ಮಣಿಪಾಲ ಕೆಎಂಸಿಯಲ್ಲಿ ಅಪರೂಪದ ಮುಖದ ಶಸ್ತ್ರಚಿಕಿತ್ಸೆ

ಮಣಿಪಾಲ, ನ.30: ಮಣಿಪಾಲ ದಂತ ವೈದ್ಯಕೀಯ ಮಹಾವಿದ್ಯಾಲಯದ ಓರಲ್ ಆಂಡ್ ಮ್ಯಾಕ್ಸಿಲೊಫೇಷಿಯಲ್ ವಿಭಾಗದ ವೈದ್ಯರ ತಂಡ ಮಣಿಪಾಲ ಕೆಎಂಸಿ ಆಸ್ಪತ್ರೆಯಲ್ಲಿ ಇಬ್ಬರು ರೋಗಿಗಳಿಗೆ ಅಪರೂಪದ ಮುಖದ ಶಸ್ತ್ರಚಿಕಿತ್ಸೆಯನ್ನು ನೆರವೇರಿಸಿದ್ದು, ಈ ಮೂಲಕ ಅವರ ಬದುಕಿನಲ್ಲಿ ಪರಿವರ್ತನೆ ಮೂಡಿಸಿದ್ದಾರೆ.

ಮಣಿಪಾಲದ ದಂತ ವೈದ್ಯಕೀಯ ಕಾಲೇಜಿನ ಓರಲ್ ಆಂಡ್ ಮ್ಯಾಕ್ಸಿಲೊಫೇಶಿಯಲ್ ಸರ್ಜರಿ ವಿಭಾಗದ ಪ್ರಾಧ್ಯಾಪಕ ಮತ್ತು ಮುಖ್ಯಸ್ಥ ಡಾ.ಅಭಯ್ ತಾರಾನಾಥ್ ಕಾಮತ್ ಕೆನಡಾದ ಟೊರೊಂಟೊದ ಡಾ. ಡೇವಿಡ್ ಪ್ಸುಟ್ಕಾರ ಮಾರ್ಗದರ್ಶನದಲ್ಲಿ ಈ ಇಬ್ಬರು ರೋಗಿಗಳಿಗೆ ಶಸ್ತ್ರಚಿಕಿತ್ಸೆಯನ್ನು ನೆರವೇರಿಸಿದ್ದು, ಇವರಿಗೆ ಡಾ.ಆದರ್ಶ್, ಡಾ.ಶ್ರೀಕಾಂತ್, ಡಾ.ಚಿತ್ರಾ, ಡಾ.ಸುನಿಲ್ ಮತ್ತು ಡಾ.ಆನಂದ ಸಹಾಯಕರಾಗಿದ್ದರು.

ಇಂದು ಉಡುಪಿಯಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ಡಾ.ಅಭಯ್ ಕಾಮತ್ ಈ ಕುರಿತು ಮಾಹಿತಿ ನೀಡಿದರು. ಕರ್ನಾಟಕ ರಾಜ್ಯದ 21ವರ್ಷ ವಯಸ್ಸಿನ ಅಮನ್(ಹೆಸರು ಬದಲಿಸಲಾಗಿದೆ) ಎಂಬಾತನಿಗೆ ಹುಟ್ಟಿನಿಂದಲೇ ಬಾಯಿಯನ್ನು ತೆರೆಯಲು ಸಾಧ್ಯವಾಗುತ್ತಿರಲಿಲ್ಲ. ಇದರಿಂದ ಇತರರೊಂದಿಗೆ ಮಾತನಾಡಲು ಮತ್ತು ಬೆರೆಯಲು ಸಂಕೋಚ ಪಡುತ್ತಿದ್ದನು. ಆಹಾರವನ್ನು ಅಗಿಯಲು ಸಾಧ್ಯವಾಗುತ್ತಿರಲಿಲ್ಲ. ಇದರ ಜೊತೆಗೆ ನಿದ್ದೆಯ ವೇಳೆ ಉಸಿರಾಟ ನಿಲ್ಲುವ ತೊಂದರೆಯನ್ನು ಆತ ಅನುಭವಿಸುತ್ತಿದ್ದನು.

ಈ ಬಗ್ಗೆ ಆತನನ್ನು ಪರೀಕ್ಷಿಸಿದ ಮಣಿಪಾಲದ ದಂತ ವೈದ್ಯಕೀಯ ಕಾಲೇಜಿನ ಓರಲ್ ಆಂಡ್ ಮ್ಯಾಕ್ಸಿಲೊಫೇಶಿಯಲ್ ಸರ್ಜರಿ ವಿಭಾಗದ ಪ್ರಾಧ್ಯಾಪಕ ಮತ್ತು ಮುಖ್ಯಸ್ಥ ಡಾ.ಅಭಯ್ ತಾರಾನಾಥ್ ಕಾಮತ್, ಆತನ ಕೆಳದವಡೆ ಮೇಲೆ ಟೋಟಲ್ ಟೆಂಪೊರೊಮ್ಯಾಂಡಿ ಬ್ಯುಲಾರ್‌ಜಾಯಿಂಟ್ ರಿಪ್ಲೇಸ್ಮೆಂಟ್ ಶಸ್ತ್ರಚಿಕಿತ್ಸೆ ನಡೆಸುವ ಯೋಜನೆಯನ್ನು ಸಿದ್ಧಪಡಿಸಿದರು.

