ನ್ಯಾಯಾಲಯ ಕಲಾಪಗಳ ಆಡಿಯೊ,ವೀಡಿಯೊ ರೆಕಾರ್ಡಿಂಗ್: ಸರ್ವೋಚ್ಚ ನ್ಯಾಯಾಲಯದ ಒಪ್ಪಿಗೆ
ಹೊಸದಿಲ್ಲಿ,ನ.21: ನ್ಯಾಯಾಲಯಗಳಲ್ಲಿ ನ್ಯಾಯಾಧೀಶರಿಗೆ ಖಾಸಗಿತನ ಅಗತ್ಯವಿಲ್ಲ ಎಂದು ಮಂಗಳವಾರ ಸ್ಪಷ್ಟಪಡಿಸಿದ ಸರ್ವೋಚ್ಚ ನ್ಯಾಯಾಲಯದ ನ್ಯಾಯಾಧೀಶ ನ್ಯಾ.ಎ.ಕೆ.ಗೋಯೆಲ್ ಅವರು, ನ್ಯಾಯಾಲಯ ಕಲಾಪಗಳ ಆಡಿಯೊ ಮತ್ತು ವೀಡಿಯೊ ರೆಕಾರ್ಡಿಂಗ್ಗೆ ಹಸಿರು ನಿಶಾನೆಯನ್ನು ತೋರಿಸಿದರು.
ಶಾಸನ ಸಭೆಗಳಲ್ಲಿ ಕಲಾಪಗಳ ಆಡಿಯೊ ಮತ್ತು ವೀಡಿಯೊ ರೆಕಾರ್ಡಿಂಗ್ಗೆ ಅವಕಾಶವಿದೆಯಾದರೂ ನ್ಯಾಯಾಲಯ ಕಲಾಪಗಳನ್ನು ಸಂರಕ್ಷಿತ ವ್ಯವಹಾರವನ್ನಾಗಿ ನೋಡಲಾಗುತ್ತಿದೆ. ವಕೀಲರು ಮತ್ತು ನ್ಯಾಯಾಧೀಶರ ನಡುವಿನ ಸಂವಾದಗಳು, ವಕೀಲರ ಹೇಳಿಕೆಗಳು ಮತ್ತು ಪೀಠವು ಕೇಳುವ ಪ್ರಶ್ನೆಗಳ ಆಡಿಯೊ ಮತ್ತು ವೀಡಿಯೊ ರೆಕಾರ್ಡಿಂಗ್ಗೆ ಅವಕಾಶವಿಲ್ಲ.
ಕಳೆದ ಆಗಸ್ಟ್ನಲ್ಲಿ ನ್ಯಾಯಾಲಯಗಳ ಖಾಸಗಿತನದಲ್ಲಿ ಸಂಪೂರ್ಣ ಬದಲಾವಣೆಯನ್ನು ತರುವ ಸುಳಿವನ್ನು ನೀಡಿದ್ದ ನ್ಯಾಯಮೂರ್ತಿಗಳಾದ ಗೋಯೆಲ್ ಮತ್ತು ಯು.ಯು.ಲಲಿತ್ ಅವರ ಪೀಠವು ಸಾಂವಿಧಾನಿಕ ನ್ಯಾಯಾಲಯಗಳಾದ ಸರ್ವೋಚ್ಚ ಮತ್ತು ಉಚ್ಚ ನ್ಯಾಯಾಲಯಗಳ ಕಲಾಪಗಳ ಆಡಿಯೊ ಮತ್ತು ವೀಡಿಯೊ ರೆಕಾರ್ಡಿಂಗ್ನ ಸಾಧ್ಯತೆಗಳ ಕುರಿತು ಚಿಂತನೆಗೆ ಚಾಲನೆ ನೀಡಿತ್ತು.
ಇದಕ್ಕೂ ಮುನ್ನ ಮಾರ್ಚ್ನಲ್ಲಿ ಇದೇ ಪೀಠವು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಕನಿಷ್ಠ ಎರಡು ಜಿಲ್ಲೆಗಳಲ್ಲಿಯ ನ್ಯಾಯಾಲಯ ಸಂಕೀರ್ಣಗಳಲ್ಲಿ ವಿಚಾರಣಾ ಕೊಠಡಿಗಳು ಮತ್ತು ಆಯಕಟ್ಟಿನ ಸ್ಥಳಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸುವಂತೆ ಆದೇಶಿಸಿತ್ತು.
