ದೇಶಕ್ಕೆ ಅಚ್ಛೇ ದಿನದ ಬದಲು ಕರಾಳ ದಿನಗಳು: ಆಸ್ಕರ್

 ಉಡುಪಿ, ನ.8: ನೋಟು ನಿಷೇಧ ಹಾಗೂ ಜಿಎಸ್‌ಟಿ ಹೇರಿಕೆಯ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಜನರಿಗೆ ಅಚ್ಚೇ ದಿನದ ಬದಲು ಕರಾಳ ದಿನಗಳನ್ನು ಕಾಣುವಂತೆ ಮಾಡಿದ್ದಾರೆ ಎಂದು ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಹಾಗೂ ರಾಜ್ಯಸಭಾ ಸದಸ್ಯ ಆಸ್ಕರ್ ಫೆರ್ನಾಂಡೀಸ್ ಹೇಳಿದ್ದಾರೆ.

ಕಳೆದ ನ.8ರಂದು ರಾತ್ರಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಘೋಷಿಸಿದ ನೋಟ್ ನಿಷೇಧಕ್ಕೆ ಒಂದು ವರ್ಷ ಪೂರ್ಣಗೊಂಡ ಪ್ರಯುಕ್ತ ಉಡುಪಿ ಜಿಲ್ಲಾ ಕಾಂಗ್ರೆಸ್ ಸಮಿತಿ ಬ್ರಹ್ಮಗಿರಿಯಲ್ಲಿರುವ ಕಾಂಗ್ರೆಸ್ ಕಚೇರಿಯ ಎದುರು ಉಡುಪಿ ಜಿಲ್ಲಾ ಕಾಂಗ್ರೆಸ್ ಸಮಿತಿ ಹಮ್ಮಿಕೊಂಡ ‘ಕರಾಳ ದಿನ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತಿದ್ದರು.

ಬಿಜೆಪಿ ನೇತೃತ್ವದ ನರೇಂದ್ರ ಮೋದಿ ತನ್ನ ಮೂರೂವರೆ ವರ್ಷದ ಆಡಳಿತದಲ್ಲಿ ಜಾರಿಗೊಳಿಸಿದ ನೋಟ್ ನಿಷೇಧ, ಜಿಎಸ್‌ಟಿ ಹೇರಿಕೆ, ಅಡುಗೆ ಅನಿಲದ ಬೆಲೆಯ ಹಠಾತ್ ಹೇರಿಕೆಯಂಥ ಜನವಿರೋಧಿ ನಡೆಗಳಿಂದ ದೇಶದ ಜನರ ಅದರಲ್ಲೂ ಮುಖ್ಯವಾಗಿ ಬಡವರು ಮತ್ತು ಹಿಂದುಳಿದವರ ಬದುಕು ದುರ್ಬರಗೊಂಡಿದೆ ಎಂದರು.

ದೇಶದ ಜನರಿಗೆ ‘ಅಚ್ಛೆ ದಿನ್’ ತೋರಿಸುವ ಭ್ರಮೆಯನ್ನು ಹುಟ್ಟಿಸಿ ಅಧಿಕಾರಕ್ಕೆ ಬಂದ ಮೋದಿ ಅವರ ಜನವಿರೋಧಿ ನೀತಿಗಳಿಂದ ಜನರು ಈಗ ಸಂಪೂರ್ಣ ಭ್ರಮನಿರಸರಾಗಿದ್ದಾರೆ. ಜನರ ಮುಂದೆ ಈಗ ಇರುವುದು ಕರಾಳ ದಿನಗಳು ಮಾತ್ರ. ಇದರ ಪರಿಣಾಮ ಈಗ ಚುನಾವಣೆ ನಡೆಯುವ ಗುಜರಾತ್‌ನಲ್ಲಿ ಸ್ಪಷ್ಟವಾಗಿ ಕಾಣಿಸುತ್ತಿದೆ ಎಂದು ಆಸ್ಕರ್ ನುಡಿದರು.

