ಯುವಕರನ್ನು ದಾರಿ ತಪ್ಪಿಸುತ್ತಿರುವ ಸಾಮಾಜಿಕ ಜಾಲತಾಣಗಳು : ಶಾಸಕ ದತ್ತ

ಕಡೂರು, ಡಿ.9: ಯುವಕರಲ್ಲಿ ಉತ್ಸಾಹ ಕಡಿಮೆಯಾಗಿದೆ. ಅವರನ್ನು ಹುರಿದುಂಬಿಸುವ ಕೆಲಸ ಆಗಬೇಕಿದೆ. ಯುವಕರಲ್ಲಿ ಅಧ್ಯಯನಶೀಲತೆ ಬೇಕಿದೆ. ಯುವಕರನ್ನು ಸಾಮಾಜಿಕ ಜಾಲತಾಣಗಳು ದಾರಿ ತಪ್ಪಿಸುತ್ತಿವೆ ಎಂದು ಶಾಸಕ ವೈ.ಎಸ್.ವಿ. ದತ್ತ ವಿಷಾದ ವ್ಯಕ್ತಪಡಿಸಿದ್ದಾರೆ.

ಶನಿವಾರ ಸಖರಾಯಪಟ್ಟಣದಲ್ಲಿ ನಡೆಯುತ್ತಿರುವ 14ನೇ ಚಿಕ್ಕಮಗಳೂರು ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ 2ನೇ ದಿನದ ‘ವರ್ತಮಾನದ ತಲ್ಲಣಗಳು’ ಗೋಷ್ಠಿಯಲ್ಲಿ ಯುವಜನತೆ ಮತ್ತು ರಾಜಕಾರಣ ಎಂಬ ವಿಷಯದ ಕುರಿತು ಪ್ರಧಾನ ಉಪನ್ಯಾಸ ನೀಡಿ ಅವರು ಮಾತನಾಡಿದರು.

ತಲ್ಲಣ ಎಂದರೆ ದ್ವಂದ್ವ, ಆತಂಕ, ತೊಳಲಾಟವಾಗಿದೆ.10ನೇ ಸಮ್ಮೇಳನದಿಂದ ಇಂದಿನವರೆಗೆ ಸಾಹಿತ್ಯ ಪರಿಷತ್‌ನಲ್ಲಿ ತಲ್ಲಣವನ್ನು ಕಂಡು ಕೊಳ್ಳುತ್ತಲಿದ್ದೇವೆ. ಬಸವಣ್ಣ, ಪಂಪ ಇವರು ಕೂಡ ತಲ್ಲಣ ಕಂಡಿದ್ದಾರೆ ಎಂದು ತಿಳಿಸಿದರು.

ತಲ್ಲಣಗಳ ಮಧ್ಯೆ ರಾಜಕಾರಣವೂ ಇರಬೇಕು. ರಾಜಕಾರಣ ಮತ್ತು ಸಾಹಿತ್ಯ ಜನರ ಮಧ್ಯೆ ಬೆಳೆಯುತ್ತಿದೆ. ಸಾಹಿತ್ಯ ರಾಜಕಾರಣಕ್ಕೆ ಪ್ರೇರಣೆಯಾಗಿದೆ. ಇತ್ತೀಚಿನ ದಿನಗಳಲ್ಲಿ ಚಳವಳಿಗಳೇ ಇಲ್ಲದಂತಾಗಿದೆ. ಜನರಲ್ಲಿ ಸಂತೃಪ್ತ ಭಾವ ಮೂಡಿದಾಗ ಚಳವಳಿ ಎಂಬಂತಾಗಿದೆ ಎಂದರು.

ಅನೇಕ ಚಳವಳಿಗಳು ನಮ್ಮ ಕಣ್ಣ ಮುಂದಿವೆ. ಹಿಂದಿನ ಚಳುವಳಿಗಳಿಗೆ ಆಧ್ಯಾತ್ಮಿಕ ಚಿಂತನೆ ಜನಾಂದೋಲನದಲ್ಲಿ ಗುರಿ ಇತ್ತು. ಆದರೂ ನಾವು ನಿರಾಶೆಯಲ್ಲಿ ಕ್ರಿಯಾಶೀಲ ರಾಗಿದ್ದೇವೆ ಎಂದರು.

