ಸಮಾಜಘಾತುಕರ ಬಗ್ಗೆ ಎಚ್ಚರವಿರಲಿ: ಎಚ್.ಸಿ. ಮಹದೇವಪ್ಪ

ತಿ.ನರಸೀಪುರ, ಡಿ.23: ಧರ್ಮದ ಆಧಾರದಲ್ಲಿ ಹಿಂದುಳಿದ ವರ್ಗದ ಜನರನ್ನು ಬಳಸಿಕೊಂಡು ಆರೆಸ್ಸೆಸ್, ಭಜರಂಗದಳ, ವಿಶ್ವ ಹಿಂದೂ ಪರಿಷತ್ ಹಾಗೂ ಬಿಜೆಪಿ ಪಕ್ಷದವರು ಸಮಾಜದಲ್ಲಿ ಬೆಂಕಿ ಹಚ್ಚುವ ಕೆಲ ಮಾಡುತ್ತಿದ್ದಾರೆ ಎಂದು ಜಿಲ್ಲಾ ಉಸ್ತುವಾರಿ ಹಾಗೂ ಲೋಕೋಪಯೋಗಿ ಸಚಿವ ಡಾ. ಎಚ್.ಸಿ.ಮಹದೇವಪ್ಪ ತಿಳಿಸಿದರು. ತಾಲೂಕಿನ ತಲಕಾಡು ಗ್ರಾಮದ ಮುಸ್ಲಿಂ ಸಮುದಾಯದ ನಿವಾಸಿಗಳ ಬಡಾವಣೆಗೆ ಸುಮಾರು 25 ಲಕ್ಷ ರೂ ವೆಚ್ಚದ ಸಿಮೆಂಟ್‌ರಸ್ತೆ ಮತ್ತು ಚರಂಡಿ ಕಾಮಗಾರಿಗೆ ಭೂಮಿ ಪೂಜೆ ನೆರವೇರಿಸಿದ ನಂತರ ಮುಸ್ಲಿಂ ಸಮುದಾಯದವರಿಂದ ಸನ್ಮಾನ ಸ್ವೀಕರಿಸಿ ಮಾತನಾಡಿದರು.

 ಹಿಂದುತ್ವವಾದಿಗಳು ಹಿಂದುಳಿದ ವರ್ಗಗಳಿಗೆ ಮೀಸಲಾತಿ ನೀಡಲು ವರದಿ ಬಂದಾಗ ಪ್ರಬಲವಾಗಿ ವಿರೋಧಿಸಿದರು ಆದರೆ ಅದೇ ಜನರನ್ನು ಅಲ್ಪಸಂಖ್ಯಾತರ ಮೇಲೆ ಬೀದಿಗೆ ಕರೆತಂದು ಧಾರ್ಮಿಕ ವಿಚಾರಗಳನ್ನು ಇಟ್ಟುಕೊಂಡು ಗಲಭೆ ಮಾಡಿಸಿ ತಾವು ಮಾತ್ರ ನೆಮ್ಮದಿಯಾಗಿ ಮನೆಯಲ್ಲಿ ಕುಳಿತುಬಿಟ್ಟರು. ಇಂತಹ ಸಮಾಜ ಘಾತುಕರ ಬಗ್ಗೆ ಎಸ್ಸಿ ,ಎಸ್ಟಿ ಯುವಕರು ಎಚ್ಚರಿಕೆಯಿಂದ ಇರಬೇಕು ಭಾರತ ದೇಶದ ಸಂವಿಧಾನದಲ್ಲಿ ಸಮಾನತೆ ಮತ್ತು ಸಮಾನ ಅವಕಾಶ ಕಲ್ಪಿಸಿದ್ದು ಎಲ್ಲರು ಅದನ್ನು ಅರಿತು ಬಾಳಬೇಕಂದರು.

ಟಿಪ್ಪು ಸುಲ್ತಾನ್ ದೇಶಕ್ಕಾಗಿ ಹೋರಾಟ ಮಾಡಿದ ಅಪ್ಪಟ ದೇಶ ಪ್ರೇಮಿ, ಸ್ವಾಭಿಮಾನಿ ಇವರ ಅಳ್ವಿಕೆ ಕಾಲದಲ್ಲಿ ಭೂ ಕಾಯಿದೆಯನ್ನು ಜಾರಿಗೆ ತರಲಾಯಿತು ರೇಷ್ಮೆಯನ್ನು ಪರಿಚಯಿಸಲಾಯಿತು, ಗುಬ್ಬಿ ಮತ್ತು ಹರಿಯಾಣದಲ್ಲಿ ವಾಣಿಜ್ಯ ಕೇಂದ್ರಗಳ ಸ್ಥಾಪನೆ, ಕೃಷಿಯನ್ನು ಕೈಗಾರಿಕೆಗೆ ಸಮನಾಗಿ ಅಭಿವೃದ್ಧಿ ಪಡಿಸಿದ ಕೀರ್ತಿ ಅವರದು ಟಿಪ್ಪು ಸುಲ್ತಾನ್ ಸೈನ್ಯದಲ್ಲಿ ಪೂರ್ಣಯ್ಯನವರು ದಿವಾನರಾಗಿದ್ದರು, ಬ್ರಾಹ್ಮಣರನ್ನು ಕೋಶಾಧಿಕಾರಿಯಾಗಿಟ್ಟುಕೊಂಡು ಕಾರ್ಯಬಾರ ಮಾಡಿದ ಟಿಪ್ಪು ಹೇಗೆ ಹಿಂದು ವಿರೋಧಿ, ರಾಷ್ಟ್ರ ವಿರೋಧಿಯಾಗುತ್ತಾರೆಂದು ಬಿಜೆಪಿ ಪಕ್ಷದವರನ್ನು ಜರಿದರು. ಡಾ.ಬಿ.ಆರ್.ಅಂಬೇಡ್ಕರ್‌ರವರು ಸಂವಿಧಾನದಲ್ಲಿ ಎಲ್ಲ ವರ್ಗದ ಜನರು, ಧರ್ಮಿಯರನ್ನು ಒಟ್ಟಾಗಿ ತೆಗೆದುಕೊಂಡು ಹೊಗಬೇಕು, ಸಮಾನ ಅವಕಾಶ ಕಲ್ಪಿಸಬೇಕು ಎಂದು ತಿಳಿಸಿದ್ದಾರೆ ಸಂವಿಧಾನದ ಆಶಯದಂತೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ಸರಕಾರದಲ್ಲಿ ಸರ್ವರಿಗೂ ಸಮಾನ ಅವಕಾಶ ಕಲ್ಪಿಸಿದ್ದಾರೆ, ಅಲ್ಲದೆ, ಪ್ರಪ್ರಥಮ ಬಾರಿಗೆ 2.800 ಕೋಟಿ ರೂ. ಅಲ್ಪಸಂಖ್ಯಾತರ ಕಲ್ಯಾಣಕ್ಕೆ ಬಜೆಟ್‌ನಲ್ಲಿ ಮೀಸಲಿಟ್ಟು ಮುಸ್ಲಿಂ ಸಮುದಾಯದ ಬಡಾವಣೆಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದರು.