ನೋಟ್ ಬ್ಯಾನ್ ವಿಷಯದಲ್ಲಿ ಲೋಕಸಭೆಯಲ್ಲಿ ನಡೆದ ಚರ್ಚೆಯ ವೇಳೆ ಮಾಜಿ ಪ್ರಧಾನಿ, ದೇಶದ ಅಗ್ರಗಣ್ಯ ಆರ್ಥಿಕ ತಜ್ಞ ಡಾ.ಮನಮೋಹನ್ ಸಿಂಗ್ ಅವರು, ಭವಿಷ್ಯದಲ್ಲಿ ಇದರ ಪರಿಣಾಮಗಳ ಕುರಿತು ಸ್ಪಷ್ಟವಾದ ಚಿತ್ರಣ ತೆರೆದಿಟ್ಟಾಗ, ಮೋದಿ ಅವರು ಅಲ್ಲಿ ವ್ಯಂಗ್ಯದ ಬಾಣ ಬಿಟ್ಟಿದ್ದರು. ಆದರೆ ಒಂದು ವರ್ಷದ ನಂತರ ಡಾ.ಸಿಂಗ್ ಹೇಳಿದ ಮಾತು ಅಕ್ಷರಶ: ನಿಜವಾಗಿದೆ. ದೇಶದ ಜಿಡಿಪಿ ಶೇ.2ರಷ್ಟು ಪಾತಾಳಕ್ಕಿಳಿದಿದೆ ಎಂದು ಆಸ್ಕರ್ ಫೆರ್ನಾಂಡೀಸ್ ನುಡಿದರು.

ಅಧಿಕಾರಕ್ಕೇರುವ ಸಮಯದಲ್ಲಿ ದೇಶದಲ್ಲಿ ಪ್ರತಿವರ್ಷ ಎರಡು ಕೋಟಿ ಮಂದಿಗೆ ಉದ್ಯೋಗ ನೀಡುವ ಭರವಸೆ ನೀಡಿದ್ದ ಮೋದಿ, ಈ ಅವಧಿಯಲ್ಲಿ ಒಟ್ಟು ಏಳು ಕೋಟಿ ಭಾರತೀಯರಿಗೆ ಉದ್ಯೋಗ ನೀಡಬೇಕಿತ್ತು. ಆದರೆ ಆಗಿದ್ದು ಸಂಪೂರ್ಣ ವ್ಯತಿರಿಕ್ತ, ನೋಟ್ ಬ್ಯಾನ್‌ನಿಂದ ಎರಡು ಕೋಟಿ ಯುವಕರು ಕೆಲಸ ಕಳೆದುಕೊಳ್ಳುವಂತಾಯಿತು ಎಂದರು.

ವಿಶ್ವದಲ್ಲಿ ಭಾರತದ ಬಡತನ ಪ್ರಮಾಣ ಏರುತ್ತಿರುವ ಬಗ್ಗೆ ಅಂತಾರಾಷ್ಟ್ರೀಯ ಸಂಸ್ಥೆಗಳು ಅಂಕಿಅಂಶ ಸಮೇತ ಹೇಳುತಿದ್ದರೂ, ಮೋದಿ ಸರಕಾರ ಅದನ್ನು ಜನರಿಂದ ಮುಚ್ಚಿಟ್ಟಿದೆ. ಈ ವರದಿಗಳಂತೆ ಭಾರತ ಬಡತನದ ಪಟ್ಟಿಯಲ್ಲಿ ಹಿಂದಿದ್ದ 67ನೇ ಸ್ಥಾನದಿಂದ 100ನೇ ಸ್ಥಾನದಷ್ಟು ಇಳಿದಿದೆ ಎಂದು ಆಸ್ಕರ್ ಹೇಳಿದರು.

ಶೀಘ್ರವೇ ಚುನಾವಣೆ ನಡೆಯುವ ಗುಜರಾತ್‌ನಲ್ಲಿ ಸಂಪೂರ್ಣ ಜವುಳಿ ಉದ್ಯಮ ಇಂದು ಮುಷ್ಕರದಲ್ಲಿ ನಿರತವಾಗಿದೆ. ಹೀಗಾಗಿ ಪ್ರಧಾನಿಯವರ ಚುನಾವಣಾ ಭಾಷಣಕ್ಕೆ ಜನ ಸೇರದೇ, ರಾಹುಲ್ ಗಾಂಧಿಯವರ ಪ್ರಚಾರ ಭಾಷಣಕ್ಕೆ ಭಾರೀ ಸಂಖ್ಯೆಯಲ್ಲಿ ಜನಸೇರುತಿದ್ದಾರೆ ಎಂದರು.

