30 ವರ್ಷ ಕೆಳಗಿನ ಫೋರ್ಬ್ಸ್ ಸಾಧಕರ ಪಟ್ಟಿಯಲ್ಲಿ ದಿಲ್ಲಿಯ ಯುವಕ

  ಹೊಸದಿಲ್ಲಿ, ನ.22: ವಿಶ್ವದಾದ್ಯಂತದ ಯುವ ಉದ್ಯಮಿಗಳು, ಸಂಶೋಧಕರು ಹಾಗೂ ಕ್ರಾಂತಿಕಾರಿ ಶೋಧಕರನ್ನು ಗುರುತಿಸುವ ‘ಫೋರ್ಬ್ಸ್ 30ರ ಕೆಳಗಿನ’ ಪಟ್ಟಿಯಲ್ಲಿ ದಿಲ್ಲಿ ಮೂಲದ ತೀರ್ಥಕ್ ಸಹಾ ಎಂಬ 25ರ ಹರೆಯದ ಯುವಕ ಸ್ಥಾನಪಡೆದಿದ್ದಾರೆ.

ಈ ಪ್ರತಿಷ್ಠಿತ ಮನ್ನಣೆಗೆ ವಿಶ್ವದಾದ್ಯಂತ ಸುಮಾರು 15,000 ಯುವಜನತೆ ನಾಮನಿರ್ದೇಶನಗೊಂಡಿದ್ದು ಇವರಲ್ಲಿ ಆಯ್ದ 600 ಮಂದಿಯಲ್ಲಿ ಸಹಾರನ್ನು ಆಯ್ಕೆಮಾಡಲಾಗಿದೆ.

600 ಪ್ರವೇಶಪತ್ರಗಳಲ್ಲಿ ಸಹಾ ಅವರ ಯೋಜನೆ ದ್ವಿತೀಯ ಸ್ಥಾನ ಪಡೆದಿದೆ. ಸಹಾ ಪ್ರಸ್ತುತಪಡಿಸಿದ ವಿಶ್ವಸನೀಯ ವಿದ್ಯುಚ್ಛಕ್ತಿ ಸರಬರಾಜು ಯೋಜನೆಯನ್ನು ತನ್ನ ಜಾಲತಾಣದಲ್ಲಿ ಬಳಸಿಕೊಳ್ಳುವುದಾಗಿ ಸಹಾ ಉದ್ಯೋಗಿಯಾಗಿರುವ ‘ಎಇಪಿ’ ಸಂಸ್ಥೆ ತಿಳಿಸಿದೆ.

 ‘ವಿದ್ಯುಚ್ಛಕ್ತಿ’ ವಿಭಾಗದಲ್ಲಿ ಸಹಾ ಆಯ್ಕೆಗೊಂಡಿದ್ದು ವಿದ್ಯುಚ್ಛಕ್ತಿ ಉತ್ಪಾದನೆ ಮತ್ತು ವಿತರಣೆ ಕುರಿತ ಸಂಶೋಧನಾ ಕಾರ್ಯಕ್ಕೆ ಫೋರ್ಬ್ಸ್‌ನ ಮನ್ನಣೆ ದೊರಕಿದೆ. ವ್ಯಕ್ತಿಯ ವೃತ್ತಿಜೀವನದ ಸಾಧನೆಯನ್ನು ಪರಿಗಣಿಸಿ ನೀಡುವ ಈ ಮಾನ್ಯತೆ ಜೀವಮಾನದ ಸಾಧನೆ, (ಆದರೆ 30ರ ಕೆಳಹರೆಯದಲ್ಲಿ ) ಪ್ರಶಸ್ತಿಗೆ ಸಮಾನವಾಗಿದೆ . ಇದೊಂದು ಅದ್ಭುತ ಗೌರವವಾಗಿದೆ ಎಂದು ಸಹಾ ಪ್ರತಿಕ್ರಿಯಿಸಿದ್ದಾರೆ.