ಮುಸ್ಲಿಂ ಜನಾಂಗದವರು ನಮ್ಮ ದೇಶದ ಪ್ರಜೆಗಳು ಎಂದು ಭಾವನೆ ಹೊಂದಿರುವ ಮುಖ್ಯಮಂತ್ರಿ ಆ ಸಮುದಾಯದ ಬೆಳವಣಿಗೆಗೆ ಎಲ್ಲ ರೀತಿಯ ಸಂವಿಧಾನಾತ್ಮಕ ನೆರವುಗಳನ್ನು ಜಾರಿಗೆ ತಂದಿದ್ದಾರೆ. ಇದನ್ನು ಸಹಿಸದ ಕೊಮುವಾದಿಗಳು ವೋಟ್ ಬ್ಯಾಂಕ್‌ಕ್ಕಾಗಿ ಮುಸ್ಲಿಮರ ಮೇಲೆ ಹಿಂದೂಗಳನ್ನು ಎತ್ತಿ ಕಟ್ಟಿ ಮತಾಂಧತೆಯನ್ನು ಹುಟ್ಟುಹಾಕಿ ರಾಜಕೀಯ ಲಾಭ ಪಡೆಯಲು ಪ್ರಯತ್ನಪಡುತ್ತಿದ್ದಾರೆ. ಅವರ ಪ್ರಯತ್ನ ರಾಜ್ಯದಲ್ಲಿ ಈಡೇರುವುದಿಲ್ಲ ಎಂದರು.

ಈ ಸಂದರ್ಭದಲ್ಲಿ ವಸತಿ ಯೋಜನೆಗಳ ಜಾಗೃತಿ ಸಮಿತಿ ಅಧ್ಯಕ್ಷ ಸುನೀಲ್ ಬೋಸ್, ಜಿಪಂ ಸದಸ್ಯ ಟಿ.ಎಚ್.ಮಂಜುನಾಥ್, ತಾಪಂ ಸದಸ್ಯ ಕುಕ್ಕೂರು ಗಣೇಶ್, ರಾಮಲಿಂಗಯ್ಯ, ಚಲುವರಾಜು, ಗ್ರಾಪಂ ಉಪಾಧ್ಯಕ್ಷ ಕುಮಾರ್ ನಾಯಕ, ಗ್ರಾಪಂ ಸದಸದಸ್ಯೆಅಫ್ರೀನ್ ನೈಶದ್, ಮುಖಂಡರಾದ ನರಸಿಂಹ ಮಾದನಾಯಕ, ಸತೀಶ್‌ನಾಯಕ, ಅಸ್ಥಿಕೇರಿ ನಾಗರಾಜು, ಅಲ್ಪ ಸಂಖ್ಯಾತರ ಉಪ ಛೇರ್‌ಮನ್ ರಫೀಕ್, ತಾಲೂಕು ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಸಬೀಲ್ ಖಾನ್, ನೈಷತ್ ಪಾಷ, ಬೈಕತ್ ಪಾಷ, ಸಾಧಿಕ್ ಪಾಷ, ಅಬ್ದುಲ್‌ಸಾಧಿಕ್, ಅಬ್ದುಲ್‌ಜಮೀರ್, ತಹಶೀಲ್ದಾರ್ ಬಸವರಾಜು ಚಿಗರಿ, ಲೋಕೊಪಯೋಗಿ ಎಇಇ ವಿನಯ್ ಕುಮಾರ್, ಜಿಪಂ ಎಇ ಸಿದ್ದರಾಜು, ಕುಡಿಯುವ ನೀರು ಸರಬರಾಜು ಲಕ್ಷ್ಮಣ್ ರಾವ್, ಇಒ ರಾಜು, ಸಿಡಿಪಿಒ ಬಸವರಾಜು,ಸಮಾಜ ಕಲ್ಯಾಣಾಧಿಕಾರಿ ದಿವಾಕರ್, ಅರಣ್ಯ ಇಲಾಖೆ ಉಮೇಶ್, ಹನಿ ನೀರಾವರಿ ಇಲಾಖೆ ಶ್ರೀನಿವಾಸ್, ಲ್ಯಾಂಡ್ ಅರ್ಮಿ ಮಂಜುನಾಥ್, ವಿವೇಕ್, ಮುಂತಾದವರು ಉಪಸ್ಥಿತರಿದ್ದರು.