ಪ್ರತಿಭಟನಾ ಸಭೆಯಲ್ಲಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಜನಾರ್ದನ ತೋನ್ಸೆ, ನಿತ್ಯಾನಂದ ಶೆಟ್ಟಿ, ಎಂ.ಎ.ಗಫೂರ್, ಜನಾರ್ದನ ಭಂಡಾರ್‌ಕರ್, ರಮೇಶ್ ಕಾಂಚನ್,ಮೀನಾಕ್ಷಿ ಮಾಧವ ಬನ್ನಂಜೆ, ಗಣೇಶ್ ನೇರ್ಗಿ, ಅಬ್ದುಲ್ ಅಜೀಜ್, ಹರೀಶ್ ಕಿಣಿ ಮುಂತಾದವರು ಭಾಗವಹಿಸಿದ್ದರು.

ಕರಾಳ ದಿನಾಚರಣೆಗೆ ಟಿಪ್ಪು ಜಯಂತಿ ಅಡ್ಡಿ
ಕೇಂದ್ರ ಸರಕಾರದ ನೋಟ್ ನಿಷೇಧಕ್ಕೆ ಒಂದು ವರ್ಷ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ಪಕ್ಷ ಹಮ್ಮಿಕೊಂಡ ಕರಾಳ ದಿನಾಚರಣೆ ಟಿಪ್ಪು ಜಯಂತಿ ಅಡ್ಡಿಯಾಗಿ ಪರಿಣಮಿಸಿದೆ.
ಟಿಪ್ಪು ಜಯಂತಿಗೆ ಬಿಜೆಪಿ ಹಾಗೂ ಸಂಘ ಪರಿವಾರದ ವಿವಿಧ ಸಂಘಟನೆ ಗಳು ತೀವ್ರ ವಿರೋಧ ವ್ಯಕ್ತಪಡಿಸುತ್ತಿರುವ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿಗಳು ಇಂದಿನಿಂದ ನ.11ರವರೆಗೆ ನಿಷೇಧಾಜ್ಞೆ ವಿಧಿಸಿರುವ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ನ ಇಂದಿನ ಪ್ರತಿಭಟನೆ ಕಾಂಗ್ರೆಸ್ ಪಕ್ಷದ ಕಚೇರಿಗೆ ಸೀಮಿತವಾಗಿ ಉಳಿಯಿತು.
ಜಿಲ್ಲೆಯಾದ್ಯಂತ ನಿಷೇಧಾಜ್ಞೆ ಜಾರಿಯಾದ ಕಾರಣ ಕಾಂಗ್ರೆಸ್ ನಾಯಕರು ಬೀದಿಗಿಳಿಯದೇ, ಪಕ್ಷದ ಕಚೇರಿಯಲ್ಲಿ ನೆರೆದ ಪತ್ರಕರ್ತರೆದುರು ಭಾಷಣ ಮಾಡಿ, ಧಿಕ್ಕಾರದ ಕೂಗಿ ದರು.

ಕಾರ್ಕಳ: ಕಾಂಗ್ರೆಸ್ ನಾಯಕರ ಬಂಧನ
ಕಾರ್ಕಳದಲ್ಲಿ ನಿಷೇಧಾಜ್ಞೆಯನ್ನು ಉಲ್ಲಂಘಿಸಿ ಬಸ್‌ನಿಲ್ದಾಣದ ಬಳಿ ಬಹಿರಂಗ ಸಭೆ ಹಾಗೂ ಪ್ರತಿಭಟನೆ ನಡೆಸಲು ಪ್ರಯತ್ನಿಸಿದ ಬ್ಲಾಕ್ ಕಾಂಗ್ರೆಸ್ ನಾಯಕರು ಹಾಗೂ ಕಾರ್ಯಕರ್ತರನ್ನು  ಬಂಧಿಸಿದ್ದು, ನಂತರ ಬಿಡುಗಡೆಗೊಳಿಸಿದರು.