1970-80ರ ದಶಕದಲ್ಲಿ ಹೋರಾಟಗಳುಫ್ಲೆಕ್ಸ್‌ಗಳ ಮೂಲಕ ಬಂದ ನಾಯಕರು ಇರಲಿಲ್ಲ. ಅವರಲ್ಲಿ ಅಧ್ಯಯನಶೀಲತೆ ಇತ್ತು. ಚಳವಳಿಗಳಿಗೆ ಸಿದ್ಧಾಂತ ಟಿಪ್ಪಣಿಗಳು ಇರುತ್ತಿದ್ದವು. ಎಲ್ಲರನ್ನೂ ತೊಡಗಿಸಿ ಕೊಂಡು ಸಮಸ್ಯೆಗಳ ಬಗ್ಗೆ ಚಳವಳಿಗಳನ್ನು ಮಾಡಲಾಗುತ್ತಿತ್ತು. ಗೋಕಾಕ್ ಚಳವಳಿ ಒಂದು ಸರಕಾರವನ್ನೇ ಕಿತ್ತೊಗೆಯಿತು. ಗಂಭೀರವಾದ ಸಮಸ್ಯೆ ಗಳಿಗೆ ಚಳವಳಿಗಳು ನಡೆಯುತ್ತಿದ್ದವು ಎಂದರು.

ಸರಕಾರಿ ಕನ್ನಡ ಶಾಲೆಗಳು ಮುಚ್ಚಲು ಸರಕಾರವೇ ಕಾರಣವಾಗಿದೆ. ಸರಕಾರವು 2 ಸಾವಿರ ಕೋಟಿ ರೂ.ನ್ನು ಖಾಸಗಿ ಶಾಲೆಗಳಿಗೆ ನೀಡುವ ಮೂಲಕ ಖಾಸಗಿ ಶಾಲೆಗಳಿಗೆ ಉತ್ತೇಜನವನ್ನು ಆರ್‌ಟಿಇ ಮೂಲಕ ನೀಡುತ್ತಿದೆ. ಇದರಿಂದ ಕನ್ನಡ ಶಾಲೆಗಳು ಉಳಿಯುವುದು ಹೇಗೆ ಎಂದು ಅವರು ಪ್ರಶ್ನಿಸಿದರು.

ಇತ್ತೀಚೆಗೆ ಹೋರಾಟಗಳು ನಿರ್ಣಯಕ್ಕೆ ಮಾತ್ರ ಸೀಮೀತವಾಗಿವೆ, ಜನಾಂದೋಲನವಾಗುತ್ತಿಲ್ಲ. ಜನರನ್ನು ಮಾನಸಿಕವಾಗಿ ಸಿದ್ಧಗೊಳಿಸಬೇಕು. ಈಗ ಜನರಿಗೆ ನಾಯಕತ್ವ ಗುಣ ಇರುವ ವ್ಯಕ್ತಿ ರಾಜಕಾರಣಕ್ಕೆ ಬೇಕಿಲ್ಲ. ಹಣವಿದ್ದವರಿಗೆ ಮಾತ್ರ ರಾಜಕಾರಣ ಎಂಬಂತಾಗಿದೆ ಎಂದು ತಿಳಿಸಿದರು.

ಮಾಜಿ ಫಿಕಾರ್ಡ್ ಬ್ಯಾಂಕ್‌ನ ಅಧ್ಯಕ್ಷ ಪಿ. ಕಲ್ಮರುಡಪ್ಪಅಧ್ಯಕ್ಷತೆ ವಹಿಸಿದ್ದರು. ಸಮ್ಮೇಳನಾಧ್ಯಕ್ಷ ಪ್ರೊ.ಪಿ.ಓಂಕಾರಪ್ಪ, ಚಿತ್ರಕಲಾ ಪರಿಷತ್ ಅಧ್ಯಕ್ಷ ಬಿ.ಎಲ್. ಶಂಕರ್, ಕಸಾಪ ಜಿಲ್ಲಾಧ್ಯಕ್ಷ ಕುಂದೂರು ಅಶೋಕ್, ಎಚ್.ಸಿ. ಕಲ್ಮರುಡಪ್ಪ, ವೈ.ಎಸ್. ರವಿಪ್ರಕಾಶ್, ಗ್ರಾಪಂ ಸದಸ್ಯರಾದ ಫೈರೋಝ್‌ಖಾನ್, ರೇಣುಕಾ ಬಾಯಿ, ರಾಜಮ್ಮ, ಕೃಷ್ಣ ಸ್ವಾಮಿ ಮತ್ತಿತರರು ಉಪಸ್ಥಿತರಿದ್ದರು.