ಈ ವಿಶೇಷ ಮದುವೆಯ 'ದಿ ಎಂಡ್ ' ನಿಮಗೆ ಕಣ್ಣೀರು ಬರಿಸುವುದು ಖಚಿತ

ಮದುವೆ ಸ್ವರ್ಗದಲ್ಲೇ ನಿಶ್ಚಯವಾಗಿರುತ್ತದೆ ಎಂದು ನಂಬುವ ಹಲವರಿದ್ದಾರೆ. ಒಬ್ಬ ವ್ಯಕ್ತಿಯ ಜೀವನದಲ್ಲಿ ಮದುವೆ ಎನ್ನುವುದು ವಿಶೇಷ ಸ್ಥಾನವನ್ನೇ ಪಡೆಯುತ್ತದೆ. ಆದರೆ ಕೆಲವು ಮದುವೆ ವಿಶೇಷತೆಗಳಿಂದಲೇ ಸುದ್ದಿಯಾಗುತ್ತದೆ. ಇಂತಹ ವಿಶೇಷ ಮದುವೆಯ ಕಥೆ ಇದಾಗಿದೆ.

ಹೇದರ್ ಮೋಶರ್ ಹಾಗು ಡೇವಿಡ್ ಮೋಶರ್ 2015ರಲ್ಲಿ ಪರಸ್ಪರ ಭೇಟಿಯಾಗಿದ್ದರು. ನಂತರ ಒಬ್ಬರನ್ನೊಬ್ಬರು ಬಿಟ್ಟಿರಲಾರದ ನಂಟು ಅವರನ್ನು ಬೆಸೆಯಿತು. ಆದರೆ 2016ರ ಡಿಸೆಂಬರ್ 23ರಂದು ಆಘಾತಕಾರಿ ಸತ್ಯವೊಂದು ಈ ಜೋಡಿಯನ್ನು ಕಂಗಾಲಾಗಿಸಿತು. ಅನಾರೋಗ್ಯದಿಂದಿದ್ದ ಹೇದರ್ ರನ್ನು ಪರಿಶೀಲಿಸಿದ ವೈದ್ಯರು ಅವರು ಸ್ತನ ಕ್ಯಾನ್ಸರ್ ಪೀಡಿತರಾಗಿರುವುದನ್ನು ತಿಳಿಸಿದರು. ವೈದ್ಯರ ಈ ಮಾತುಗಳನ್ನು ಕೇಳಿ ಹೆದರ್ ಮತ್ತು ಡೇವಿಡ್ ಒಂದು ಕ್ಷಣ ಕಂಪಿಸಿದರು. ಈ ಸಂದಿಗ್ಧ ಪರಿಸ್ಥಿತಿಯಲ್ಲಿ ವಿಚಲಿತರಾಗದ ಡೇವಿಡ್ ತಾನು ಹೇದರ್ ರನ್ನು ಪ್ರೀತಿಸುತ್ತಿರುವುದಾಗಿ ಅದೇ ದಿನ ತಿಳಿಸಿದರು.

“ಅದೇ ದಿನ ರಾತ್ರಿ ನಾನು ಪ್ರೀತಿಸುತ್ತಿರುವ ವಿಷಯ ತಿಳಿಸುತ್ತೇನೆಂದು ಹೇದರ್ ಗೆ ಗೊತ್ತಿರಲಿಲ್ಲ. ಆದರೆ ಆಕೆ ಒಂಟಿಯಲ್ಲ ಎನ್ನುವುದನ್ನು ಅದೇ ದಿನ ರಾತ್ರಿ ತಿಳಿಸಬೇಕೆಂದು ನಾನು ಬಯಸಿದೆ” ಎಂದು ಡೇವಿಡ್ ಹೇಳುತ್ತಾರೆ.

ಇದಾಗಿ ಕೆಲ ತಿಂಗಳ ನಂತರ ಹೇದರ್ ಕ್ಯಾನ್ಸರ್ ನ ಅಪಾಯಕಾರಿ ಮಟ್ಟ ತಲುಪಿರುವುದು ತಿಳಿದುಬಂದಿತ್ತು. ಡಿಸೆಂಬರ್ 30ರಂದು ಮದುವೆಯಾಗಲು ಹೇದರ್ ಹಾಗು ಡೇವಿಡ್ ನಿರ್ಧರಿಸಿದರು. ಆದರೆ ಹೇದರ್ ರ ಆರೋಗ್ಯ ಮತ್ತಷ್ಟು ಹದಗೆಟ್ಟ ಕಾರಣ ಡಿಸೆಂಬರ್ 22ರಂದು ಇವರಿಬ್ಬರು ಮದುವೆಯಾದರು. ಮದುವೆಯಾಗಿ ಕೆಲ ನಿಮಿಷಗಳಲ್ಲೇ ಹೇದರ್ ಕೊನೆಯುಸಿರೆಳೆದರು. ಮದುವೆಯ ಪ್ರತಿಜ್ಞೆಯೇ ಅವರ ಕೊನೆಯ ಮಾತುಗಳಾಗಿತ್ತು. ಹೇದರ್ ಚಿಕಿತ್ಸೆ ಪಡೆಯುತ್ತಿದ್ದ ಸೈಂಟ್ ಫ್ರಾನ್ಸಿಸ್ ಆಸ್ಪತ್ರೆಯಲ್ಲಿ ವಿವಾಹ ಕಾರ್ಯಕ್ರಮ ನಡೆದಿದ್ದು, ಸಂಬಂಧಿಕರು ಹಾಗು ಗೆಳೆಯರು ಭಾಗವಹಿಸಿದ್ದರು.

 “ಆಕೆ ನನ್ನ ಪ್ರೀತಿ. ನಾನು ಆಕೆಯನ್ನು ಕಳೆದುಕೊಳ್ಳಲಿದ್ದೇನಾದರೂ ಎಂದಿಗೂ ನಾನು ಅವಳನ್ನು ಕಳೆದುಕೊಳ್ಳುವುದಿಲ್ಲ ಎಂದು ಡೇವಿಡ್ ಹೇಳುತ್ತಾರೆ. ಕಾರ್ಯಕ್ರಮದ ಕೊನೆಗೆ ಎಲ್ಲರೂ ಭಾವುಕರಾಗಿದ್ದರೆ ಡೇವಿಡ್ ಹಾಗು ಹೇದರ್ ಸಂತೃಪ್ತಿಯ ನಗೆ ಬೀರಿದ್ದರು.