ಮಕ್ಕಳಿಗೆ ಆಡುವ ಹಕ್ಕನ್ನು ನಿರಾಕರಿಸದಿರಿ : ಸಚಿನ್

ಹೊಸದಿಲ್ಲಿ, ಡಿ.22: ಪ್ರತೀ ಮಗುವಿಗೂ ಶಾಲೆಯಲ್ಲಿ ಆಡುವ ಹಕ್ಕನ್ನು ಒದಗಿಸಬೇಕು. ಈ ದಿನ ಆಡಿದ್ದೀರಾ, ಯಾವ ಆಟ ಆಡಿದ್ದೀರಿ ಎಂದು ಪೋಷಕರು ತಮ್ಮ ಮಕ್ಕಳನ್ನು ಕೇಳುವಂತಾದರೆ ಅದಕ್ಕಿಂತ ಸಂತಸದ ವಿಷಯ ಬೇರೊಂದಿಲ್ಲ. ಕ್ರೀಡೆ ಭರವಸೆಯನ್ನು ಹೆಚ್ಚಿಸುತ್ತದೆ ಎಂದು ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ, ಹಾಲಿ ರಾಜ್ಯ ಸಭಾ ಸದಸ್ಯ ಸಚಿನ್ ತೆಂಡೂಲ್ಕರ್‌ಹೇಳಿದ್ದಾರೆ.

  ನಮ್ಮ ದೇಶವನ್ನು ಕ್ರೀಡೆಯನ್ನು ಇಷ್ಟಪಡುವ ರಾಷ್ಟ್ರದ ಬದಲು ಕ್ರೀಡೆಯಲ್ಲಿ ತೊಡಗಿಸಿಕೊಂಡ, ಸಾಧನೆ ಮಾಡಿದ ರಾಷ್ಟ್ರವನ್ನಾಗಿ ಪರಿವರ್ತಿಸಬೇಕಿದೆ ಎಂದು ಅವರು ಹೇಳಿದ್ದಾರೆ. ರಾಜ್ಯಸಭೆಯಲ್ಲಿ ಗುರುವಾರ ತಮ್ಮ ಪ್ರಪ್ರಥಮ ಚರ್ಚೆಯನ್ನು ಆರಂಭಿಸಲು ಮಾಡಿದ ಪ್ರಯತ್ನ ವಿಫಲಗೊಂಡ ಬಳಿಕ ಶುಕ್ರವಾರ ಫೇಸ್‌ಬುಕ್‌ನಲ್ಲಿ ಮನದಾಳದ ಮಾತುಗಳನ್ನು ಸಚಿನ್ ಹಂಚಿಕೊಂಡರು. ಕನಸುಗಳನ್ನೂ ನನಸಾಗಿಸಬಹುದು. ಕ್ರಿಕೆಟ್ ಆಡಲು ಆರಂಭಿಸಿದಾಗ ನನ್ನಲ್ಲಿ ನೂರಾರು ಕನಸುಗಳಿದ್ದವು. ಕ್ರಿಕೆಟ್ ನನ್ನ ಜೀವನವಾಗಿದೆ. ನನ್ನ ತಂದೆ ನನ್ನ ಕನಸನ್ನು ಬೆಂಬಲಿಸಿದರು ಎಂದು ಸಚಿನ್ ಹೇಳಿದ್ದಾರೆ.

ಇದರ ಜೊತೆಗೆ ಆರ್ಥಿಕ ಅಭಿವೃದ್ಧಿ, ಬಡತನ, ಆಹಾರದ ಭದ್ರತೆ, ಆರೋಗ್ಯ ರಕ್ಷಣೆ ಇತ್ಯಾದಿ ಹಲವು ವಿಷಯಗಳ ಬಗ್ಗೆ ಗಮನ ನೀಡುವ ಅಗತ್ಯವಿದೆ. ಜೊತೆಗೆ ಓರ್ವ ಕ್ರೀಡಾಪಟುವಾಗಿ ಕ್ರೀಡೆ, ಆರೋಗ್ಯ, ದೈಹಿಕ ಕ್ಷಮತೆಯ ಬಗ್ಗೆ ನನ್ನ ಅಭಿಪ್ರಾಯ ಹಂಚಿಕೊಳ್ಳಲು ಬಯಸುತ್ತೇನೆ ಎಂದವರು ಹೇಳಿದ್ದಾರೆ. 2020ರ ವೇಳೆಗೆ ಭಾರತವು ಅತ್ಯಧಿಕ ಹದಿಹರೆಯದ ಪ್ರಜೆಗಳನ್ನು ಹೊಂದಿದ ದೇಶಗಳ ಪಟ್ಟಿಯಲ್ಲಿ ಪ್ರಥಮ ಸ್ಥಾನದಲ್ಲಿ ಕಾಣಿಸಿಕೊಳ್ಳಲಿದೆ . ಆದರೆ ದೈಹಿಕ ಕ್ಷಮತೆಯ ವಿಷಯಕ್ಕೆ ಬಂದರೆ, ಭಾರತವು ವಿಶ್ವದ ಮಧುಮೇಹಿ ರೋಗಿಗಳ ರಾಜಧಾನಿ ಎನಿಸಿದ್ದು ದೇಶದಲ್ಲಿ ಸುಮಾರು 75 ಮಿಲಿಯನ್‌ಗೂ ಅಧಿಕ ಮಂದಿ ಮಧುಮೇಹಿಗಳಿದ್ದಾರೆ. ಅಲ್ಲದೆ ಬೊಜ್ಜಿನ ಸಮಸ್ಯೆ ಕೂಡಾ ದೇಶದ ಪ್ರಜೆಗಳನ್ನು ಕಾಡುತ್ತಿದ್ದು ಅತೀ ಹೆಚ್ಚು ಸ್ಥೂಲಕಾಯದ ಪ್ರಜೆಗಳನ್ನು ಹೊಂದಿರುವ ದೇಶಗಳ ಪಟ್ಟಿಯಲ್ಲಿ ಭಾರತ ಮೂರನೇ ಸ್ಥಾನದಲ್ಲಿರುವುದು ಕಳವಳಕ್ಕೆ ಕಾರಣವಾಗಿದೆ. ಈ ರೋಗಗಳು ಮುಂದಿಡುವ ಆರ್ಥಿಕ ಹೊರೆ ದೇಶದ ಅಭಿವೃದ್ಧಿಯ ಹಾದಿಯಲ್ಲಿ ಬಲುದೊಡ್ಡ ತಡೆಯಾಗಿದೆ ಎಂದು ತೆಂಡೂಲ್ಕರ್ ಹೇಳಿದ್ದಾರೆ.

