ದೇಶ ಧಾರ್ಮಿಕ ಅಂಶಗಳಿಂದ ವಿಭಜನೆಯಾಗಬಾರದೆಂದು ಮೋದಿಯವರಿಗೆ ತಿಳಿಸಿದ್ದೇನೆ: ಒಬಾಮಾ

ಹೊಸದಿಲ್ಲಿ,ಡಿ.1: ದೇಶವೊಂದು ಧಾರ್ಮಿಕ ಅಂಶಗಳಿಂದಾಗಿ ವಿಭಜನೆಗೊಳ್ಳಬಾರದು ಎಂದು ತಾನು ಪ್ರಧಾನಿ ನರೇಂದ್ರ ಮೋದಿಯವರಿಗೆ ಖಾಸಗಿಯಾಗಿ ತಿಳಿಸಿದ್ದೇನೆ ಎಂದು ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಅವರು ಶುಕ್ರವಾರ ಇಲ್ಲಿ ಹೇಳಿದರು. ಈ ದೇಶದ ಮುಸ್ಲಿಮರು ತಮ್ಮನ್ನು ಭಾರತೀಯರೆಂದು ಗುರುತಿಸಿಕೊಳ್ಳುತ್ತಿದ್ದು, ಇತರ ಹೆಚ್ಚಿನ ರಾಷ್ಟ್ರಗಳಲ್ಲಿನ ಅಲ್ಪಸಂಖ್ಯಾತರಲ್ಲಿ ಈ ಭಾವನೆಗಳು ಅಷ್ಟಾಗಿ ಕಂಡು ಬರುತ್ತಿಲ್ಲ. ಇಲ್ಲಿಯ ಮುಸ್ಲಿಮರ ಮನೋಭಾವನೆಯನ್ನು ಭಾರತೀಯ ಸಮಾಜವು ಪೋಷಿಸುವ ಅಗತ್ಯವಿದೆ ಎಂದು ಅವರು ಒತ್ತಿ ಹೇಳಿದರು.

ಹಿಂದುಸ್ಥಾನ ಟೈಮ್ಸ್ ನಾಯಕೀಯ ಶೃಂಗದಲ್ಲಿ ಮಾತನಾಡಿದ ಒಬಾಮಾ, ಯಾವುದೇ ದೇಶವು ಧಾರ್ಮಿಕ ಕಾರಣಗಳಿಂದ ವಿಭಜನೆಗೊಳ್ಳಬಾರದು. ಇದನ್ನು ನಾನು ಮೋದಿಯವರಿಗೆ ಖಾಸಗಿಯಾಗಿ ಮತ್ತು ಅಮೆರಿಕದ ಜನತೆಗೂ ಹೇಳಿದ್ದೇನೆ. ಜನರು ಪರಸ್ಪರರ ನಡುವಿನ ಭಿನ್ನತೆಗಳನ್ನು ಅತ್ಯಂತ ಸ್ಫುಟವಾಗಿ ಗುರುತಿಸುತ್ತಾರೆ ಮತ್ತು ಸಮಾನತೆಯನ್ನು ಮರೆಯುತ್ತಾರೆ. ಜನಸಾಮಾನ್ಯರಲ್ಲಿಯ ಭಿನ್ನತೆ ಸದಾ ಲಿಂಗಾಧಾರಿತ ಮಾತ್ರವಾಗಿರಬೇಕು ಮತ್ತು ಈ ಬಗ್ಗೆ ನಾವು ಗಮನವನ್ನು ಕೇಂದ್ರೀಕರಿಸುವ ಅಗತ್ಯವಿದೆ ಎಂದರು.

ಧಾರ್ಮಿಕ ಸಹಿಷ್ಣುತೆಯ ಕುರಿತು ನಿಮ್ಮ ಖಾಸಗಿ ಸಂದೇಶಕ್ಕೆ ಮೋದಿಯವರ ಪ್ರತಿಕ್ರಿಯೆ ಏನಾಗಿತ್ತು ಎಂಬ ಪ್ರಶ್ನೆಗೆ ಒಬಾಮಾ, ತನ್ನ ಖಾಸಗಿ ಸಂಭಾಷಣೆಗಳನ್ನು ಬಹಿರಂಗಗೊಳಿಸುವುದು ತನ್ನ ಉದ್ದೇಶವಲ್ಲ ಎಂದು ಉತ್ತರಿಸಿದರು.

ಅಲ್ಪಸಂಖ್ಯಾತರು, ನಿರ್ದಿಷ್ಟವಾಗಿ ಮುಸ್ಲಿಮರು ತಮ್ಮನ್ನು ಈ ದೇಶದ ಭಾಗವಾಗಿ ಗುರುತಿಸಿಕೊಂಡಿದ್ದಾರೆಂಬ ಸತ್ಯವನ್ನು ಭಾರತದ ಬಹುಸಂಖ್ಯಾತ ಸಮುದಾಯ ಮತ್ತು ಸರಕಾರ ಮೆಚ್ಚಿಕೊಳ್ಳುವ ಮತ್ತು ಪೋಷಿಸುವ ಅಗತ್ಯವಿದೆ ಎಂದು ಅವರು ಹೇಳಿದರು.

 ಪ್ರಜಾಪ್ರಭುತ್ವದಲ್ಲಿ ಅತ್ಯಂತ ಮುಖ್ಯ ಹುದ್ದೆ ರಾಷ್ಟ್ರಾಧ್ಯಕ್ಷ ಅಥವಾ ಪ್ರಧಾನ ಮಂತ್ರಿಯದಲ್ಲ, ಅದು ಪ್ರಜೆಯದ್ದಾಗಿದೆ. ನಿರ್ದಿಷ್ಟ ರಾಜಕಾರಣಿಯನ್ನು ಬೆಂಬಲಿಸುವ ಜೊತೆಗೆ ತಾವು ಯಾವ ಸಿದ್ಧಾಂತವನ್ನು ಉತ್ತೇಜಿಸುತ್ತಿದ್ದೇವೆ ಎಂದು ಪ್ರಜೆಗಳು ತಮ್ಮನ್ನು ತಾವು ಪ್ರಶ್ನಿಸಿಕೊಳ್ಳುವ ಅಗತ್ಯವಿದೆ. ರಾಜಕಾರಣಿಯೋರ್ವ ಪ್ರಶ್ನಾರ್ಹವಾದ ಏನನ್ನಾದರೂ ಮಾಡುತ್ತಿದ್ದರೆ ಇದನ್ನು ನಾನು ಬೆಂಬಲಿಸುತ್ತಿದ್ದೇನೆಯೇ ಎಂದು ನಿಮ್ಮನ್ನು ನೀವೇ ಕೇಳಿಕೊಳ್ಳಿ. ರಾಜಕಾರಣಿಗಳು ಸಮುದಾಯದ ಅಭಿಪ್ರಾಯವನ್ನು ಪ್ರತಿಫಲಿಸುವ ಕನ್ನಡಿಯಿದ್ದಂತೆ. ದೇಶಾದ್ಯಂತದ ಸಮುದಾಯಗಳು ತಾವು ವಿಭಜನೆಯ ಸಂಚಿಗೆ ಬಲಿಪಶುಗಳಾಗುವುದಿಲ್ಲ ಎಂದು ಹೇಳಿದರೆ ಅದು ಅದೇ ರೀತಿ ಭಾವಿಸುವ ರಾಜಕಾರಣಿಗಳ ಕೈಗಳನ್ನು ಬಲಗೊಳಿಸುತ್ತದೆ ಎಂದು ಒಬಾಮಾ ನುಡಿದರು.