ಇಂತಹ ರೆಕಾರ್ಡಿಂಗ್ಗಳು ಕಾರ್ಯನಿರತ ನ್ಯಾಯಾಧೀಶರ ಖಾಸಗಿತನದಲ್ಲಿ ಹಸ್ತಕ್ಷೇಪ ಮಾಡುತ್ತವೆ ಎಂಬ ಆತಂಕವನ್ನು ತಳ್ಳಿಹಾಕಿದ ನ್ಯಾ.ಗೋಯೆಲ್ ಅವರು, ನ್ಯಾಯಾಲಯದಲ್ಲಿ ಖಾಸಗಿತನ ಎನ್ನುವುದು ಇಲ್ಲ. ನಾವಿಲ್ಲಿ ಎಲ್ಲರಿಗಾಗಿ ಕುಳಿತುಕೊಂಡಿದ್ದೇವೆ ಎಂದು ಹೇಳಿದರು.
ಸರಕಾರದ ಪರವಾಗಿ ಹಾಜರಾಗಿದ್ದ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಪಿಂಕಿ ಆನಂದ್ ಅವರು, ಸರಕಾರವು ಎಲ್ಲ ಕ್ರಮಗಳನ್ನು ತೆಗೆದುಕೊಂಡಿದೆ ಮತ್ತು ಯೋಜನಾ ವೆಚ್ಚದ ರೂಪುರೇಷೆಯನ್ನು ಸಿದ್ಧಗೊಳಿಸಲಾಗುತ್ತಿದೆ ಎಂದು ತಿಳಿಸಿದರು.
ಸರಕಾರವು ಈ ವಿಷಯವನ್ನು ವಿಳಂಬಿಸಕೂಡದು ಎಂದು ಹೇಳಿದ ನ್ಯಾ.ಗೋಯೆಲ್ ಅವರು, ಈವರೆಗಿನ ಪ್ರಗತಿಯ ವರದಿಯೊಂದನ್ನು ಎರಡು ದಿನಗಳಲ್ಲಿ ನ್ಯಾಯಾಲಯಕ್ಕೆ ಸಲ್ಲಿಸುವಂತೆ ಆನಂದ್ ಅವರಿಗೆ ಸೂಚಿಸಿದರು.
ನ್ಯಾಯಾಲಯ ಕಲಾಪಗಳ ರೆಕಾರ್ಡಿಂಗ್ನ್ನು ಕಲಾಪಗಳ ಖಾಸಗಿತನದ ಉಲ್ಲಂಘನೆ ಯೆಂದು ಪರಿಗಣಿಸದ ಇತರ ದೇಶಗಳಲ್ಲಿಯ ನ್ಯಾಯಾಧೀಶರಿಗಿಂತ ಭಾರತೀಯ ನ್ಯಾಯಾಂಗವು ಭಿನ್ನವೆಂದೇಕೆ ಪರಿಗಣಿಸಬೇಕು ಎಂದು ಪ್ರಶ್ನಿಸಿದ್ದ ಪೀಠವು, ನ್ಯಾಯಾಧಿಕರಣಗಳ ಕಲಾಪಗಳನ್ನೂ ರೆಕಾರ್ಡಿಂಗ್ ಮಾಡುವ ಸಾಧ್ಯತೆಯನ್ನು ಪ್ರಸ್ತಾಪಿಸಿತ್ತು.
ನ್ಯಾಯಸಮ್ಮತ ವಿಚಾರಣೆಯನ್ನು ಖಚಿತಪಡಿಸಲು ಕ್ರಿಮಿನಲ್ ನ್ಯಾಯಾಲಯಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳ ಸ್ಥಾಪನೆಯನ್ನು ಕೋರಿ ಪ್ರದ್ಯುಮ್ನ ಬಿಷ್ಟ್ ಅವರು ಸಲ್ಲಿಸಿರುವ ಅರ್ಜಿಯ ವ್ಯಾಪ್ತಿಯನ್ನು ಸರ್ವೋಚ್ಚ ನ್ಯಾಯಾಲಯವು ವಿಸ್ತರಿಸಿದೆ.