   ದಿಲ್ಲಿಯ ದ್ವಾರಕ ನಗರದಲ್ಲಿ ಜನಿಸಿದ್ದ ತೀರ್ಥಕ್ ಸಹಾ ದಿಲ್ಲಿಯ ಸೈಂಟ್ ಕೊಲಂಬಿಯಾ ಶಾಲೆ ಮತ್ತು ಮಣಿಪಾಲದಲ್ಲಿ ಶಿಕ್ಷಣ ಪಡೆದ ಬಳಿಕ 2013ರಲ್ಲಿ ಅಮೆರಿಕಕ್ಕೆ ತೆರಳಿದ್ದರು.ಇದೀಗ ಅಮೆರಿಕದ ಇಂಡಿಯಾನದಲ್ಲಿ ವಾಸಿಸುತ್ತಿರುವ ಸಹಾ, ಅಮೆರಿಕದ 11 ರಾಜ್ಯಗಳ ಸುಮಾರು 5.4 ಮಿಲಿಯ ಜನರಿಗೆ ವಿದ್ಯುಚ್ಛಕ್ತಿ ಸರಬರಾಜು ಮಾಡುತ್ತಿರುವ ಅಮೆರಿಕನ್ ಇಲೆಕ್ಟ್ರಿಕ್ ಪವರ್ (ಎಇಪಿ)ನಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

 ಅಮೆರಿಕದಲ್ಲಿರುವ ವಿದ್ಯುತ್ ಸ್ಥಾವರಗಳು ಸುಮಾರು ಶತಮಾನದಷ್ಟು ಹಳೆಯದಾಗಿದ್ದು ನವೀನ ಬದಲಾವಣೆ ನಡೆದಿಲ್ಲ. ಈ ನಿಟ್ಟಿನಲ್ಲಿ ಸ್ಮಾರ್ಟ್ ಗ್ರಿಡ್ ತಂತ್ರಜ್ಞಾನ ಬಳಸಿ ಎಇಪಿಯ ವಿದ್ಯುತ್ ಸ್ಥಾವರಗಳನ್ನು ಸುರಕ್ಷಿತ ಹಾಗೂ ಹೆಚ್ಚು ವಿಶ್ವಸನೀಯಗೊಳಿಸಬಹುದು ಎಂದು ಸಹಾ ತಮ್ಮ ಯೋಜನೆಯಲ್ಲಿ ತಿಳಿಸಿದ್ದಾರೆ.

    ಸಹಾಗೆ ದಿಲ್ಲಿ ವಿವಿಯಲ್ಲಿ ಖಗೋಳಭೌತಶಾಸ್ತ್ರ ಅಧ್ಯಯನ ಮಾಡುವ ಆಸಕ್ತಿಯಿತ್ತು. ಆದರೆ ಈ ಪದವಿಗೆ ಪ್ರವೇಶ ಪಡೆಯಲು ಅಗತ್ಯವಿದ್ದ ಅಂಕ ಹೊಂದಿರದ ಕಾರಣ ಮಣಿಪಾಲ್ ವಿವಿಯಲ್ಲಿ ಇಲೆಕ್ಟ್ರಿಕಲ್ ಇಂಜಿನಿಯರಿಂಗ್‌ಗೆ ಸೇರ್ಪಡೆಗೊಂಡರು ಎಂದು ಅವರ ತಾಯಿ ತಿಳಿಸಿದ್ದಾರೆ. ಬಳಿಕ ಸ್ಕಾಲರ್‌ಷಿಪ್ ಪಡೆದು ಫಿಲಡೆಲ್ಫಿಯಾದ ವಿವಿಯಲ್ಲಿ ವಿಜ್ಞಾನದಲ್ಲಿ ಪದವಿ ಪಡೆದರು. ಈ ಸಂದರ್ಭ ನಡೆದ ಕ್ಯಾಂಪಸ್ ಸಂದರ್ಶನದಲ್ಲಿ ಎಇಪಿ ಅವರನ್ನು ಆಯ್ಕೆ ಮಾಡಿಕೊಂಡಿತು.