ಜ.12: ಇಸ್ರೋದ ಶತಕದ ಉಪಗ್ರಹ ಉಡಾವಣೆ
ಬೆಂಗಳೂರು,ಜ.11: ಉಪಗ್ರಹ ಉಡಾವಣೆಯೊಂದು ವಿಫಲಗೊಂಡ ನಾಲ್ಕು ತಿಂಗಳ ಬಳಿಕ ಇಸ್ರೋ ತನ್ನ ನೂರನೇ ಉಪಗ್ರಹವನ್ನು ಶುಕ್ರವಾರ ಆಂಧ್ರ ಪ್ರದೇಶದ ಶ್ರೀಹರಿಕೋಟಾದಿಂದ ಉಡಾವಣೆಗೊಳಿಸಲಿದೆ. ಇದರೊಂದಿಗೆ ಇತರ 30 ಉಪಗ್ರಹಗಳೂ ಬಾಹ್ಯಾಕಾಶವನ್ನು ಸೇರಲಿವೆ.
ಸುಮಾರು 320 ಟನ್ ತೂಕ ಮತ್ತು 15 ಅಂತಸ್ತುಗಳ ಕಟ್ಟಡದಷ್ಟು ಎತ್ತರ ಹೊಂದಿರುವ ಇಸ್ರೋದ ಉಡಾವಣಾ ವಾಹನ ಪಿಎಸ್ಎಲ್ವಿ ತನ್ನ 42ನೇ ಅಭಿಯಾನದಲ್ಲಿ 31ಉಪಗ್ರಹಗಳನ್ನು ಹೊತ್ತುಕೊಂಡು ನಭಕ್ಕೆ ಚಿಮ್ಮಲಿದ್ದು, ಈ ಪೈಕಿ 710 ಕೆ.ಜಿ.ತೂಕದ ಹವಾಮಾನ ನಿರೀಕ್ಷಣೆ ಉದ್ದೇಶದ ‘ಕಾರ್ಟೊಸ್ಯಾಟ್-2’ ಅತ್ಯಂತ ಭಾರದ ಉಪಗ್ರಹವಾಗಿದೆ. ಭಾರತದ ತಲಾ ಒಂದು ಮೈಕ್ರೋ ಮತ್ತು ನ್ಯಾನೊ ಹಾಗೂ ಕೆನಡಾ, ಫಿನ್ಲಂಡ್, ಫ್ರಾನ್ಸ್, ಕೊರಿಯಾ, ಬ್ರಿಟನ್ ಮತ್ತು ಅಮೆರಿಕಗಳ ಮೂರು ಮೈಕ್ರೋ ಹಾಗೂ 25 ನ್ಯಾನೊ ಉಪಗ್ರಹಗಳು ಇವುಗಳಲ್ಲಿ ಸೇರಿವೆ.
ನಾಲ್ಕನೇ ಹಂತದಲ್ಲಿ ಎರಡು ವಿಭಿನ್ನ ಕಕ್ಷೆಗಳಲ್ಲಿ ಉಪಗ್ರಹಗಳನ್ನು ಸೇರಿಸಲು ಪ್ರಯತ್ನಿಸಲು ವಿಶಿಷ್ಟ ‘ಸ್ಟಾರ್ಟ್ ಸ್ಟಾಪ್’ ಕಾರ್ಯಾಚರಣೆ ಸೇರಿದಂತೆ ಹಲವಾರು ವೈಶಿಷ್ಟ್ಯಗಳನ್ನು ನೂತನ ಮತ್ತು ಸುಧಾರಿತ ಪಿಎಸ್ಎಲ್ವಿ ಒಳಗೊಂಡಿದೆ. ಅದರ ಒಟ್ಟೂ ಹಾರಾಟದ ಅವಧಿ ಎರಡು ಗಂಟೆ ಮತ್ತು 21 ನಿಮಿಷಗಳದ್ದಾಗಲಿದ್ದು, ಇದು ಈವರೆಗಿನ ಸುದೀರ್ಘ ಹಾರಾಟ ಅವಧಿಯಾಗಿ ದಾಖಲಾಗಲಿದೆ.
ಇದು 2018ರಲ್ಲಿ ಪಿಎಸ್ಎಲ್ವಿಯ ಮೊದಲ ಅಭಿಯಾನವಾಗಿದೆ. ಕಳೆದ ವರ್ಷದ ಆ.31ರಂದು ಭಾರತದ ಮೊದಲ ಖಾಸಗಿ ಕ್ಷೇತ್ರದ ಉಪಗ್ರಹ ಐಆರ್ಎನ್ಎಸ್ಎಸ್-1ಎಚ್ನ ಉಡಾವಣಾ ಪ್ರಯತ್ನ ವಿಫಲಗೊಂಡಿತ್ತು.