ಆದ್ದರಿಂದ ನಿಯಮಿತ ವ್ಯಾಯಾಮ ಅಥವಾ ಕ್ರೀಡೆಯಲ್ಲಿ ತೊಡಗಿಸಿಕೊಂಡು ದೈಹಿಕ ಕ್ಷಮತೆ ಕಾಯ್ದುಕೊಳ್ಳಬೇಕು. ಮೊಬೈಲ್ ಫೋನ್‌ಗಳ ಈ ಯುಗದಲ್ಲಿ ನಾವೆಲ್ಲಾ ಚಲನೆಯನ್ನೇ ಮರೆತವರಂತೆ ಆಗಿಬಿಟ್ಟಿದ್ದೇವೆ. ದೇಶದ ಕೇವಲ ಶೇ.4ರಷ್ಟು ಜನಸಂಖ್ಯೆಯನ್ನು ಹೊಂದಿರುವ ಭಾರತದ ಈಶಾನ್ಯ ಭಾಗದಲ್ಲಿ ಕ್ರೀಡೆ ಭಾರೀ ಜನಪ್ರಿಯವಾಗಿದ್ದು ಮೇರಿ ಕೋಮ್, ಮೀರಾಬಾಯಿ ಚಾನು, ದೀಪಾ ಕರ್ಮಾರ್ಕರ್, ಬೈಚುಂಗ್ ಭುಟಿಯಾ, ಸಂಗೀತಾ ಚಾನುರಂತಹ ಹಲವಾರು ಅಪ್ರತಿಮ ಸಾಧಕರು ದೇಶದ ಪ್ರತಿಷ್ಟೆ ಬೆಳಗಿಸಿದ್ದಾರೆ. ದೇಶದ ಉಳಿದ ಭಾಗಗಳಲ್ಲೂ ಕ್ರೀಡೆಯನ್ನು ಇದೇ ರೀತಿಯಲ್ಲಿ ಇಷ್ಟಪಡುವ, ಅದರಲ್ಲಿ ಸಾಧನೆ ಮಾಡಲು ಯುವಜನತೆ ಮುಂದಾಗಬೇಕಿದೆ ಎಂದವರು ಹೇಳಿದರು.

ಕ್ರೀಡೆಯಿಂದ ಸಾಮಾಜಿಕ ಸಾಮರಸ್ಯ ಬೆಳೆಯುತ್ತದೆ. ದಕ್ಷಿಣ ಆಫ್ರಿಕಾದಲ್ಲಿ ನೆಲ್ಸನ್ ಮಂಡೇಲಾ ರಗ್ಬಿ ವಿಶ್ವಕಪ್ ಟೂರ್ನಿ ಸಂಘಟಿಸುವ ಮೂಲಕ ಇದನ್ನು ಸಾಬೀತುಪಡಿಸಿದ್ದಾರೆ. ಕ್ರೀಡೆಗೆ ದೇಶಕಟ್ಟುವ ಸಾಮರ್ಥ್ಯವಿದೆ. ಕ್ರೀಡೆ ವೈಯಕ್ತಿಕ ಸ್ವಭಾವವನ್ನು ರೂಪಿಸುತ್ತದೆ ಮತ್ತು ವೈಯಕ್ತಿಕ ಸ್ವಭಾವ ದೇಶದ ಸ್ವಭಾವದ ಪ್ರತಿರೂಪವಾಗಿರುತ್ತದೆ ಎಂದು ಸಚಿನ್ ಹೇಳಿದ್ದಾರೆ.