ವಿಜಯ್ ಮಲ್ಯ ‘ಘೋಷಿತ ಅಪರಾಧಿ’: ದಿಲ್ಲಿ ಹೈಕೋರ್ಟ್

ಹೊಸದಿಲ್ಲಿ,ಜ.4: ವಿದೇಶಿ ವಿನಿಮಯ ನಿಯಂತ್ರಣ ಕಾಯ್ದೆ(ಫೆರಾ) ಉಲ್ಲಂಘನೆ ಪ್ರಕರಣವೊಂದರಲ್ಲಿ ಸಮನ್ಸ್‌ನಿಂದ ನುಣುಚಿಕೊಂಡಿದ್ದಕ್ಕಾಗಿ ಮಾಜಿ ಮದ್ಯದ ದೊರೆ ವಿಜಯ ಮಲ್ಯ ಅವರನ್ನು ಘೋಷಿತ ಅಪರಾಧಿಯನ್ನಾಗಿ ದಿಲ್ಲಿಯ ಮುಖ್ಯ ಮಹಾನಗರ ನ್ಯಾಯಾಲಯವು ಗುರುವಾರ ಪ್ರಕಟಿಸಿದೆ.

 ಪದೇ ಪದೇ ಸಮನ್‌ಗಳನ್ನು ಹೊರಡಿಸಿದ್ದರೂ ಮಲ್ಯ ನ್ಯಾಯಾಲಯಕ್ಕೆ ಹಾಜರಾಗಲು ವಿಫಲಗೊಂಡಿದ್ದನ್ನು ಗಂಭೀರವಾಗಿ ಪರಿಗಣಿಸಿದ ನ್ಯಾ.ದೀಪಕ್ ಶೆಹ್ರಾವತ್ ಅವರು ಈ ಆದೇಶವನ್ನು ಹೊರಡಿಸಿದರು.

 ಮಲ್ಯ ಅಥವಾ ಅವರ ಪ್ರತಿನಿಧಿಗಳು 30 ದಿನಗಳ ಗಡುವಿನೊಳಗೆ ಈ ನ್ಯಾಯಾಲಯ ದಲ್ಲಿ ಹಾಜರಾಗಿಲ್ಲವಾದ್ದರಿಂದ ಮಲ್ಯ ಅವರನ್ನು ಘೋಷಿತ ಅಪರಾಧಿಯೆಂದು ನಿರ್ಧರಿಸಲಾಗಿದೆ ಎಂದು ಅವರು ಹೇಳಿದರು.

ನ್ಯಾಯಾಲಯವು ಕಳೆದ ವರ್ಷದ ಎ.12ರಂದು ಮಲ್ಯ ವಿರುದ್ಧ ‘ಓಪನ್-ಎಂಡೆಡ್’ ಜಾಮೀನು ರಹಿತ ವಾರಂಟ್‌ನ್ನು ಹೊರಡಿಸಿತ್ತು. ಜಾಮೀನು ರಹಿತ ವಾರಂಟ್‌ನಲ್ಲಿ ಆರೋಪಿಯ ಬಂಧನಕ್ಕೆ ಗಡುವು ವಿಧಿಸಲಾಗುತ್ತಿದ್ದರೆ, ‘ಓಪನ್-ಎಂಡೆಡ್’ ವಾರಂಟ್ ನಲ್ಲಿ ಅದನ್ನು ಕಾರ್ಯಗತಗೊಳಿಸಲು ಸಮಯದ ಮಿತಿ ಇರುವುದಿಲ್ಲ.

2016, ನ.4ರಂದು ಮಲ್ಯ ವಿರುದ್ಧ ಜಾಮೀನು ರಹಿತ ವಾರಂಟ್ ಹೊರಡಿಸಿದ್ದ ಸಂದರ್ಭದಲ್ಲಿ ನ್ಯಾಯಾಲಯವು, ಅವರಿಗೆ ಭಾರತಕ್ಕೆ ಮರಳುವ ಇಚ್ಛೆಯಿಲ್ಲ ಮತ್ತು ಈ ದೇಶದ ಕಾನೂನಿನ ಬಗ್ಗೆ ಅವರಿಗೆ ಗೌರವವಿಲ್ಲ ಎಂದು ಹೇಳಿತ್ತು.

ಜಾರಿ ನಿರ್ದೇಶನಾಲಯದ ಮನವಿಯ ಮೇರೆಗೆ ಮಲ್ಯ ಅವರಿಗೆ 2000, ಡಿಸೆಂಬರ್‌ನಲ್ಲಿ ನೀಡಲಾಗಿದ್ದ ವೈಯಕ್ತಿಕ ಹಾಜರಿಯಿಂದ ವಿನಾಯಿತಿಯನ್ನು ಜು.9ರಂದು ನ್ಯಾಯಾಲಯವು ರದ್ದುಗೊಳಿಸಿತ್ತು ಮತ್ತು ಸೆ.9ರ ಮೊದಲು ತನ್ನೆದುರು ಹಾಜರಾಗುವಂತೆ ಆದೇಶಿಸಿತ್ತು.

1996, 1997 ಮತ್ತು 1998ರಲ್ಲಿ ಲಂಡನ್ ಮತ್ತು ಕೆಲವು ಐರೋಪ್ಯ ರಾಷ್ಟ್ರಗಳಲ್ಲಿ ಫಾರ್ಮ್ಯುಲಾ ವನ್ ವಿಶ್ವ ಚಾಂಪಿಯನ್‌ಶಿಪ್ ಸಂದರ್ಭಗಳಲ್ಲಿ ಕಿಂಗ್‌ಫಿಷರ್ ಲಾಂಛನವನ್ನು ಪ್ರದರ್ಶಿಸಲು ಮಲ್ಯ ಬ್ರಿಟಿಷ್ ಸಂಸ್ಥೆಯೊಂದಕ್ಕೆ ಎರಡು ಲಕ್ಷ ಡಾಲರ್‌ಗಳನ್ನು ಪಾವತಿಸಿದ್ದಕ್ಕೆ ಈ ಫೆರಾ ಪ್ರಕರಣವು ಸಂಬಂಧಿಸಿದೆ.