೆ ನಷ್ಟ ಅನುಭವಿಸಿತ್ತು ಎಂದು ಪ್ರಧಾನ ಸಂಸ್ಥೆ ಹಿಂದೂಸ್ಥಾನ್ ಟೈಮ್ಸ್ ಲಿಮಿಟೆಡ್ ತಿಳಿಸಿತ್ತು. ಆದರೆ ಸಂಸ್ಥೆ ಯಾವ ರೀತಿಯ ವ್ಯವಹಾರದಲ್ಲಿ ತೊಡಗಿದೆ ಮತ್ತು ಆ ವರ್ಷ ಸಂಸ್ಥೆಯ ಆದಾಯದ ಬಗ್ಗೆ ಯಾವುದೇ ಮಾಹಿತಿಯನ್ನು ನೀಡಿರಲಿಲ್ಲ.

ಅದಕ್ಕೂ ಹೆಚ್ಚಾಗಿ ಕಂಪೆನಿಗಳ ನೋಂದಾಣಿ ಪಟ್ಟಿಯಲ್ಲಿ 2004ರ ನಂತರ ಬರ್ಮುಡಾ ಮೂಲದ ಗೋ4ಐ.ಕಾಮ್ ಬಗ್ಗೆ ಯವುದೇ ಉಲ್ಲೇಖವಿರಲಿಲ್ಲ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ.

ಎಚ್‌ಟಿ ಗ್ರೂಪ್‌ನ ಮುಖ್ಯಸ್ಥೆ ಶೋಭನಾ ಭಾರ್ತಿಯ ಮತ್ತಾಕೆಯ ಮಗ ಪ್ರಿಯವ್ರತ್ ಗೊ4ಐ.ಕಾಮ್ ಸಂಸ್ಥೆಯ ನಿರ್ದೇಶಕರು ಎಂದು ತಿಳಿದುಬಂದಿದ್ದು ಇವರು ಎಚ್‌ಟಿಬಿಸಿ ಲಿಮಿಟೆಡ್‌ನ ಕೂಡಾ ನಿರ್ದೇಶಕರಾಗಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಶೋಭನಾ ಭಾರ್ತಿಯ ಗೊ4ಐ.ಕಾಮ್ (ಬರ್ಮುಡಾ ಎಚ್‌ಟಿ ಲಿಮಿಟೆಡ್‌ನ ಅಂಗಸಂಸ್ಥೆಯಾಗಿದ್ದು ಅಂತರ್ಜಾಲ ಮತ್ತು ಅದಕ್ಕೆ ಸಂಬಂಧಿತ ವ್ಯವಹಾರವನ್ನು ನೋಡಿಕೊಳ್ಳಲು ರಚಿಸಲಾಗಿತ್ತು ಎಂದು ತಿಳಿಸಿದ್ದಾರೆ.

ಈ ಸಂಸ್ಥೆಯನ್ನು ಎಲ್ಲಾ ಅಗತ್ಯ ಅನುಮತಿಗಳನ್ನು ಪಡೆದ ನಂತರವೇ ತೆರೆಯಲಾಗಿದೆ ಎಂದು ಹೇಳಿರುವ ಅವರು 2004ರಲ್ಲಿ ಅದನ್ನು ಮುಚ್ಚಲಾಯಿತು ಎಂದು ಸ್ಪಷ್ಟಪಡಿಸಿದ್ದಾರೆ.

  ಇನ್ನು ಪಟ್ಟಿಯಲ್ಲಿರುವ ಇನ್ನೊಂದು ಮಾದ್ಯಮ ಸಂಸ್ಥೆ ಎಸ್ಸೆಲ್ ಗ್ರೂಪ್ ತನ್ನ ಅಂಗಸಂಸ್ಥೆ ವೆರಿಯಾ ಲೈಫ್‌ಸ್ಟೈಲ್‌ನಿಂದ ಉಂಟಾದ ಸಾಲವನ್ನು ಮರುಪಾವತಿಸಲು ಲೋನ್‌ಗಳ ಸರಪಣಿಯನ್ನು ರಚಿಸಿದೆ ಎಂದು ಪ್ಯಾರಡೈಸ್ ಪೇಪಸ್ನ್‌ಲ್ಲಿ ತಿಳಿಸಲಾಗಿದೆ ಎಂದು ಎಕ್ಸ್‌ಪ್ರೆಸ್ ಬಹಿರಂಗಪಡಿಸಿದೆ.

ಆ್ಯಪಲ್‌ಬೈ ದಾಖಲೆಗಳಂತೆ 62 ಮಿಲಿಯನ್ ಡಾಲರ್‌ನಷ್ಟು ಲೋನ್ ಮೊತ್ತವನ್ನು ಝೀ ಎಂಟರ್‌ಟೈನ್ಮೆಂಟ್ ಎಂಟರ್‌ಪ್ರೈಸಸ್‌ನ ಪ್ರೋತ್ಸಾಹ ಶೇರ್‌ಗಳ ಪರೋಕ್ಷ ನೆರವಿನಿಂದ ಪಡೆಯಲಾಗಿತ್ತು. ಕ್ರೆಡಿಟ್ ಸೂಸ್‌ನಿಂದ ಈ ಸಾಲವನ್ನು ಅದಾಗಲೇ ಇದ್ದ ಸಾಗರೋತ್ತರ ಪ್ರೋತ್ಸಾಹಕ ಸಾಲವನ್ನು ಮರುಪಾವತಿಸುವ ಸಲುವಾಗಿ 2013ರಲ್ಲಿ ಪಡೆಯಲಾಗಿತ್ತು.

ಸಾಗರದಾಚೆಗಿನ ಒಂದು ಸಂಸ್ಥೆಗೆ ಸಾಲ ನೀಡಿದ್ದು ಅದು ಇನ್ನೊಂದು ಸಾರಗೋತ್ತರ ಕಂಪೆನಿಯ ಮೂಲಕ ವ್ಯವಹಾರ ನಡೆಸುತ್ತಿತ್ತು. ಈ ರೀತಿಯಲ್ಲಿ ವ್ಯವಹಾರಗಳ ಸಂಕೀರ್ಣ ಜಾಲವನ್ನೇ ಸೃಷ್ಟಿ ಮಾಡಲಾಗಿತ್ತು.

ಈ ಬಗ್ಗೆ ಎಸ್ಸೆಲ್ ಗ್ರೂಪ್‌ನ ಸುಭಾಷ್ ಚಂದ್ರ ಅವರನ್ನು ಎಕ್ಸ್‌ಪ್ರೆಸ್ ತಂಡ ಭೇಟಿಯಾಗಲು ಯತ್ನಿಸಿದಾಗ ಅವರು ಝೀ ಸಂಸ್ಥೆಯಲ್ಲಿ ಕಾರ್ಯಕಾರೇತರ ಮುಖ್ಯಸ್ಥರ ಸ್ಥಾನವನ್ನು ಹೊರತುಪಡಿಸಿ ಇತರ ಯಾವುದೇ ಸ್ಥಾನವನ್ನು ಹೊಂದಿಲ್ಲ ಎಂದು ಅವರ ಕಚೇರಿಯಿಂದ ತಿಳಿದುಬಂದಿದೆ.

ಈ ಸಂಸ್ಥೆಯ ಎಲ್ಲಾ ಚಟುವಟಿಕೆಗಳು ಭಾರತ ಸೆರಿದಂತೆ ಎಲ್ಲಾ ಕಾನೂನು ಪರಿಧಿಯೊಳಗೇ ನಡೆದಿರುವುದಾಗಿ ಸಂಸ್ಥೆ ತಿಳಿಸಿದೆ.