ಮೊದಲ ಹಂತದಲ್ಲಿ ನಿದ್ದೆಯಲ್ಲಿ ಉಸಿರಾಟ ಸ್ಥಗಿತಗೊಳ್ಳುವ ಸಮಸ್ಯೆಯನ್ನು ಸರಿಪಡಿಸಲು ಆತನ ಸಣ್ಣ ದವಡೆ ಹಾಗೂ ಸಣ್ಣ ಗದ್ದಕ್ಕಾಗಿ ಡಿಸ್ಟ್ರ್ಯಾಕ್ಷನ್ ಆಸ್ಟಿಯೊಜೆನೆಸಿಸ್ ಶಸ್ತ್ರಕ್ರಿಯೆಯನ್ನು ಮತ್ತು ಎರಡನೇ ಹಂತದಲ್ಲಿ ಬಾಯಿಯನ್ನು ಸರಿಯಾದ ಸ್ಥಳದಲ್ಲಿ ತೆರೆಯಲು ಮತ್ತು ಆಕರ್ಷಕವಾದ ಮುಖ ಚಹರೆಯನ್ನು ನೀಡುವುದಕ್ಕಾಗಿ ಒಂದಕ್ಕೊಂದು ಅಂಟಿಕೊಂಡ ಕೀಲುಗಳನ್ನು ಪ್ರತ್ಯೇಕಿಸುವ ಮತ್ತು ದವಡೆಯ ಬದಲಿ ಜೋಡಣೆಯ ಶಸ್ತ್ರಚಿಕಿತ್ಸೆಯನ್ನು ನಡೆಸಿ ಯಶಸ್ವಿಯಾದರು.

20 ವರ್ಷ ಪ್ರಾಯದ ರವಿ(ಹೆಸರು ಬದಲಿಸಲಾಗಿದೆ) ಎಂಬಾತ ಸುಮಾರು ಮೂರು ವರ್ಷಗಳ ಹಿಂದೆ ತನ್ನ ಬಲಭಾಗದ ಕೆಳದವಡೆಯಲ್ಲಿನ ಗೆಡ್ಡೆಯನ್ನು ತೆಗೆಸುವುದಕ್ಕಾಗಿ ಕೆಎಂಸಿಯಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿ ಮುಖದ ಒಂದು ಪ್ರಮುಖ ಭಾಗವನ್ನು ಕಳೆದುಕೊಂಡು ಮಾನಸಿಕವಾಗಿ ನರಳುತ್ತಿದ್ದನು. ಆತನ ಪೋಷಕರು ಡಾ.ಅಭಯ್ ಕಾಮತರೊಂದಿಗೆ ಸಮಾಲೋಚನೆ ನಡೆಸಿದರು. ಅವರು ಆತನಿಗೆ ಟೈಟಾನಿಯಂ ನಿರ್ಮಿತ ಇಂಪ್ಲಾಂಟ್ ನ್ನು ಕೆಳ ದವಡೆಯ ಜಾಗದಲ್ಲಿ ಕೂರಿಸುವ ಸಲಹೆ ನೀಡಿದರು. ಬಯೋಮೆಟ್ ಕಸ್ಟಮ್ ಮೇಡ್ ಕೀಲು ಬಳಸಿ ರೋಗಿಗೆ ಹೊಂದುವಂಥ ಇಂಪ್ಲಾಂಟ್ ಅಳವಡಿಸಲಾಯಿತು.

ಈ ಎರಡೂ ಪ್ರಕರಣಗಳು ಭಾರತದಲ್ಲಿ ವರದಿಯಾಗಿರುವುದು ಇದೇ ಮೊದಲು. ಶಸ್ತ್ರಚಿಕಿತ್ಸೆಯ ಸಂದರ್ಭದಲ್ಲಿ ಯಾವುದೇ ತೊಡಕುಗಳು ಕಂಡು ಬರಲಿಲ್ಲ. ಇದೀಗ ರೋಗಿಗಳಿಗೆ ಸರಿಯಾಗಿ ಆಹಾರ ಸೇವಿಸಲು ಮತ್ತು ಬಾಯಿ ತೆರೆಯಲು ಸಾಧ್ಯವಾಗಿದೆ. ಶಸ್ತ್ರಚಿಕಿತ್ಸೆಯ ಬಳಿಕ ಎರಡೂ ರೋಗಿಗಳ ಆತ್ಮವಿಶ್ವಾಸ ಹೆಚ್ಚಿದೆ. ಮುಖದಲ್ಲಿ ಬದಲಾವಣೆ ಮಾತ್ರವಲ್ಲದೆ ಅವರ ಬದುಕಿನಲ್ಲೂ ಬದಲಾವಣೆಯಾಗಿದೆ ಎಂದು ಮಣಿಪಾಲದ ದಂತ ವೈದ್ಯಕೀಯ ಕಾಲೇಜಿನ ಡೀನ್ ಡಾ.ಕೀರ್ತಿಲತಾ ಎಂ. ಪೈ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಕೆಎಂಸಿ ಮಾರ್ಕೆಟಿಂಗ್ ವಿಭಾಗದ ಸಹಾಯಕ ಮಹಾ ಪ್ರಬಂಧಕ ಅನಿಲ್ ಜಾಕೋಬ್ ಉಪಸ್ಥಿತರಿದ್ದರು.