ಆಸ್ಪತ್ರೆಯಲ್ಲಿ ಅದಲು ಬದಲಾದ ಮಕ್ಕಳು

ಗುವಾಹಟಿ, ಜ.11: ಆಸ್ಪತ್ರೆಯಲ್ಲಿ ಹೆರಿಗೆಗೆ ದಾಖಲಾಗಿದ್ದ ಹಿಂದೂ ಮತ್ತು ಮುಸ್ಲಿಮ್ ಮಹಿಳೆಯರ ಮಕ್ಕಳು ಅದಲು ಬದಲಾದ ಘಟನೆ ಅಸ್ಸಾಂನಲ್ಲಿ ತಡವಾಗಿ ಬೆಳಕಿಗೆ ಬಂದಿದೆ.

   ಮಗು ಅದಲು ಬದಲಾದ ವಿಷಯ 2 ವರ್ಷಗಳ ಬಳಿಕ ತಿಳಿದುಬಂದಿದೆ. ಆದರೆ ತಮ್ಮ ಬಳಿ ಇರುವ ಮಗುವನ್ನೇ ಸಾಕಿ ಬೆಳೆಸಲು ಎರಡೂ ಕುಟುಂಬಗಳು ನಿರ್ಧರಿಸಿವೆ.

 ಅಸ್ಸಾಂನ ಮಂಗಲ್‌ದೋಯ್ ಜಿಲ್ಲೆಯಲ್ಲಿ ಈ ಪ್ರಕರಣ ನಡೆದಿದೆ. ಹೈಸ್ಕೂಲ್ ಶಿಕ್ಷಕರಾಗಿರುವ ಶಹಾಬುದ್ದೀನ್ ಅಹ್ಮದ್ರ ಪತ್ನಿ ಹೆರಿಗೆಗೆಂದು ಸ್ಥಳೀಯ ಆಸ್ಪತ್ರೆಗೆ ದಾಖಲಾಗಿದ್ದರು. ನೆರೆಯ ಗ್ರಾಮದ ನಿವಾಸಿ, ಬುಡಕಟ್ಟು ಜನಾಂಗದ ಅನಿಲ್ ಬೋರೊ ಎಂಬ ವ್ಯಕ್ತಿಯ ಪತ್ನಿ ಕೂಡಾ ಅದೇ ಆಸ್ಪತ್ರೆಗೆ ಹೆರಿಗೆಗೆಂದು ದಾಖಲಾಗಿದ್ದರು.

ಇಬ್ಬರೂ ಏಕಕಾಲಕ್ಕೆ ಗಂಡು ಮಗುವಿಗೆ ಜನ್ಮ ನೀಡಿದ್ದು ಆಸ್ಪತ್ರೆಯವರ ಅಚಾತುರ್ಯದಿಂದ ಮಗು ಅದಲು ಬದಲಾಗಿದೆ. ಕೆಲ ದಿನದ ಬಳಿಕ ಎರಡೂ ಕುಟುಂಬದವರು ಮಗುವಿನೊಂದಿಗೆ ಮನೆಗೆ ಮರಳಿದ್ದಾರೆ.

  ಸುಮಾರು 2 ವರ್ಷದ ಬಳಿಕ ಅಹ್ಮದ್‌ಗೆ ತಮ್ಮ ಮಗನ ಮುಖದ ಚಹರೆ ಬುಡಕಟ್ಟು ಜನರ ಮುಖದ ಚಹರೆಯಂತೆ ಕಾಣುತ್ತಿದೆ ಎಂಬುದು ತಿಳಿದುಬಂದಿದೆ. ಆದರೆ ಆಸ್ಪತ್ರೆಯವರು ಹಾಗೂ ಆರೋಗ್ಯ ಇಲಾಖೆಯವರು ಈ ವಿಷಯದಲ್ಲಿ ನೆರವಾಗಲು ನಿರಾಕರಿಸಿದ ಬಳಿಕ ಅಹ್ಮದ್ ಮಾಹಿತಿ ಹಕ್ಕಿನಡಿ ಅರ್ಜಿ ಸಲ್ಲಿಸಿದ್ದರು. ಬಳಿಕ ಅವರಿಗೆ ಆಸ್ಪತ್ರೆಯ ದಾಖಲೆ ಪುಸ್ತಕ ಪರಿಶೀಲಿಸಲು ಅವಕಾಶ ದೊರೆತಿದೆ. ತಮ್ಮ ಪತ್ನಿಗೆ ಹೆರಿಗೆಯಾದ ಅದೇ ದಿನ , ಅದೇ ವಾರ್ಡ್‌ನಲ್ಲಿ ಕೆಲ ನಿಮಿಷದ ಅಂತರದಲ್ಲಿ ಬುಡಕಟ್ಟು ಸಮುದಾಯದ ಮಹಿಳೆಯೋರ್ವರೂ ಮಗು ಹೆತ್ತಿರುವ ಮಾಹಿತಿ ದೊರೆತಿದೆ.

ಇದೇ ಸಂದರ್ಭ ನೆರೆಯ ಗ್ರಾಮದ ಅನಿಲ್ ಬೋರೊ ಕೂಡಾ ತನ್ನ ಮಗನ ಬಗ್ಗೆ ಸಂಶಯವಿರುವುದಾಗಿ ತಿಳಿಸಿದ ಕಾರಣ ಅಹ್ಮದ್ ಆತನ ಮನೆಗೆ ತೆರಳಿ ಮಗುವನ್ನು ನೋಡಿದಾಗ ಅದು ತನ್ನ ಮಗುವೆಂದು ಗೊತ್ತಾಗಿದೆ. ಬಳಿಕ ಎರಡೂ ಕುಟುಂಬದವರ ಒಪ್ಪಿಗೆ ಮೇರೆಗೆ ಶಿಶುಗಳ ಡಿಎನ್‌ಎ ಪರೀಕ್ಷೆ ನಡೆಸಿದಾಗ ಮಕ್ಕಳು ಅದಲು ಬದಲಾಗಿರುವ ವಿಷಯ ದೃಢಪಟ್ಟಿದೆ.

ಆದರೆ ಎರಡು ವರ್ಷ ತಮ್ಮದೇ ಮಗುವೆಂದು ಅಕ್ಕರೆಯಿಂದ ಪೋಷಿಸಿಕೊಂಡು ಬಂದಿದ್ದ ಮಗುವನ್ನು ತೊರೆಯಲು ಮನಸ್ಸಾಗದೆ ಎರಡೂ ಕುಟುಂಬದವರು ಯಥಾಸ್ಥಿತಿ(ಈಗ ತಮ್ಮ ಬಳಿ ಇರುವ ಮಗುವನ್ನೇ ಸಾಕಿ ಬೆಳೆಸಲು) ಕಾಯ್ದುಕೊಳ್ಳಲು ನಿರ್ಧರಿಸಿದ್ದಾರೆ. ಈಗ ಎರಡೂ ಕುಟುಂಬಗಳು ತಮ್ಮ ನಿರ್ಧಾರವನ್ನು ನ್ಯಾಯಾಲಯದಲ್ಲಿ ತಿಳಿಸಬೇಕಿದ್ದು , ಜನವರಿ 24ರಂದು ನ್ಯಾಯಾಲಯದೆದುರು ಹಾಜರಾಗಲು ತಿಳಿಸಲಾಗಿದೆ.

 ಘಟನೆಗೆ ಆಸ್ಪತ್ರೆಯ ಸಿಬ್ಬಂದಿಗಳ ನಿರ್ಲಕ್ಷವೇ ಕಾರಣ ಎಂದು ಎರಡೂ ಕುಟುಂಬದವರು ದೂರು ದಾಖಲಿಸಿದ್ದಾರೆ.